الثلاثاء، 10 يونيو 2014

مراجعة _ Baby Foot Review


السلام عليكم جميعا ً

قبل كم اسبوع نزلت على الانستقرام صورة و انا بجرب

منتج جديد لرجولى .

منتج Baby Foot ! يعنى كأقدام الاطفال او اقدام الاطفال .

هو منتج لتقشير القدم و لازالة الجلد الميت 

الصراحة قررت اجربو بعد ما عمل ضجة كبيرة فى امريكا

لان المنتج اساسا ياباني لو 15 سنة تقريبا لكن دوبو دخل

السوق الامريكي . 


فعشان كده كثير ناس كانو يستنو يدخل امريكا او انو يتوفر فيها ( فسارت الضجة ) 




كنت واثقة 100% انو منتج خطير و مفعوله قوي من كثر الريفيوز اللى تمدحو

مع انو كمانفى نسبة ماهي قليلة من الناس ما نفع معها , اتوكلت على الله وطلبته !

لكن فى البداية خلونى اقولكم على طبيعة قدمي .

للا سف الشديد انا لما نقلت على المنطقة الوسطى رجولي مرة مرة اتعدمت 

 فى حياتى كلها ما اشتكيت منه

 لكن لما نقلت على المنطقة الوسطى للاسف سرت اتكسف ما البس

شوراب (جوارب) الجو اتغير عليا و الموية و كل شئ احس اتغير

مع انو زوجي ما اتأثر زي ! (ماشاء لله ) اتوقع بحكم اختلاف البشرات 

جلست اسابيع طويلة و انا ابغا اعرف السبب هو السراميك ؟ هو الشوز

( الجزمة وانتو بكرامة ) ؟

هو الصابون ؟ حتى المكيف المركزي شكيت فى ! 

ما عملت شئ و ما غيرتو , غيرت شوز الخروج , غيرت شوز البيت 

 سرت ما امشي على السراميك كثير

مع انو بيتنا فى مكة سراميك ؟!!!

قولت امكن النوعية تختلف, غيرت شراشف السرير قولت امكن خشنة

( و انا احب و انا نايمة احك رجولى فى بعض مادري ليه؟!

 بس سارت عادة اتوقع اخدتها وراثة من بابا )

غيرت برنامج العناية الخاص برجولى 3 مرات , سرت اشرب موية كثير , قللت من وزنى !

قلت امكن الوزن اللى زدتو عمل فيا كدا 

استخدمت علاجات كتيرة ولله لكن و لا حاجة

نفعت تنفع حق يوم و يومين و ترجع رجولى زي اول 

ماقولكم عملت ايش ولا ايش ! 

و اللى مجنني انو لما ارجع مكة كل شئ يتغير ترجع رجولى ناعمة و حلوة

( اتوقع بحكم الرطوبة )

عشان كده عللت سبب رجولى بأجواء المنطقة اللى ساكنه فيها

و نوعية جلدي ما يتحمل الجو دا 

بس فى منتج جربته من الصيدلية حبيتو , راح اعمل عنو رفيو او مراجعة ان شاء لله

بس مشكلته انو تعبنى حبتين

المهم حكيتكم كل الحكاية دي عشان تحسو بالمعانة اللى خلتنى اشتري المنتج

 


هذا هو كرتون المنتج يوضحلك الطريقة و المكونات - جدا سهل

داخل كل كرتون علاج و احد يعنى كيس جورب لكل قدم ,

 و كل كيس في مواد شفافة سائلة هي

اللى تعمل على التقشير و هي عبارة عن احماض طبيعة - المنتج طبيعى (عضوي)

 


المنتج زي منتو شايفين جدا امن لكن من التحذيرات اللى على الكرتون

أبتعاد الحامل و المرضع عن استخدامه 

طبعا اول ما تفتحي الكرتون راح تلاقي الجوارب داخل كيس مقفل عشان حفظ السوائل 

على الكيس تاريخ صلاحية اتكدي منه



بعدها نجي للخطوات :.

اول حاجة يجب تنظيف القدم بالماء و الصابون.

و يفضل نقعها فى الماء من 10 الى 15 دقيقة عشان تظهر نتيجة احلى 

بس اكون صريحة معاكم الخطوة دي ما عملتها 



ثانيا تفتحي الكيس و تلبسي الجوارب .

ثالثا يجي مع الجوارب اوراق لصق لكن للاسف ماصورتها !

دا اللصق تأخدي و تضيقي الجوارب على قدمك زي مو باين فى الرسمة

اللى فوق عشان قدمك

تمتص اكبر قدر ممكن من السوائل او الاحماض 



 لاحظو كيف السائل داخل الكيس فى الصورة اللى فوق 



بعد ما تلبسي الشوراب يفضل تلبسي جوراب عاديه فوقها عشان توصل الاحماض للقدم 

بصورةاكبر .. 

انا عن نفسي عملت دي الخطوة و الصراحة حبيتها سهلة عليا المشي للاماكن القريبة

(مع انو مو المفروض تمشي وانتى لابسة الكيس )

بعدها تريحي فى اي مكان و تنتظري ساعة 

بعد الساعة غسلي رجلك و نشفيها, وكدا خلصت الخطوات 

اخيرا نجي للنتائج و ايش سار و كمان ايش رأي فى المنتج ؟

اول ما غسلت رجولى بعد ما شلت الكيس ما حسيت بشئ , عادي زي ما كانت

و مرت الثلاثة الايام الاولى و لا سار شئ قدمي هيا هيا ! 

مرة استغربت الصراحة و حسيت انى اتغشيت و ولله اتوقعت خلاص مافى علاج لقدمى

لكن رابع يوم بدأت انتبه على الجلد اللى على سطح قدمي يجف و تطلع خطوط بيضاء !!

فاهمين كيف سطح القدم من فوق مو بطن القدم من تحت ! 

انا هنا اتفجعت لانو اساسا هذة المنطقة عندي مافيها شئ انا كنت ابغا فقط بطن القدم

قلت شكلى ضيقت الكيس و السوائل كلها طلعت على فوق

 او الشوراب اللى لبسته كان صغير

او المفروض ما اجازف و البسه ؟

يعنى بأختصار وسوست !!

و كلها كم ساعة و الاحظ بطن القدم بدء يتقشر .. هنا فرحت

شكل قدمي سار بمعنى الكلمة مقرف , كنت طول الوقت البس شوراب

و ما ابغا زوجي ينتبه لقدمي

فعشان كده حددي الوقت المناسب عشان تعملى التقشير 

و الاسوء انو مطلوب منك ابدا ما تقشريها بنفسك لازم هي تتقشر من نفسها

تخيلو كنت اصحي من النوم اشيل البطانية والسرير من تحت كلو جلد ميت

سرت ابدا ما انام

الا و انا لابسة حاجة فى رجولى , ابغا اوريكم كيف شكل التقشير



طبعا هذة الصورة مرة حلوة بنسبة للحقيقة !

ممكن تدوري فى النت على صورة زيها عشان تفهمي اكثر

او عشان تتوقعى اكثر كيف راح يكون شكل القدم اثناء العلاج 

و استمرت عملية التقشير لمدة 10 ايام بظبط , طبعا تختلف من وحدة لوحدة !

بعد العشرة ايام بأن السحر و بأن مفعول المنتج ....

نتيجة خيالية لدرجة انو قدمك تسير حساسة لكل شي 

 اذا مشيتي على سراميك تحسي ببرودة 

تحسي اكثر بالموكيت خشن ؟  ناعم ؟

آآآخ يابنات نتيجة مرة مرة حلوة فعلن ترجع قدمك زي اقدام البيبيهات 

المنتج جدا عجبنى , فعال , يستاهل كل الضجة اللى سارت على ! 

هذا منتج من المنتجات اللى لازم تجربيها الصراحة 

و بنسبة من فين اخدت المنتج و كم سعره ؟ 

انا اخدته من موقع beauty كمان موجود في مواقع كثيرة منها ايبي و امازون كمان 

و سعره  25 دولار يعنى حدود 100 ريال سعودي و يستاهل سعره 

نصيحة اخيرة بعد ما تخلصي العلاج لازم لازم تهتمي بقدمك اكثر من الاول

عشان النتيجة تطول معاكي .


اتمنى يكون البوست فادكم اليوم ! و شكرا لكم على حسن القرأءة 

اشوفكم ان شاء لله فى بوست جديد 

SHARE:

ليست هناك تعليقات

إرسال تعليق

Blogger Template Created by pipdig