الخميس، 7 أغسطس 2014

Crest - 3D Professional Effects White Strips تجربة


السلام عليكم ......

و قبل كل شئ كل سنة وانتو طيبين و ينعاد علينا

و عليكم بالصحة و العافية !

عارفة متأخرة فى البوستات بس و لله رمضان

فى مكة غير .....

بأختصار شديد مافي وقت لأي شئ غير طقوس رمضان

مع انو عندي بوستات كثيرة بس ما لقيت وقت ! اعذروني


اليوم ابغا اقولكم عن تجربتى ل 

Crest - 3D Professional Effects White Strips



بس قبل خلونى اعطيكم خلفية عن اسناني ... (⌒_⌒;)

انا قبل 3 سنين عملت تبيض لأسنانى و للاسف لانى كنت مستعجلة

عملت الجلسات كلها مع بعض!

(للى ما قد جربت تبيض الاسنان اقصد هنا انو لما تجي تعملى التبيض يعملك جلسات متباعدة

مثل كل اسبوع جلسة الين توصلى الدرجة المطلوبة)

انا و للاسف عملت3 جلسات في يوم و احد و كنت راح اكمل بس الالم منعنى (.﹒︣︿﹒︣.) 

فبعدها اسناني سارت حساسة لكن مو مرة 

 اللي اقصد انو اسنانى ما سارت بالقوة اللي كانت عليها d(-_^)

و اكيد بعد فترة من التبيض راح يبدا يتغير لون الاسنان خصوصا مع القهوة و الغازيات و العصيرات

بس الحمد لله عمري ما وصلت لدرجة من الاصفرار الملفت او انو اخجل منها

لكن من ما يحب الكمال و الاهتمام!



 قبل فترة سمعت عن Crest - 3D Professional Effects White Strips

و كل  ما اتحمس اجربها اكنسل الموضوع بسبب انو اكيد مو منتج يستاهل التجربة

و كلو كلام اعلام و اعلانات و دعايات

ابدا ما تخيلت انو منتج بسهولة دي يبيض الاسنان و بالسرعة دي !!!!

ولكن اللى غير رأي تجربت اختى .... و حماسها خلانى انا كمان اجربة .. و طلبته

انا طلبت المنتج اون لاين من  drugstore 

 كان سعره 39.99 دولار يعنى تقريبا 150 ريال و اتوقع انو متوفر فى صيدلية وايتس

المنتج موجود داخلة 20 ظرف دا خل كل ظرف شريطين تبيض

واحد للاسنان العلوية و الثانية للاسنان السفلية



جدا الاستخدام سهل ... بس تحطي الشريط على الاسنان و انتهى الموضوع

لكن انا افضل قبل ما احطها على اسناني اطبقها ( اثنيها ) يعني احط الجنب اليمين على الجنب

اليسار عشان اعمل علامة او مارك فى نص الشريط عشان اساويها بظبط فى نص الاسنان

و حاجة تانية كمان بعد ما احطها على اسناني احاول ارتبها و اركز على زوايا الاسنان

بعود الاسنان اذا كنت فاضية (◡‿◡✿)

طبعا تسخدمي كل يوم و حدة ل 20 يوم , و شفت ناس مرتين فى اليوم ...

بس ما انصح تستخدمى اكثر من مرة فى اليوم

و تتركي لمدة 30 دقيقة , و كمان اعرف ناس يمددو المدة لساعتين كاملة او ساعة ...

حرام عليهم اجرام كبير بحق اسنانهم

لما تستعمليها عادي ما راح تحسي بأي طعم او أي شئ مزعج و عادي تشربي و تتكلمي و انتي حطته

عن نفسي شفت الفرق من ثاني ظرف !

و على الاستعمال الخامس الكل فى البيت بدا يلاحظ فرق

جدا جدا حلوة التجربة  و النتائج اكثر من رائعة , بس عشان اكون صريحة معاكم الى الان ما وصلت

لدرجة البياض اللى زي الثلج

تحسي كده بياض طبيعى حلو رايق بس اتوقع مع الاستعمال المتكرر راح توصل لدرجة بياض الثلح

لكن للاسف كانت تعملى حساسية لأسناني , تقريبا فى السبع دقائق الاخيرة

تبدا اسناني بالحساسية

لكن تختفي تقريبا بعدها بفترة بسيطة امكن بعد نزع الشريط بربع ساعة

و بعض الاحيان كنت استخدم شريط كل يومين بسبب حساسية اسنانى

لكن اختى ماشاء لله ابدا ما اشتكت من حساسة او أي حاجة كده

 ممكن انا سارلى كده بسبب حساسية اسنانى بعد تبيض العيادة

بس ارجع و اقولكم الم بسيط يعنى عادي تقدري تستحملى

بس لازم تنتبهو انو فى فترة العشرين يوم ما اتشربي قهوة او عصائر ملونة

 واذا مرة مرة تبغي تشربي ... اشربيها ب المصاص

و قبل ما تجربي اللزقات لازم تعرفى انو اصابع يدك مو زي بعض يعنى اسنانك مو زي غيرك

فابغاكي تتوقعى انو ممكن اللون ما يكون موحد او ممكن تلاقى بقع بيضاء على اسنانك

و ممكن يحرق اللثة

لكن و لله الحمد انا ما وجهت أي مشكلة من المشاكل السابقة و لا احد اعرفه لكن سمعت !

عن نفسي مرة حبيت التجربة و ان شاء لله راح استخدمها مرة كل 6 شهور

او مرة كل سنة على حسب المزاج

و حلو تستخدمى بعد تبيض اسنانك فى العيادة عشان تحافظي و تمددي مدة بياض اسنانك

 او اذا كان ما يمديكي تروحي عيادة للتبيض



هل انصحك تشتري ؟ اذا كنتي حابة تخوضي التجربة راح اقولك استمري و خوضي التجربة

راح تنبسطي من النتيجة ان شاء لله

اتمنى البوست كان خفيف و فادكم و حمسكم تجربو المنتج

خليكم قريب ان شاء لله اشوفكم في بوست جديد


SHARE:

ليست هناك تعليقات

إرسال تعليق

Blogger Template Created by pipdig