الخميس، 28 أغسطس 2014

It's Judy time & That's heart palettes review


السلام عليكم .... كيفكم صبايا !

قبل يومين ذكرتلكم على الانستقرام انو راح اتكلم عن

بالتين نزلت فى ديسمبر السنة اللى فاتت 

انا عارفة الوقت التاخر عشان اعمل ريفيو عنها .... 

لكن الحقيقة اللى شجعني اعمل ريفيو

انو ما شفت رفيوهات كتيرة بالعربي

فقلت ليش لا خصوصا انو الموقع ما وقف مبيعات البالتات و كمان حاليا عاملين

عليها تخفيض 50%  عشان لو حابين تجربوها .

اول حاجة راح اتكلم عن  It's judy time palette


جودي امريكية من اصول فلبينية و هي يوتوبر (youtuber ) و زوجة و ام لثلاث بنات

عندها قناة للبيوتي و قناة للامومة و قناة يومية للفلوقات

جدا حبوبة وعائلتها و بناتها ياخدو العقل ماشاء لله 




اشتركت جودي مع شركة BH cosmetics  و عملو باليت it's judy time

الباليت وصلتني تقريبا قبل خمسة او ستة شهور يعنى كان عندي الوقت الكافى عشان استخدمها

بأكثر من طريقة

التغليف : الباكجنق مرة كلاسيك انا اتوقعت انو صعب تتوسخ و راح تحافظ على لونها

بس للاسف  زي منتو شايفين اللون بهت شوية طبعا هذا شكلها بعد مرحلة تلميع طويلة 



اللي يعرف جودي راح يعرف قد ايش هيا تحب اللون الذهبي بس ما اتوقعت انها تحب الاسود !

اتمنيت لو لون ثاني غير الاسود لكن هي شخصيتها شوية كلاسك مافيها تهورات عشان كدا فهمت

هي ليش اختارت الشكل و الالوان دي

و الباليت تتفتح و تتصك (تتقفل) بمغناطيس فى اطراف البالت عشان لا تتفتح عليكي و انتي

ما تدري و كمان عشان تفتحيها بسهولة و كمان عشان تكون ترفيل فريندلى (travel friendly )

يعنى سهل تاخديها السفر معاكي او صديقة السفر ، بأختصار ما يحوسلك الدنيا و قت السفر

و داخل الباليت في مراية حجمها حلو و كمان جملة جودي او مقولتها المشهورة

Natural is beautiful but makeup is glam 





طيب خلونا نتكلم عن الشدوهات , الباليت فيها 12 شدو , خمسة منها مات و 6 شيمر و 1 غلتير

الباليت جدا يوصف شخصية جودي , شدوهات طبيعية (Natural) مافيها أي جنون

وكمان جودي دائما تركز على المنتجات ذو جودة عالية لكن بسعر جيد او مغري

فيها كل الالوان اللى تحبها جودي اللى هيا الموف و الازرق و الناتشورال (Natural)

اغلب لوكات جودي بسيطة ناعمة و يومية عشان كده اختارت مجموعة الالوان دي 

و احسها حاولت تختار الوان تناسب جميع انواع البشرات مع انو الاندر تون تبعها مائل الى الاحمر

و عن نفسي افضل الاصفر على الاحمر لكن ناسبنى الصراحة

الشدوهات ملمسها زي الزبدة مرة ناعمة و سهلة الدمج حبيتها جدا , الالوان قريبة من بعض

حبيت كل الالوان لكن اخر ثلاث الوان على اليمين تحت اللى هيا الزرقاء و الموف فى السواتش

تبان غامقة لكن عكس الحقيقة مرة ما طلعت معايا ما حبيتها اقدر اقول عليها نقطة سلبية فى

الباليت و كمان من سلبيات الباليت انو الشدوهات ما عليها اسماء او ارقام او تعريف !



دا راي فى الباليت و الصراحة اللي تتابع جودي راح تنتبه انو جودي تستخدم الباليت بشكل يومي

قولت امكن عشان اعلان للباليت او ممكن عشان هى لوكها او تبعها اللوك كده , لكن فعلن لما

وصلتني الباليت انا سرت استخدمها بشكل يومي او اغلب الوقت

الباليت بشكل عام ينفع اللي يحب اللوك الطبيعى للدوامات و الجامعات

الباليت اخدتها من موقع BH cosmetics  كانت بسعر 20.99 دولار

لكن انا اخدتها بسعر مخفض 11 دولار

يعني تقريبا 40 ريال لكن دحين الباليت متوفرة بمبلغ 8.95 دولار

الباليت المفروض تكون  Limited Edition  لكن الى الان ماشاء لله ما وقفوها

احتمال يكون الطلب عليها كثير !

هنا اسيبكم مع السواتشيز من جودي نفسها و كمان اللوك 




وقبل لا ادخل فى الباليت الثاني خلينى اقولكم كيف الباليت يكون ناجح او لا بنسبالى

بغض النظر عن الجودة , و اذا حسبنا انو الجودة عالية هنا فى عدة نقاط مهمة

عشان تنجح الباليت او لا .

لازم يكون فى الباليت على الاقل 3 درجات مهمة اولها هايليت (highlight ) ثانيا الالوان الانتقالية

اللي تكون فى كسرة العين و ثالثا البوب او الالوان البارزة .

و الحقيقة كلها متوفرة فى جودي باليت و هارت باليت كمان !

طيب نجي للباليت الثاني .... 

That's Heart Eyeshadow



هارت كمان بنت امريكية فلبينية الاصل اتوقع ! عشان اكون صريحة معاكم ما اتابعها بشكل دوري

او دائم لكن شفت فيديوهاتها

بنت مرة بسيطة ناعمة فيها جانب كبير من الانوثة  يعنى مرة بنوته  ودا الشئ ظهر على الباليت

و اكيد لو عارفينها راح تعرفو قد ايش هيا تحب البنك ماقد شفتلها فديو مافي لون البنك

(الوردي او البمبي)

 

كمان هيا اتعاونت مع  BH cosmetics   في الباليت تبعها

 وعلي سيرة BH cosmetics  عندهم شحن انترناشنول (دولى) مع انو انا شحنتها على عنواني

فى امريكا و شحنهم و تجهيزهم سريع جدا اسرع شركة اتعاملت معها الى الان .

التغليف : يناسو على التغليف يجنن مرة حبيت التغليف الخارجي ,كيوت مرة و الخط و الالوان حلوة

و اتوقعت انو راح يتوسخ اكثر من جودي باليت لكن لا بالعكس ابدا ما اتوسخ كانها جديدة

بس عشان اكون صريحة معاكم الباليت دي ما استخدمها كثير زي جودي باليت ممكن عشان كده !

وصلتني نفس وقت جودي باليت انا اشتريتهم مع بعض من BH cosmetics  سعرها 19.95

بس انا اخدتها ب 8 دولار و الان سعرها بالتخفيض 6.95 دولار

حجمها قد الكف تقريبا كمان هيا (travel friendly ) و تتفتح و تتقفل بالمغناطيس زي سابقتها

لما تفتحيها فيها مراية على شكل قلب 



حبيت انها اضفت بلشر و هايلايت و برونزر بالاضافة الى 8 شدوهات 

حتكلم اول حاجة عن الهايلايت و البرونزر , انا اول ريفيو للباليت  شفتو كان من سام (سمينثا)

ومرة حبت البرونز و الهايلايت

و بما انو عجبها قلت اكيد ماراح يعجبنى لانو هيا لون بشرتها جدا فاتح و خلاص شيلت يدي منو

 اكيد ماراح يجي على الحنطيات مدام ناسب سام

و هيا كمان (سمانثا) قالت انو الشئ الوحيد اللى عجبها او اكثر شئ عجبها فى الباليت

و نجي للصدمة ابدا ابدا ما توقعت و لا للحظة انو راح يعجبنى و يناسبنى بس OMG  حبيـــــــتو مرة

من احسن البرونزات اللى جربتها جدا طالع لونه طبيعي, و الهايلايت حكاية تانية لما احطو من جدا

كانها لمعة طبيعية ما اعرف اوصفها جدا جدا حلو ما اتوقعت الصراحة

لكن لو بشرتك غامقة اتوقع انو ماراح يناسبك البرونز للاسف و اذا كنتي بيضاء انتبهى

و انتي تحطي لانو من طبقة وحدة راح يكون مرة كثيرة بنسبالى انا حطيت 3 طبقات تقريبا

لكن السلبية الوحيدة اللى فى انو مو على مقاس فرشة البرونز او الكنتور , صغير جدا

لو كانت فرشتك من عادية لكبيرة راح تظطري تكمشي الفرشة عشان تستخدمي البرونز او الهايلات

البلشر : عادي الصراحة فى احلى لكن مو سئ هوا لونو زي باربي بنك

لكن فى الحقيقة ما يطلع كده يطلع على اغمق شوية يعني حلو



نجي للشدوهات للاسف فى السواتشز ما يطلع اللون زي الناس على عكس الحقيقة لما تستخدمي

تحسي يطلع لون اكثر معاكي

و اكثر شي يبان فى السواتشز اللون التركواز و للاسف التركواز و الازرق ابدا لما استخدمتها ما طلع 

معايا سئ الصراحة

انصحك تستخدمي معا برايمر او بخاخ ماك او شوية موية عشان يبان و يطلع اللون معاكي

و اذا كان لونك من حنطي الى غامق افضل انو تحطي بعد البرايمر شدو ابيض او شدو كريمي اسود

و بعدها ابدئي فى الشدو , راح يبان اللون معاكي جدا و اضح

احس هارت اختارت الالوان اللي هيا تحبها مو شرط تعجب الكل او تناسب الكل

عن نفسي حبيت شدوهات الصف الثاني و اول شدو على اليسار 

ومن سلبيات الباليت انو كمان مافيها او عليها اسماء

لكن بغض النظر عن سلبيات البالتين جودي و هارت تعتبر اسعارها جدا مغرية 



الباليت (هارت باليت ) مرة تنفع للبنات المتوسط او الثانوي و ممكن الجامعة

و مرة حلو الصراحة لو تهدية لبنوته دوبها داخله عالم المكياج بنتك او اختك او صحبتك راح تعجبها

صدقينى ! فيها الاساسيات و بسيطة و الالوان تناسب اعمارهم

و فى النهاية هذا بس راي الشخصي يعنى اذا ما حبيت حاجة مو معناها ماراح تحبيها  بالعكس

دوري ( ابحثي ) عن كم ريفيو او راي عشان تحكمي و كمان دوري ( ابحثي ) عن ناس نفس لون بشرتك

و نفس الاندر تون تبعك

هنا اسيبكم مع السواتشيز و اللوك من هارت نفسها 




واخير خليكم قريب ان شاء لله لتدوينة جاية 


SHARE:

ليست هناك تعليقات

إرسال تعليق

Blogger Template Created by pipdig