الثلاثاء، 20 مايو 2014

تقرير عن zodiac cuisine


السلام عليكم كيفكم بنات ! 

عارفة ولله طولت الغيبة بس  يقولو

من طول الغيبات جاب الغنايم (¬‿¬) 

ايوة فى ان شاء لله غنايم كتيرة فى الطريق

و دي التدوينة غنيمة من الغنائم 

يوم السبت اللى فات روحنا اناو زوجي مطعم/ كوفي زودياك ...

فقلت ليش ما اخذ الكاميراة و اعمل اول رفيو فى مدونتى عنو ؟!

ولله زوجي حمسنى خصوصا انو نحنا مرة نحبو  و كمان زودياك يستاهل الكتابة عنو .

في البداية زودياك مطعم و كمان كافي يقال انه اما فرنسي او ايطالي , الصراحة انا عن نفسي

حسيت انو مطبخ اوربي, يعنى مو فرنسي فقط او ايطالي فقط !

موجود في فرنسي و ايطالي و اسبانى و كمان مكسيكي و يابانى الى جانب مطابخ كثيرة

يعنى متنوع بشكل كبير لكن الاغلب اوربي 

المطعم خمس نجوم و اسلوب الضيافة قمة فى الابداع 

المطعم موجود في جدة على شارع فلسطين يمديكم تشوفو النافورة من المطعم .


اول ما تدخلو راح يكون في موظف تحت ياخذ العدد و نوع الطاولة و يوصلكم المصعد 

هذا الباب من الخارج





بعدها راح توصلو الدور اللى فى المطعم راح يستقبلكم موظف الاستقبال اللى فوق

و يوصلكم لطاولتكم بس قبل لا ادخل فى العميق خلينى اقولكم شئ 

اول ما تخرجو من المصعد راح يجيكم علي يمينكم قاعة اجتماعات و قاعة احتفال 

يعنى ينظمو اجتماعات و حفلات زواج , خطوبة , نجاح!  ايش ما كانت 

الحقيقة كم مرة روحت المطعم و كانت فى حفلات او اجتماعات 

آخ ايش اقولكم بس  بجد بجد حلو التنظيم , التنظيم اللى يشيفيلك قلبك

, فهمتو كيف !؟ (♥ω♥*) دا راح تشوفو اول ما تخرجو من المصعد 




اما على يساركم الاستقبال و الكوزين 

زودياك ينقسم لجلسات خارجية للمدخنين و جلسات داخلية 

بس خلينى اقولكم ايش يعنى زودياك ... زودياك يعنى عالم الفلك عشان كده

راح تشوفو الديكورات و كل حاجة مرسوم عليها الابراج 

حتى المنيو يمديكى تفتحي على برجك و  تختاري طبقك 

هذة الجلسات الداخلية للاسف صورت و قت الخروج

احنا خرجنا اخر ناس (━┳━ _ ━┳━)




و دي الجلسات الخارجية 



و موجود بين الجلسات الخارجية و الداخلية زي المنصة او الركن يتوسط الجلستين 

فدا الركن يبدعو , يعنى على حسب الموسم و المناسبة يعملو فيها ديكورات

مرة حلوة و معبرة و متعوب عليها 

زي رمضان و اول ما دخل الشتاء و دخول الصيف و الربيع , دائما تتغير على حسب المناسبة 

هذة هى المنصة 




بعدها راح تجلسي على طولتك و بجانب كل طاولة حاجة زي العلاقة

( عشان تعلقي شنطتك و حاجاتك)  , بس قبل كانت خداديات على الارض 




هذة الاطلالة من مكاننا ( •ॢ◡-ॢ)-♡



طيب نجي للمنيو 

المنيو جدا متنوع فى حاجات حلوة و صدقونى حاجات ما قد جربتوها ! 

يعنى اللى متعودة انها لها طبق معين ممكن يتوفر فى كل المطاعم , اغلب الاحيان

ماراح تلاقينو فى زودياك 

يعنى لازم تجربى حاجة جديدة و اكلهم فى الكويس و الممتاز و الجيد و المقبول 

ما اعرف كيف اوصفلكم الموضوع ؟! بأختصار يعنى فى حاجات كتيرة لكن ما هي معتادة

فى المطاعم التانية ,فهمتو قصدي ؟!

اول حاجة يجيبولكم ضيافة من العصيرات بأسلوب مرة شيك ...

العصير كان بطعم الليمون و الفرولة ... كويس ! 



يعنى تستمتعو فى و انتو تختارو اطبقاكم من المنيو

بعد ما تختارو كمان يقدمولكم ضيافة عبارة عن خبز و زبدة و زيتون مهروس و جبن

او حاجة زي المحمرة اللبنانية اذا تعرفوها !

الضيافة دى جدا جدا لذيذة و مافى احد ذاقها الا اتجنن عليها




بنسبة للاطباق باين جدا انو مو اي شيف يعملها

و لله العظيم تحسي نفسك فى احد المطاعم الراقية اللى بباريس  

فى البداية طلبنا شوربة دجاج بالكريمة المفضلة عندي

لذيذة لكن الصراحة شربة بارك حياة افضل منها بس تري جيدة جدا 




مرة حبيت الليمونة مربوطة بقماش معين عشان البزر

مو اقلكم مهتمين فى ادق التفاصيل , صورة اقرب 




عن نفسي فى الطبق دا اعطيهم 10/7 

بعدها يقدمولكم كمان ضيافة عبارة عن ايس كريم بنكهة الليمون

 هو مو ايس كريم ايس كريم 

هو تقريبا تلج بطعم الليمون 

يقدموها الى ان يجهز الطبق الرئيسى , الايس كريم يقدم على كاسة فيها اضاءة 



بنسبة للطبق الرئيسى طلبنا انا و زوحي صدور الدجاج بالكريمة , يجي معاها بطاطس مهروسة 

انا عن نفسي اعطي 10/6 

الغلط منى لانى المفروض اقولهم على درجة  الاستواء اللى تناسبنى 




طلبنا كمان سوشي بالتونة المشوية 

اخير اخيرا ذوقت السوشي ... آخ... آخ كم انت طعم يا سوشى !!! 

حبيتو حبيتو حبيتو ... مع انى مبتدئة فى السوشى جدا حبيتة 

فى عندهم انواع سوشى كتير ... بس انا قولت خلونى ابدأ فى سوشى المبتدئين 

بس بيني و بينكم لازم اتعلم اكل بالشوبستيك (;¬_¬).. فضحت زوجي!



اخير نجي للحلى 

احنا الصراحة روحنا متأخرين  و مع ذلك اخذنا الكلام و ما حسينا على الوقت  الا و الجرسون

يقولنا اذا تبغو اي حاجة قبل لا المطبخ يقفل !!!

عادة احنا ما نطلب حلى ... خصوصا ماشاء لله تكون المعدة فل 

لكن دي المرة قلت خلينى اطلب عشان اخذ اكثر قدر من الصور 

كانت تقريبا على الساعة 1 صباحا , طلبت منيو الحلى و اول حاجة شفتها مفاجاة زودياك 

الصراحة ما كنت فى مود انو افرفر على صفحات المنيو  , فقلت ليش ما اطلبها ؟ وطلبتها 

و قبل ما يمشي قالى تبغي تعرفى ايش هو الحلى المفأجاة او نخليها مفاجأة : قلت خليها مفاجأة !!!!

و فعلن طلعت مفاجاةء فى الطعم 

مرة لذيذة يا جماعة مرة 

لما سألت الجرسون عنها ؟ عن اسمها يعنى ؟  ما عرف لكن قالى هيا من المطبخ الفرنسي 

عشان اوصفلكم طعمها هى تقريبا زي الكوراسون بالنوتيلا مع المكسرات 

حاجة جدا جدا جميلة ( الجرسون ما كان عندو مشكلة ينادي الشيف يشرحلى الطبق !)

شخصيا اعطي الطبق 10/10  




 اخيرا نجي للايجأبيات و السلبيات من وجهة نظري الشخصية 

المكان : جدا حلو رومنسي بدرجة الاولى و يمنع اصطحاب الاطفال اقل من 10 سنوات

على حسب ما عرفت , اضاءة المكان جدا خافتة مو مثل مو مبين فى الصور ,,,

هي اضاءة على الشموع , مناسب لعمل الاحتفالات خصوصا حفلات المفاجأة مرة حلوة

الى الان احلى مكان يعمل مفأجات ايش ما كانت !

الاماكن محدودة عشان كده اوقات المواسم لازم تحجزي قبلها , خصوصا انو اشوف كتير

رجال اعمال و  مقابلات عمل بتالى يقلل جدا  من الاماكن 

الخدمة : من غير اي نقاش افضل خدمة فى جدة , اساس يحتارو فين يحطوكي من الخدمة 

المذاق و الاكل : عن نفسي الاكل جيد جدا لكن زي ما ذكرت سابقا فى اطباق مقبولة الى حدا ما 

و شكل الاطباق و طريقة ترتيبها تفتح النفس

الاسعار : الصراحة الاسعار غالية , لكن زيها زي اي مطعم راقي 

هل انصح بزيارتها ؟ جدا جدا جدا انصح بزيارته ... يستحق التجربة 

مناسب ليوم رومنسي مع زوجك او خرجة حلوة مع صحباتك او عشاء عمل 

كمان اذا كان راح يزوركم احد من خارج السعودية يعتبر مكان جدا مناسب راقى و راح يبيض

وجهك قدام ضيوفك ان شاء لله 

قبل لا انهى البوست احب اذكركم انو فى اغانى زي كل مطاعم جدة و كمان مافيها برتشينات 

اتمنى استمتعو و استفدتو من البوست , اعملو تاق لصحباتك و كل من يهتم بالموضوع 

شكرا لكم على حسن المتابعة و قولولى ايش رايكم فى زودياك لما تجربو 

اشوفكم فى بوست جديد ان شاء لله 

( البوست هذا ليس للدعاية لزودياك انما مجهود شخصي ) 



SHARE:

ليست هناك تعليقات

إرسال تعليق

Blogger Template Created by pipdig