الأربعاء، 18 مارس 2015

"Lusin", the Armenian cuisine


السلام عليكم 

اليوم راح اتكلم عن زيارتي و زوجي لي مطعم لوسين

في سينتريا مول (الرياض)

كانت الزيارة الويكند اللي فات ، الخميس 

المطعم ارمني ( Armenian cuisine ) 

من اكثر الحاجات اللي عجبتني في خدماتهم

انو تقدري تحجزي ام من خلال النت او التليفون 

كان حجزنا علي الساعة ١٠ مساء و قالولنا عندكم ل ١٠ وربع بعدها راح يتلغي الحجز 



طبعا مع زحمة الرياض وصلنا علي ١٠ و ربع و دقيقة ( علي التكا يعني الحمد لله ) 



بعد المينيو و بعد ما اخترنا اطباقنا 

جابولنا طبق ال Starters او Free Appetizer او complimentary اللي تقولو على 

المهم يعني طبق مجاني كبداية ، للاسف  ما صورت ما دري كيف راح عن بالي ؟ (^^)

هو عبارة عن جبنة او لبنة مع ثوم مفروم و عين الجمل خطيرة مرة الصراحة 

الصورة اخدتها من النت 



بعدها طلبنا شربة عدس من اول ملعقة فكرتني بشوربة عدس تركيا و خصوصا ازنجول

كانت كثيفة بس مو ثقيلة مرة يعني كثافتها مناسبة ، باين طعم العدس

و وصلت علي الطاولة بحرارة كويسة

يعني مو بارة و لا حارة تستنيها تبرد ، كانت معتدلة بحيث علي طول تشربيها

الخسة انا حطيتها (^^) فوق الشربة عشان الشكل ، ما اعرف ما زينو الشكل من فوق؟!

لكن برغم دا كانت الشربة ممتازة  كانت ب ٣٥ ريال 



و بعدها قدمولنا المقبلات كانت بطاطس حارة و سلطة فتوش 

سلطة الفتوش ما عليها كلام بظبط زي الفتوش اللي في اروما كافية  

و طبعا فتوش اروما لا يعلا عليه شي ! كانت ب ٣٠ ريال 





البطاطس الحارة الصراحة اتوقعت انها تكون احسن من كدا 

 يعني لانها تعتبر من الاصناف البسيطة السهلة

كانت كانها بطاطس عادية حبيت لو تكون احر من كده او عليها صلصة اكثر

يعني كانت للاسف اقل من عادية

الطبق كان ب ٣٠ ريال 


و ندخل دحين علي الاطباق الرئسية 

اول حاجة انا طلبت توشكا ارمنية و هي عبازة عن شرائح خبز محشية باللحم المفروم و الجبن 

الصراحة و اتاسف انو الصورة مو واضحة كثير لكن راح تعرفو ليش بعدين اخر البوست !

الطبق شكلو يوحي انه طبق من المقبلات ما كانو طبق رئيسي 

لكن امكن فعلن يعتبر من الاطباق الرئيسية الارمنية ، ما اعرف !؟

كان الطعم ممتاز حلو ، هما كاتبين المفروض يكون لحم مفروم حار ! ما حسيت في حرارة 

الطبق كان كويس عموما و كان سعره ٥٠ ريال 



شوفو الفخار الدائري اللي فوق هوا اللي اقولكم عليه ال Starters

الطبق الرئيسي الثاني كان هو سبب روحتنا و الحمد لله ما خيب املنا 

كان كباب بالكرز ، هو عبارة عن كبة مشوية بصلصة الكرز علي الطريقة الارمنية 

كان فعلن فعلن طعم ، كدة حاجة غريبة

تحسي بطعم الكرز و تحسي بطعم اللحم لكن ما يطلع حالي و لا مالح 

ما اعرف الصراحة حاجة غريبة تسير في الفم 

تفتكرو المشهد اللي في فيلم ratatouille لما يدمج نوعين من الطعام و تسير حفلة في فمه 

المشهد كان يمثلني لما ذقت الكباب بالكرز 



لكن لاحظت انو الطبق او الكباب كان قليل بنسبة للسعر 

السعر كان ١١٥ ريال و الطبق ما كان مزين بطريقة حلوة يعني تقديم و السلام !

لكن الطعم ما يختلف في اثنين ، و لازم تجربو الطبق اذا ما كانت زيارتكم اساسا عشانه 



نجي لي اخر طبق الحلي ، الصراحة ما كونت ابغا اطلب حلي لكن في اخر لحظة قررت 

و كنت محتارة اخد ايش و بصدفة طلبت ايس كريم بطعم الورد مع قطن البنات 

عن نفسي احب النكهتين 

و المفاجاة كانت انو كل الناس حوليني كانو يطلبو و طلع انو طبق مشهور في المطعم 

الايس كريم كان طعم و القطن كان يطلعلي من كل مكان كان علي بالي انو بس فوق الايس 

لكن اتوقع انو كمان كات تحت و بين الايس كريم 

و كانو  كمان حاطين فوقه فستق و كمان في كور بسكوت صغيرة 

طبق كان جدا ممتاز ، حتي زوجي ما يحب الحلا و خصوصا قطن البنات 

لكن حبه ! 



اخير نجي لتصميم المطعم و راي فيه 

المطعم تصميمه راقي جدا حلو و متعوب عليه الصراحة من احلي ديكورات المطاعم اللي رحتها 

لكن يعتبر صغير حبة، مقسوم نصين سمعت انه قسم عوائل و قسم افراد

بس الصراحة ما شوفت افراد !

كان كل القسمين عوائل ؟!

علي ما قريت بعدين ، طلعو انهم ما يستقبلو افراد اذا امتلاء قسم العوائل فيسير قسمين عوائل

مني متاكدة من المعلومة الصراحة لكن كانت تجارب ناس 



المطعم ما فيه بارتشينات و ما سمعت اغاني 

امكن الشي السلبي في المكان انو الجلسات جدا قريبة من بعض يعني كلام الناس كلو في اذني

(^^) 

الصور دي اخدتها من موقعهم 



حبيت مرة حركة الكتابة علي الجدار بالارمنية 

نجي لراي في المطعم و الخدمات 

المكان كان جدا جدا زحمة مافي طاولة تفضى الا و تمتلي مرة تانية 

و دا السبب اللي خلاني ما اقدر او ما اعرف اصور 

خصوصا انو احنا كان مكاننا في الجلسات الداخلية في النص يعني ما اقدر اصور لا يسار ولا يمين 

و كل ما اطلع الكاميراة احس الكل يطالع فيا ، وانو في اي لحظة يجي جرسون يقولي ممنوع 

الخدمة كانت سيئة نوعا ما ؟! ليش 

احس اليوم كان مرة مكركب مافي ترتيب زي الناس يعني زحمة بره عند المدخل 

و زحمة في الممرات و اساسا الممرات صغيرة ، المكان ما يسكوت من العمال 

الطلبات جات مرة بسرعة ! لكن للاسف ما في ترتيب الشوربة جاتنا بعد الطبق الرئيسي 

حتي احنا اللي ذكرناهم بالشربة 

الجرسونات مرة متعاونين حتي انو لما المصاص تبعي طاح في الارض 

كان اقرب و احد مني عامل نظافة لكن انا ما انتبهت قلتلو ابغا مصاص راح جابها و دور الجرسونات 

و اعطاهم عشان يجيبولي هوا 

و اتوقع لو الجو حلو في العصر او الصباح حلو تروحي الجلسات الخارجية 



حبيت فكرة انو المطعم في سنتريا مول احس الناس اللي في قليل و هادي 

حبيت انو تقدري تشوفي المطبخ من زجاج شفاف للحرص على النظافة 

باين انو الاكل تحت يد شيف فاهم شغله و ممتاز 

الاسعار بنسبالي فيها الغالي و فيها العادي ، يعني كاي مطعم ٥ نجوم 

(كان في نقص عندهم في العصيرات عشان لا انسى)

المنيو بشكل عام في خيارات حلوة و كويسة 

و كان نفسي اجرب اكثر من طبق بس الصراحة المعدة لا تسمح !

خصوصا انو انا حاليا جالسة اعمل علي عادة انو قبل لا اروح اي مطعم

اكل حاجة خفيفة عشان لا اخرب نظامي الصحي 

كان نفسي اجرب بورك بالجبنة وبابا غنوج وكباب خشخاش و كبة لوسين و قهوتهم البيضاء 




لكن ان شاء لله اذا ربي احيانا له زيارة ثانية لكن في وقت رواق 

يعني و قت اختبارات وقت مباراة  (^^) 

كده خلصنا البوست ان شاء لله يكون عجبكم و حاز علي اهتمامك 

و شكرا علي حسن المتابعة و خليكم قريب لبوست قريب ان شاء لله 

SHARE:

ليست هناك تعليقات

إرسال تعليق

Blogger Template Created by pipdig