الجمعة، 10 أكتوبر 2014

September favorites 2014 مفضلات شهر سبتمبر


السلام عليكم بنات ...

وكل سنة وانتو طيبين !

ينعاد علينا و عليكم و احنا و من نحب بصحة وعافية  يارب

زي منتو شايفين البوست من عنوانه  تراااا

مفضلات الشهر ...

اخير و لي اول مرة  راح اعمل مفضلاتي الشهرية  يأأأأأي

ما اعرف ليش فرحانه ؟  بس معليش عدوها !!!!

ما اعرف بس احس حاجة جديدة على مدونتي 

لكن فعلن فى منتجات لدا الشهر حبيت تجربتي معاها

و حسيت انى استخدمها بكثرة فى الشهر اللي فات او بالاصح الشهرين اللي فاتت


و كمان راح تلاحظو انو فى فرق فى اماكن التصوير لانو واحد فى بيتى

و التانى فى بيت ابويا فى مكة عند اخواتى و بالاخص غرفة اختى



البوست دا ما راح يكون بس عن البيوتي راح يشمل تقريبا كل حاجة حبيتها لشهر سبتمبر ...

خلونا نبدا البوست 



SLEEP body cream in Lavender Chamomile

انا اخدت المجموعة الكاملة منها و راح اتكلملكم عن المجموعة كاملة ان شاء لله في بوست كامل

اول  ما اخلصها لكن اليوم راح اتكلم عن كريم  المجموعة بس !

هوا كريم بالافندر  و البابونج من B&BW المفروض انو تساعدك على النوم , حبيت ريحته كدا

فى البداية اول ما تفتحي تحسي كأنه عطر رجالى

لكن بعدها على طول راح تحسي باللافندر, الريحة جدا ماهي قوية خفيفة

لكن مو خفيفة لدرجة ثوانى و تختفي

لا الريحة جيدة الصراحة  و زوجي حبها ! و لعلمكم مو أي ريحة تعجبه عليا او يعلق عليها

كنت استخدم الكريم قبل لا انام يوميا , الكريم سهل المزج و خفيف و ما يدبق على الجسم

يعنى اذا كنتي تبغى كريم خفيف و سهل المزج و بسرعة ينشف مثل لبعد جلسة رياضية

انصحك فيه  !

 اذا كنتى كمان من محبات اللافندر

انا قبل لا استخدمه كنت استخدم زبدة لجسمي , عشان كده حسيت بالفرق فى المزج و سهولته

  و كمان اعطانى ملمس جدا ناعم لجسمي فى كل صباح

اخيرا افكر اني اخد منه حجم السفر , لانه فعلن حلو لما تدهنى بعد يوم طويل من التعب 



Moisturizers - Kiehl's - Ultra Facial Cream

دا الكريم اخدته عينه هدية ( sample ) من السوق الحرة فى مطار دبي الدولى

مع كم منتج اخدته من Kieh's

اول حاجة حبيتها و لاحظتها فى الكريم انو ابدا ما طلعلى حبوب

و اذا كنتو تعرفوني راح تعرفو قد ايش بشرتي جدا حساسة للحبوب

لكن دا الكريم ما عملي أي مشاكل و يعطي بشرتي ملمس جدا ناعم و رطب لفترة طويلة

  وهذا مع انو انا بشرتي مختلطة خصوصا فى التي زون 

و كمان كنت استخدم كمية بسيطة جدا منه

كنت استخدمه قبل لا انام او اول ما اصحي اذا ما كان عندي روتين معين استخدمو فى وقتها

و اكيد ان شاء لله راح اشتري الحجم الكبير منو

لكن عشان اكون صريحة فى ناس اشتكو من سعره

و انو عملهم حبوب لكن عن نفسي ابدا ما حسيت الحمد لله 



benefit cosmetics that gal brightening face primer

كمان دا البرايمر اخدته عينة لكن من سفورا مكة

اللى لاحظته انو عبوة العينة تختلف اختلاف كبير عن العبوة الاصلية للمنتج

اللي حبته فى انو تحسي مصحح على برايمر على مرطب

احب استخدمة كخطوة وحدة بدل الثلاث الخطوات السابقة

انا بشرتى دهنية مختلطة فلما اتمكيج لازم بين الفترة والتانية اعمل رتوش للميك اب

خصوصا لتي زون ( المنطقة الدهنية ) ما حسيت انو يمنع بشرتى تدهن

فممكن راح تزعجك المشكلة دي

مع انه المنتج للبشرة المختلطة و كمان اذا كنتى تحبي البرايمر يعطيكي السلكي لوك

او ( البشرة الصافية تقريبا ) زي البروفشنل لا ماراح يعجبك

عارفة ذكرتلكم السلبيات فكيف حبيته ؟

انا حبيت استخدامو لما احط ميك اب خفيف لبتي و ما عندي مانع انو تدهن التى زون

لانو اول انا لازم اعمل رتوش و ثانيا و الاهم انو الى الان ما لقيت منتج يساعد لحل دي المشكلة

 فلو عندكم شاركونى بليز

حبيت ترطيبه جدا 



VLCC Liquorice & Fenugreek Natural Fairness Face Mask

دا المنتج من المنتجات اللى راح تنزل على الانستقرام فى هاشتاق PicTakeAndTry

اللى متابعيني فى الانستقرام راح يفهمو ايش اقصد

فاذا ماكنتي متابعتني لا تنسى انك تعملي فولو

ودا الشئ مرة راح يفرحنى طبعا اذا كنتي تبغى

فماراح اتكلم بشكل مفصل عنه , بس راح اقول انه من مفضلات الشهر

و جدا حبيت استخدمة مع مقشر

VLCC Pineapple & Papaya Gentle Exfoliating Scrub 



بعدها راح اتكلم عن دا العطر الرجالى من دبي مول اسمو خاص او has

مرة حبيت ريحتها على زوجي مع انو انا ما احب العودة كتير او مو أي عودة تعجبنى

دا العطر عبارة عودة مخلطة لكن اول ما تشميها تحسيها مس ديور على كوكو شانيل

بعدها راح توصللك ريحة العودة 


 


Lip Gloss The Body Shop born lippy strawberry

من اول المرطبات اللى استخدمتها احب استخدمة كمرطب و كلون لما اكون فى البيت

او اول ما اصحي من النوم    

 

 

هوا جدا عادي , لكن انا حبيتها و لاحظت اخواتى لما استخدمة يلاحظو فرق فى لون الشفايف

لكن انا ما لاحظت ما احس انه يرطب الشفايف كويس

عشان كده اذا تبغى كمرطب فى احسن منه , ريحتها حلوة

 و حبيت البكاجنق او التغليف تبعه و اتوقع انو اتغير التغليف حاليا 


bliss fabulips pout-o-matic lip-perfecting system

حبيت دا المقشر للشفايف ما راح اتكلم عنه كثير

لانو مجهزة بوست عنه على الاسبوع الجاي ان شاء لله

لكن اقدر اقولكم انه من مفضلات الشهر و خليكم قريب عشان تقروا بوست كامل عنه 



كده خلصنا من سكشن او قسم البيوتي راح ادخل على الايكسسوارات

دا الشهر احس نفسي طايحة على اللؤلؤ و كمان اتوقع انو طالع دي الفترة

 اخدت الايرنق من اللدو

للاسف ما اتذكر كم كان سعر لكن مرة حبيته ينفع لصباح و للمساء مرة حبيتها 



و بعدها دي النكلسيز اخدتها من كشك فى مكة مول

اللى اعملو انو البسها الاثنين مع بعض بس من نفس القفل اطول و حدة و اقصر التانية

كل من شافها حبها ناعمة جدا و مرة كيوت

و على فكرة حجمها صغير يعنى من بعيد تبان كانها فص دايمند او حاجة تلمع مرة حبيتها 



دحين ندخل على الاكل و الافلام و الكتب

الشهر دا امكن استهلكت كرتون كامل من القهوتين دي

ال3فى1 و العربي سارت ادمان عجيب 



وكمان سعراتهم حلوة العربي اتوقع 9 سعر حراري

و 3فى1 97 شئ زي كده اهم حاجة انو ما تتعدى 100   

القهوة العربي انا فى نفس الدلة اضيف شوية هيل و زعفران و حبة بسيطة بن 

 


اكثر مسلسلين شدنى لشهر سبتمبر و سار ادمان

اول واحد هبة رجل الغراب

يالله يجنن حبيته مرة يجي على OSN  قناة ياهلا شباب اتوقع ما اعرف و لله

لانو انا اشوفها على الدايموند

لكن جدا حلو و خسارة الكل يقولى الجزء الاول احلا بكثير بس انا ما شفتوه

للي ما تعرفوه هو مسلسل كوميدي مصري مقتبس من مسلسل امريكي (اقلي بيتي )

عن بنت مالها فى عالم الفاشن و بالعكس تعتبر مرة وحشة و وحشتها دي عملتلها مشاكل كتيرة

فى الوظائف و من حظها اشتغلت فى شركة خاصة للفاشن و قصص طويلة عريضة راح تواجهها

 لكن جدا حلوة 



و المسلسل التاني هو

How to Get Away with Murder

هو مسلسل امريكي جديد جدا دوبو مالو اسبوعين بادي

و يتعرض على OSN  فى نفس وقت العرض الامريكي

مسلسل دراما و جريمة و غموض فلو كنتي من محبين دي النوعية انصحك تتابعي

 فكرته مرة حلوة



و اخيرا لافضل كتاب لشهر سبتمبر

ما راح اشرح عنها كثير غير انو لازم تكون عندك المعلومات المتوفرة فى الكتاب و ماراح تندمي

لن اكون عبدا لراتب ل غرم الله بن عبد الله الغامدي




ان شاء لله عجبكم البوست و عجبتكم مفضلاتي الشهرية

  و صراحة استمتعت فيها لكن ما اعرف اذا كنت راح اعملها شهرية او لا لكن راح احاول 

شكرا لكم على القراءة و متابعة الموضوع

خليكم قريب لبوست جديد ان شاء لله 


SHARE:

ليست هناك تعليقات

إرسال تعليق

Blogger Template Created by pipdig