الأحد، 15 مارس 2015

٥ نقاط ديكورية اساسية


السلام عليكم

كيفكم بنات ! ان شاء لله تكونو بخير

اليوم ابغا اتكلم عن كم نصيحة من مصممين الديكور 

لتحويل اي غرفة من ناحية التصميم و الترتيب من عادية لناجحة 

تقول Judith Taylor انو هما المصممين ماعندهم كتاب سري او قوانين سرية 

تخلي مشاريعهم و تصاميمهم ناجحه ! لكن في قواعد سهلة معروفة وراء كل مشروع ناجح

و من خلال هذة القواعد ممكن اي احد يحول اي غرفة او تصميم  لتصميم لناجح 


شوفو انا اعشق اي حاجة متعلقة بديكور و طريقة ترتيب البيت و تشدني المواضيع اللي زي كدهـ 

الموضوع دا ممكن يفيد اي وحدة زيي تبغا تعرف اساسيات التصميم الداخلي

و كمان راح يفيد ان شاء لله اي وحدة حابة تغير او تنقل لبيت جديد 

او اذا كنتي عموما تحبي تقري مواضيع من دا النوع ..... خليكي معايا !



اول نقطة اختيار لون الحائط 

كثير مننا اول ما يبدا في تغير الغرفة او تصميمها 

يبدا باختيار لون الجدار ، هي ممكن تكون طريقة ما هي غلط 

لكن الاصح و الاسهل انك تخلي اختيار لون الجدار اخر خطوة 

حتي لو انتي نقلتي لبيت جديد بنفس الاثاث القديم 

و ما تبغي تغير ! ليش ؟ 

لانو اللون يتغير من بيت لثاني و من الغرفة لثانية و دا بسبب

تغير ظروف الغرفة من حجم و اماكن دخول الشمس لها 

و الافضل انك بعد ما تشتري كل احتياجات الغرفة 

من اثاث و ديكورات و لوحات ، هنا تختاري اللون 

اذا نظرتي للموضوع من ناحية تانية، انتي سهل تغيري لون البوية

لكن صعب تغيري اثاثك و ديكورتها عشان البوية !




  اعطي مسافة كافية بين قطع الاثاث 

 

هذة قاعدة جدا مهمة في كثير ما يعطوها اهميتها 

لازم تتركي مسافة كافية بين قطع الاثاث

عشان يكون المرور سهلة بينهم 

و عشان ما تبان الغرفة مكتظة و مزحومة بالاثاث 

و دا الشي راح يبرز قطع الاثاث اكثر و اجمل

تخيلي لو الغرفة مكتظة بالاثاث زوارك راح يحتارو

يطالعو في ايش ؟

و القاعدة دي ممكن تكون خبر سعيد لاصحاب الغرف

الصغيرة او اصحاب الميزانية المحدودة ، ليش 

لانها تقولك اشتري قطع اقل بس تكون عليها القيمة

 

بتالي راح تخف ميزانتيك حبتين  



تعليق لوحات المنزل

اهم نقطة لما تجي تعلقي لوحة تختاري الارتفاع الصحيح 

لازم تكون نص اللوحة علي ارتفاع من  ٥٧ الي ٦٠ بوصة من الارض 

لانو  المستوي النظر الطبيعي للانسان ٥٧ بوصة ( الاغلب)

فلازم تعتمدي المسافة علي حسب نظر الانسان و ليس علي حساب طول الجدار

يعني اذا كان الجدار طويل اختاري لوحة اكبر مو ترفعي اللوحة اكثر و هكذا !

انتبهي للصورة كيف الجدار طويل لكن ما رفعنا اللوحة عن المستوي المطلوب  


ترتيب اماكن الاثاث فوق السجادة

في ثلاث طرق من خلالها ترتبي الاثاث فوق السجادة و كلها صحيحة

و علي حسب الغرفة و ذوقك

الكل على :. يعني تكون كل قطع الاثاث او اغلبها علي و داخل السجادة

و هذا يتطلب سجادة كبيرة

و غالبا غرفة اكبر و يجب ترك علي الاقل ١٢ -١٨ انش بين نهاية قطع الاثاث و حدود السجادة من كل 

الزوايا الاربعة للسجاد  ( يعني ترك مسافة فاضية بعد الاثاث او خلف الاثاث ان جاز التعبير ) 

هذا الشكل يوحي بشكل اكبر و اوسع للغرفة و افخم كمان !

الجزء الامامي علي :. يعني تكون الارجل الامامية فقط من قطعة الاثاث علي السجادة

و الارجل الخلفية تكون خارج السجادة 

الكل خارج :. يعني السجادة تتوسط المنطقة و ما يكون عليها و لا قطعة اثاث الا طاوله القهوة

و هذة الطريقة تنفع جدا للغرف الصغيرة 

لكن انتبهي تاخدي قطعة سجاد اصغر من اللازم دا الشي راح يبيخ شكل الغرفة

و كدا تحسي في شي غلط 

يعني لازم السجادة تكون كبيرة كفاية لتصل لحدود الاثاث الامامية

و صغيرة كفاية بحيث ما تتعدي الحدود الامامية للاثاث 

يعني علي القد بظبط 



معرفة نقطة التركيز

لازم تعرفي ايش هيا نقطة التركيز في كل غرفة (focal point )

و تركزي كل التركيز عليها و تحاولي تظهريها بكل الوسائل 

و من الوسائل دي الانارة ! 

يعني اول حاجة اختاري نقطة التركيز في الغرفة سواء شباك (نافذة )

لوحة ، تلفزيون ، برواز السرير ( headboard) 

جدار ، المدخنة المنزلية الخ اياً كان

( بنسبالي ما افضل تكون في غرفة اكثر من ٢-٣ نقاط تركيز عشان لا تشتت النظر ) 

و احب انها تكون وحدة

بعدها حاولي تلفتي الانتباه لها بالوسائل المتاحة عندك ! 

يعني مثل ركزي الاضاءة عليها او خلي الجلسة متوجه لها او حولينها الخ

 


 ايش نقطة التركيز في الصورة اللي  فوق ؟! 

كده انا خلصت بوست اليوم ، حبيت اخلي قصير و بسيط و سريع بحيث اللخص الحاجات المهمة 

فتقدري تراجعي و ترجعيلو بسهولة و سرعة 

و فنهاية هذة قواعد عامة و بسيط و سهلة الكل يقدر يطبقها 

احس المواضيع السهلة اللي زي كدة لازم تكون متوفرة للجميع 

و ان شاء لله شوية شوية ادخل في العميق 

و اخيرا شكرا لكم لحسن المتابعة و اي اقتراحات او اسئلة

تقدري تكتبيها في الكومنت تحت و انا في الخدمة 

و خليكم قريب لبوست قريب ان شاء لله 


SHARE:

هناك تعليقان (2)

Blogger Template Created by pipdig