الأربعاء، 22 أكتوبر 2014

bliss fabulips pout-o-matic lip-perfecting system


ياخي اصعب شئ فى التدوين بداية اي بوست

كدا يكون عندك معلومات لليل بس ما تعرفي كيف تبديها

يعنى لو كان عقلي ورقة و قسمنا البوست 3 اجزاء

راح تلاقى البداية استفهام و النص مليان و النهاية سهلة

معايا انتو !

عارفة عارفة  فاهمين انتو ... بس ماعليكم منى خرابيط قبل التدوين (⌒_⌒;)

خلونا نبدا البوست

السلام عليكم بنات ... كيفكم و ايش اخباركم ! وكيفكم مع الدوامات

 بوست اليوم راح اتكلم عن 

bliss fabulips pout-o-matic lip-perfecting system

يامطول الاسم (-‸ლ) !!!!



هو عبارة عن جهاز بسيط خاص لتقشير الشفايف , انا الصراحة اسميه كلارسونيك الشفايف 


ايش قصة الجهاز معايا و ليش اخدته ؟

فى البداية اول ريفيو شوفتو على الجهاز من وحدة اجنبية برفشنل فى البيوتى

بعد دا الريفيو حطيت المنتج او الجهاز فى لستتي , الحاجات اللى لازم اجربها

لكن للاسف ما فى ريفيوهات كتير عن المنتج ! حسيت فى آن فى الموضوع

شكيت !  هل اخده او لا خفت انو الريفيو اللى شفتو يكون بس دعاية للمنتج

بعدها بفترة وصل المنتج لجودي قبل لا تجيب كيرا و ميا

استخدمتو لما كانت حامل بتؤام و كانت مسكينة مرة شفايفها متشققة مع الحمل

بعدها بيوم لاحظت "انا "تغير واضح فى شفايفها

صح ما علاجها من المشكلة كاملة لكن باين فى تحسن طفيف فيها

هنا قلت يابت اتوكلى و اشتري وجربي حظك

(  مع انى لا اؤمن فى الحظ (◡‿◡✿)  بس عشان نكون على بينة ياجماعة اؤمن فى النصيب )

المهم !

طيب خلوني قبل لا اقول راي نبدا فى ايش اللى المفروض نتوقعه من المنتج ؟!

الشركة تقول انو المفروض راح تشوفى شفايف ناعمة , صحية , جميلة و مستوية السطح

و راح  يخلى الروج يطلع احلا من اول ! الفرشة تدور 450 مرة فى الدقيقة

كمان الشركة تقول انو 93%  من الناس اللى استخدموها لاحظو شفايف اجمل و صحية اكثر

90%  لاحظو تورد و نعومة الشفايف

90%  شافو انو الجهاز خلا القشور اللى على السطح تختفى و مرطبة اكثر

طيب المنتج هو عبارة عن جهاز نحيف بطول الكف يشتغل ببطارية تجي مع البكج 

و فرشتين وحدة منهم مجانية و مقشر 



 طيب نجي للمقشر و مكوناته و محظورته !

المقشر من اكثر المنتجات مبيعاً للبراند , كتير شوفت ريفيوهات و كتير ناس نصحو فيه

و لما شفتو مع الجهاز حمسنى اكثر 

قلت مست هاف must have ! يعنى حاجة لازم اقتنيها او اشتريها 

المقشر البيس تبعو او القاعدة تبعتو زيت جوز الهند فدا الشئ حلو لانو راح يرطب شفايفك اكثر

كمان يتكون من فيتامين أ و هـ و سي و دا الشئ راح يساعد على تغذية و تنظيف او تطهير الشفايف

زيت الهوهوبا   و الكاكاو + زبدة الشيا  وتعمل دي المواد او المكونات على ترطيب الشفايف 

و اتوقع مسحوق او بودرة جوز الهند اللى يعمل على تقشير الشفايف

السكراب او المقشر فى حبيبات صغيرة هى اللى تقشر و طعمة بالفانيلا و الصراحة طعم 

ما اعرف اذا كان صالح للاكل ,  ياخي مادري لا تسألونى بس جربته و هو على شفايفى !

السكراب تقدري تشتري لوحده ,  و التحذيرات انو اللى عندهم حساسية لجوز الهند يبتعدو عنه  



نجي للراس , الراس هنا هو السر فى كل المنتج  لانو مصنوع من مادة زي المطاط 

لانو يعطي قوة للتقشير و فى نفس الوقت لطيف على الشفايف

لاحظتو كيف على الراس حبيبات بارزة 

تساعد اكثر على التقشير  ( حاولت كثير عشان ابين الحبيبات اكثر لكن هذا اكثر شئ قدرت اوصله ) 

المعذرة !

بعد ما تخلصي الرؤوس يمديكي تشتريها من الموقع اتوقع 5 او 6 منها ب 10 دولار 



نجي اخيرآ لراي الشخصي و طريقة استخدمه ؟

طريقة الاستخدام بسيطة تاخدي طبقة قليلة من المقشر و تدهنى على شفايفك

و تبدئي تفرشي شفايفك لمدة 30 ثانية فقط

طيب اول شئ اللى يعرفنى راح يعرف قد ايش انا احب اي حاجة مختصة للشفايف

عشان كده كنت مهتمة اخذ الجهاز

ثانياً المقشر لوحده ابدا مالو داعي , الجهاز سهل و سريع الاستخدام جدا

حتى يمديكي تستخدمى وانتى بفل ميك اب ماراح يعملك فوضى!

و فعلن المنتج يقشر و ينعم الشفايف من اول استعمال حبيته جدا

و انصح الكل في وخصوصا للمتزوجات (لله يرزق الجميع )

ممتاز لكل اللي عندهم الشتاء جاف !

الاحساس فى البداية غريب لانو ما اتعودنا على حاجة زيها من قبل

 اواجه صعوبة شوية  فى اجناب او اطراف الشفايف مع الجهاز

لكن دا شئ طبيعى لانها اسخف من باقى الشفة

و اكيد راح يجي في بالك طيب عادي استخدم مقشر انا اعملو فى البيت ليش الجهاز ؟ 

نعم الجهاز مو ضرورة في الحياة لكن انا  اعترف اني حبيتو ! و الجهاز يعتبر زي المكافأة او لرفاهية

 و اتوقع لو كان ارخص كان سار حاجة مست هاف must have

شوفو انا انصح بالكل سواء المقشر اللى تعملى فى البيت او الجهاز

و كل شئ يرجع على حسب  رغبتك و اهتمامك لكن اكيد الجهاز اقوي 

و الشئ الحلو كمان اتوقع انو الجهاز يمديكي تستخدمى مع اي مقشر سواء اللى تعملى فى البيت

او انك تشتري مقشر شفايف من اي براند تانية , يعنى منتى خسرانة !

لاحظت كثير يستخدمو و يستبدلو الجهاز بفرشة اسنان او كلارسونك على الشفايف او العيون 

ياجماعة خطاء بشرة الوجة غير عن الشفايف , الشفايف تحتاج حاجة انعم  

الشفايف بعد استخدام الجهاز تحتاج  مرطب على عكس البيتي او المقشر اللى تعملى فى البيت

لا ، يحتاج لمرطب طول اليوم مو عشان الجهاز يسبب جفاف او عدم ارتياح ، لا

بس زي لما تعملي تقشير لبشرتك راح ترتاحي اكثر لو رطبتيها

بعد الاستخدام المنتظم للمنتج قلت عندي التشققات او الجفاف

هوا الجهاز ما راح يخفى التشققات للابد لا بس يعالجها لزمن معين

عادي زي الكلارسونك ما تستخدميها مرة وحدة وخلاص, لا تسير حاجة دوريه

تستخدميها من فترة للثانية او روتنيه

 و فى ناس تستخدمه بشكل يومي او كل يومين او اسبوعي و ناس كل ما احتاجت

 عن نفسي استخدمها كل يومين او كل اسبوع  والصراحة ما احس انى احتاج تقشير يومي

لانه فعلن يقشر

  الشفايف تحتاج عناية خاصة سواء كانت مقشر بيتي او دا الجهاز

عن نفسي حبيت اخده عشان يسهلى المهمة

و اذا كنتي حاسة المرطب ماينفع معاكي او نتيجته مو قوية هذا عشان شفايفك محتاجة لتقشير

لسطحها عشان المواد تدخل افضل و تفرق النتيجة معاكي 

ومن الحاجات اللى ما حبيتها انو الراس او الفرشة المطاطية يجي من غير حاجة

عشان احفظها نظيفة فى مكان معين و كمان الصراحة ما شفت أي تغير في لون الشفايف

اخير المنتج عجبنى و يستاهل كل قرش دفعته فى

بنسبة للسعر و من فين اخدته ؟

الجهاز من bliss سعره 48 دولار يعنى يعادل تقريبا 200 ريال او 180 حاجة زي كده

و اخدته من beauty.com

الصراحة اول مرة اشتري من bliss و ان شاء لله ما تكون اخر مرة ، عندهم حاجات حلوة .

و كده خلاص خلصنا الريفيو و البوست ان شاء لله افدتكم و عجبكم البوست 

شكرا لكم على حسن المتابعة 

و خليكم قريب لبوست قريب ان شاء لله 



SHARE:

ليست هناك تعليقات

إرسال تعليق

Blogger Template Created by pipdig