الخميس، 5 فبراير 2015

what I'm really into in 2015


السلام عليكم بنات 

كيفكم و كيف احوالكم ؟

بوست اليوم ابغا اتكلم عن تريندز (صيحات) الموضة

بين قوسين (اللى عجبتني)  ل ٢٠١٤ - ٢٠١٥ 

احس  بوست افضل الازياء الشائعة (trends) فى عام 2013

 كان من اكثر البوستات زيارة على المدونة 

في كم قطعة منها دارجة الى الان ،،،

عشان كدة قلت راح اعملها دي السنة كمان لكن راح اذكر التريندز اللى انا حبيتها 

نقول بسم لله 


 

 pencil skirt

ال pencil skirt دارجة الى الان و ما اتوقع راح تخلص موضتها خصوصا لو كانت قطعتك كلاسك

و بقيمة كويسة 

لكن اللى دارج الان و بكثرة  denim pencil skirt ( الجينز)

مرة حبتها الصراحة و راح تنفعك فى اغلب المواسم و المناسبات .




Wide pants

البناطيل العريضة الفترة الاخيرة كمان دارجة خصوصا ال Culottes

اللى هو البنطال العريض اللي يصل للركبة ومن اهم القواعد للبس البنطلون العريض

انك تختاري المقاس الصح ، و مناسب جدا للقصيرات لانو يعطي طول للجسم

و كمان انصح في لكل البنات اللى جزءهم العلوي اكبر من السفلي

لانو يعطي حجم للجزء السفلي بتالي راح يسير في توازن بين الجزئين 



audrey hepburn pants style

(Cropped Trousers)

من احلى البنطلونات اللي تطلع حلوة على اللبس خصوصا الاسود لازم يكون عندك و احد 




 Lather Moto Jacket 

اللي هيا جكيتات الجلد القصيرة اللي يوقف طولها عند طول السرة او اطول شوية

عادة يلبسوها سائقو الموتو سايكل ( الدبابات ) عشان كده اسمها موتو جاكيت

مو شرط تاخدي اسود في كثير الالوان بس لو كونتي حابه لوك الموتو اكثر (لوك سائقين الدباب)

الاسود راح يبرز اكثر اللوك

وصدقيني لو اخدتي قطعة عليها القيمة راح تجلسلك و تورثيها لبناتك




Army OR Como Jacket 

من غير مبالغة انا حاليا مجنونة بدا اللوك العسكري خصوصا ال Como

اللي هو الجكيت اللي في نفس االصورة اللي فوق 

ما اعرف كيف حبيتها ؟ لاني و بكل مصداقية اي حاجة له علاقة بدا الوك اكرهها

 ابدا لا يمكن البس حاجة زي كدا 

لكن سبحان مغير الاحوال !




bomber jacket

هي جكيتات في الاصل مستوحاة من  لبس الطيار الحربي فى الحرب العالمية 

اذا حبيتي الجاكيت دي الجكيتات كلها من H&M 



Mom Jeans 

اخ اخير و ليس اخر في قطع الملابس المام جينز ( جينزامك ) 

السنة اللي فاتت و اللي قبلها كان ال البوي فريندز جينز و الي الان انا حابتو و السنة دي المام جينز 

اخ يابنات حلو حلو جدا خصوصا لو عرفتي تلبقي آخ آخ كم انا حابتو 

الصراحة ما اقدر اقول غير حلو ( و نقطة علي السطر ) .



 نجي للالوان لدي السنة اولهم ال البني المحمر 

ودا اللون حلو لكل شي من ملابس لمكياج للشنط و شوزات الله يعزكم ، للبيت حتى !



الوان الباستيل Pastel Colors

اذا كنتي حابة تعرفي اكثر عن الالوان و كيف تنسيقها دا الموضوع راح يفيدك

كيف تنسقي ألوان الباستيل في لبسك♥ Styling Pastel Colors

  وكمان من الالوان اللي حبتها البيبي بلو  اتوقع هو يعتبر من الباستيل لكن حبيت اذكرو لوحده

لانو فعلن حلو 



 كمان اللون الكحلي الغامق طالع من بداية الشتاء ( ولله تحسي لو هيبه ) 



نجي للاكسسوارت 



اللي تابعة مفضلاتي لشهر سبتمبر راح تكون عارفة قد ايش انا حابة اسلوب طبقات النكليسز

( السلاسل )

و ابشركم تطور الوضع الي ان  بدا يقلب علي هيبيز

بس جد ! فعلن انا حابة دا الاسلوب و ممكن كل وحدة تبتكر شكل خاص لنفسها




و كمان من النكلسيز لاحظت دي السنة كثير بدأو يتميزو في البرسنل نكليسيز

اللي هيا السلاسل الي فيها شي منك سواء اسمك، حرفك ،مدينتك،

جملتك كلمتك الخ اي حاجة تخصك !



كمان من الحاجات اللي حابتها  arm candy


وحاليا يقولك القولد روز هو النيو قولد 

الذهبي الوردي حاليا هو الذهبي الجديد او باختصار الذهبي اللي على روز طالع

و مغطي على الذهبي 



The Minaudiere

الي هيا زي الكلاتش لكنها مصنوعة من مواد اصلب ، لها اشكال كثيرة لدرجة الحيرة

كنا نشوفها بس في المناسبات الكبيرة لكن حاليا في كل مكان اشوفها ! 




نجي للجزء الاخير و هو الشوز >>> الله يعزكم 

صحيح ال hunter boots ابد ما يمشي مع جونا لكن ولله ياجماعة حابته

مادري احس انه اكوت شي في الدنيا 

لكن على العموم اللي عندها حديقة تزرع فيها لها الاحقية تشتري >> زي اختكم 


Anckel cuff shoes 

كمان من الحاجات اللي جدا حلوة و ماراح تصدقو لو قلتلكم ماعندي ولا وحدة منها

لكن ان شاء لله فى ال wish list ،،، فيها  اناقة مش طبيعية



cut out boots

بالله ايش رايكم في البوت ؟ جنان صح؟! لازم اشتري منه ان شاء لله 

البوت دا ممكن يكون هو الحاجة المميزة فى ال Outfit ... جدا حلو 

 

بكدا نكون خلاصنا البوست لمفضلاتي من صيحات ٢٠١٤ - ٢٠١٥ 

اذا كنتو حابين قطعة من المذكورة فوق شاركوني هيا و ابغا اسمع ارئكم ؟

و شكرا لكم علي حسن المتابعة و اشوفك في بوست جديد علي خير ان شاء


SHARE:

ليست هناك تعليقات

إرسال تعليق

Blogger Template Created by pipdig