الاثنين، 27 أكتوبر 2014

طريقة ترتيب طاولة القهوة



السلام عليكم

و كل سنة و انتو طيبين على حلول السنة الجديدة 1436هـ

اللهم اجعلها سنة خير علينا

و اجعلها تحمل لنا كل ما نحب و تحفظلنا فيها كل من نحب 

اللهم امين 

احس نفسي اشتقت اكتب فى قسم Home Decor

 انا اعشق اي حاجة لها ارتباط بالمنزل و ديكورته , من ما يحب ؟! صح 

و بما انو احب  اغير حاجات فى بيتى بين الفنية و الاخري 

فقلت ليش ما اكتب عن طرق بسيطة نقدر منها نغير و نجدد من بيوتنا او حتى غرفنا 

و من اسهل و ابسط واسرع الطرق هي تجديد طاولة القهوة 



الصراحة بعد ما خلصت بيتى دورت كثير عن الاساليب الصحيحة عشان ارتب طاولة القهوة 

عارفينى انا احب ادور على الاساليب الصحيحة قبل لا ادور على افكار و استوحائات 

" طلعت عيونى على اخر كلمة هل المفروض اقول استوحائات او استيحائات ؟؟؟

 او كلـــها زي بعـــض ؟ اســـتوحائات = استيــــحائات

حـــــوسة ســـارت من بحــث فى قــوقل لمـــناقشات جــادة لــكل للي فى البيت 

ولا وفـــجاء بقــــدرت قادر تتحـــول معـــايــــا لكـــــلمة اســـــــتحياء !!!

 اتـــوقع عنــــدي خــلــل فى نــطــق !!!!  لازم اخـــذ كــورس لغـة عــربية "

المهــــم نرجع لمـــوضوعنا الاســـــاسي



 طــــاولة القــــهوة مــن اسهـــل الطـــرق عشـــان نـــــعمل تغـــير فى الصــــالة

و ممكن من خلال هذا التغير نعمل focal point  يعنى نقطة تركيز فى الغرفة 

 ( لمعلومات اكثر عن نقطة التركيز ....  اول حاجة كل غرفة لازم يكون فيها نقطة تركيز

 طيب ايش يعنى نقطة تركيز ؟ نقطة التركيز هي اول ما تشوفى فى الغرفة او اكثر شي مميز فىالغرفة

 او العنصر اللى انتي تبغى الناس يشوفو فى الغرفة و ينتبهولو 

اذا كنتو حابين تعرفو اكثر عن دا الموضوع اكتبولى فى الكومنت عشان اعمل بوست خاص في ؟ )

و من اكثر الاغراض المستخدمة لترتيب طاولة القهوة الصينية " التبسي" Tray 



ليش الصينية من اكثر و اسرع الاغراض المستخدمة فى ترتيب الطاولة ؟

اولا فى انواع و اشكال و ستايلات كثير للصوانى تقدري تستخدميها 

و دا غير كثرت وظائف الصينية من تخزين حاجات مهمه عليها الريموت مثلا

 او لما تكوني مستعجلة لفسح مكان اكثر فى الطاولة 

فما عليكي الا انك تشيلى الصينية بترتيب من غير فوضي

 بس فى هنا كم نقطة لازم تحطيها فى اعتبارك لما تبدئي ترتيب الطاولة بصينية 

اختيار الصينية :. 


سواء كنتي راح تشتري صينية جديدة او تستخدمي وحدة متوفرة عندك

لازم اول حاجة تهتمي بوظائف الصينية و حجمها قبل ستايلها و تصميمها

 يعنى تفكري ايش راح تحطي فيها ؟ تبغي مكان للشموع ؟ ابغا مكان لمزهرية 

ابغاها تكفى لكوبين قهوة ؟ ممكن احط فيها مجلات , كتب , ريموت ؟!

 يعنى بأختصار ايش وظيفة الصينية ؟!

 ثانيا حجمها ... 

كمان لازم تنتبهى لحجم الصينة ما نبغها تطلع صغيرة على الطاولة او كبيرة

 دوري على المقاس الصح لطاولتك ... 

لاحظي انو طاولة القهوة اللى كلها مرايات راح تكون انسب طاولة للصينية

 لانو الطاولة اللى بمرايات عادة ُ تتلطخ بسهولة بالبصمات و الاكواب و غيرها

 فاراح يكون حل مريح ليكي 

كمان طاولات القهوة اللي تكون على الطراز العثمانى ottoman

 راح تكون الصينية حل مناسب لها

زي الصورتين اللى تحت




 خلاص بعد ما عرفنا و ظائف الصينية و حجمها نقدر دحين نختار الستايل و التصميم

كثـــير ناس يغلطو و يختارو الستايل قبل الوظائف و الحجم و لما يرجعو للطاولة يتورطو !

هـــنا لازم تعرفي ايش ستايل الغــرفة و تبدعى فى الصــينية , كمان تصـــــميم الصينية

مو شرط صينية دائرية تتحط على طاولة دائرية

ممكن تلعبي استخدمي صينية دائرية على طاولة مستطيلة او مربعة او العكس يعنى العبي

و جــــــربــي !

كـــمان لازم تعـــرفى كيــف تخفى و تظـــهري عيــــوب و مميزات عنـــاصر الغـــرفة

يعنــى اذا كانـت الطــاولة اللى على طـــراز عثــمانى قــماشها حلــو

استخــــــدمى صينــــية زجــــاج عشـــــان ما تغطـــي القمـــــاش

و كمان من الحاجات الحلوة انك تلعبى فى الالوان بس يكون متمشي مع الوان الغرفة

يعني كل غرفة حلو يكون فيها pop color  يعنى لون بارز فممكن تخلى الصينية  هى اللون البارز 

و كمان تلعبي فى المتـــريل او المـــواد اللي مصنوعة منها الصيـــنية

يعنى حديد ,خشب زجاج .. الخ 

(معلومة صغيرة لازم تتوفر فى الغرفة كل انواع المتيريل

مو مهم لو كانت صغيرة او كبيرة  المهم انو لازم تتوفر فى الغرفة

و ممــــكن تطبـــقى القـــاعـــدة دي من خـــلال الصيــــنية )

طيب نجي دحين لي اخر حاجة ايش ممكن تحطي على الصينية ؟













عشان ترتبي طاولة القهوة زي البرفشنل لازم تتوفر دي الحاجات على الصينية

و اكيد ممكن تزيدى من عندك 

 عنصر طبيعي زي الورود و النباتات تكون فى فازة او مزهرية

 شموع او حوامل شموع كتب او مجلات ... و حلو تختاري الكتب اللى اغلفتها حلوة 

لانو زيادة الخير خيرين

 قطعة ديكورية , يكون حاجة زي التمثال او مجسم حلو صدفة مثلاُصندوق بشكل حلو 







  في قاعدة حلوة اتعلمتها قبل فترة و هي انك تقسكي الصينية ل ٤ اجزاء



وبعدها فكري ايش ممكن تعبئ هذي الاجزاء

 لكن افتكري انها لازم تكون يا اما حاجة تحتاجيها او تحبيها

 كمان لازم تنتبهي للارتفاع و تجانس الالون .


اخيـــــــــــرا حابة اقولك انو ترتيب طاولة القهوة تماما زي اي تصميم في بيتك

يعنى زي ما تهتمي فى تزين و ترتيب مدخل بيتك او طاولة الطعام لازم تهتمي اكثر بطاولة القهوة

 يعنى لازم تنتبهي لتفاصيل اكثر  فلا تستعجلي هذه العملية

و ابحثي على القطع اللى انتى تحبيها حاولى تختاري كتب راح تقريها مرارا وتكرارا

وشموع تشعليها  ليلة بعد ليلة

و خلصنا شكرا على وقتكم و اتمني انو افدتكم بالمعلومات زي انا استفدت منها 

و خليكم قريب لبوست قريب ان شاء لله 



SHARE:

ليست هناك تعليقات

إرسال تعليق

Blogger Template Created by pipdig