الأحد، 19 أبريل 2015

تجربتي مع audible


سلام كيفكم بنات 

اليوم بوستي ماله علاقة بالبيوتي و الازياء خالص 

بوستي اليوم  بسيط و خفيف عن خدمة

انا بدات فيها من بداية السنة و هي Audible 

حبيت اعطيكم انطباعي عنها

فاذا كان الموضوع ما يهمك تقدري توقفي هنا 



و اذا لساتك مكملة معايا معناها الموضوع يهمك

 فان شاء لله البوست يساعدك علي القرار اذا تقدمي علي الخدمة او لا 

بسم لله نبدا 



ليش اخترت الاشترك ؟

كنت اقضي وقت كثير في الطبخ و تنظيف البيت و سيشوار و عناية

و طريق سفر  و زحمة و تمارين و رياضة 

كنت اتحسف علي الوقت الضياع

خصوصا انو كثير نسافر بر لمكة للمدينة من الرياض للخبر ..... الخ

و دايمن افكر يالله كان دحين يمديني عملت كدا و كدا 

و طبعا اللي ما تعرفو عني انو انا ما اقدر اعمل و لا شي في السيارة الا انو اسمع

او اتفرج علي الشاشة اللي في السيارة

غير كدا ادوخ للاسف حتي الطيارة "غالبا " لكن السيارة ادوخ اكثر

 ما اعرف اذا كان دا دوار السيارة ؟!

 بس انا ما ادوخ من السيارة لا ادوخ اذا كنت جالسة اعمل حاجة بيدي 

المهم بدات اول حاجة انو احمل افلام ، فيلم كارتونات ، مسرحيات ، برامج اذاعة

كل اللي يخطر علي بالكم

و اتفرج عليها في السيارة بعدها نقلت علي برنامج الايتونز (البودكاست)

 خصوصا انو كان وقتها ابغا اطور لغتي ، ابغا يكون عندي معجم اكبر من الكلمات 

و استمريت عليه  و كان فيه و لازال فيه حاجات حلوة ولله 

كنت استمع لها في كل وقت طبخ غسيل تنظيف عناية ترتيب سيارة زحمة كل وقت تقريبا 

بعدها بدات اطفش لانو حلقات البودكاست  تنزل تقريبا اسبوعيا

فكنت اخلصها و انا لسة ما خلصت شغلي

خصوصا كمان انو مدتها ما تتجاوز الربع ساعة غالبا 

المهم بعدها بدات ادور علي الكتب السمعية و بدات ادور و احسبها و اشوف ايش الاحسن و الافضل 

و اخيرا قررت علي Audible خصوصا انو اول شهر مجانا و توكلت و اخدته 

وغير دا كلو كثير احيان يكون عندي كتب و اتكاسل اقراها

مع اني احب القراة و الي الان

و لكن و للاسف في في مكتبتي كتب ما خلصتها و تكون لها اربع لخمس سنين 

و كمان تاخير الكتب عشان ينزل عندنا يقطع حماسي و مافي اطلبه و استنا اللين ما يجي 

فدا كان الحل الانسب و الحلو ليا بسعر ارخص و بطريقة اسرع يجيني الكتاب 



 ايش هيا ادوبل هي خدمة توفرلك كتب سمعية من مختلف الانواع عن طريق اجهزتك اللوحية 

هو موقع تابع لي امازون ، الموقع فيه اكثر  من 150,000 كتاب

الكتب اول باول تنزل ، يعني جديدة  عن اغلب الاختصاصات 

كمان لما تسمعي الكتاب ما تسمعيه انه كانو احد جالس يقراء

لا يكون يأما الكاتب يحكي يعني كانو الكاتب يتكلم معاكي

او اذا قصة يكون السرد زي التمثلية يعني تغير في اصوات الشخصيات و تغير في اسلوب الكلام

و دا اكثر شي عجبني كده تحسي انك معاهم تدخلي جو تاني ، تدخلي جوه القصة 

 كمان و من الحاجات الحلوة في الموقع انو اول شهر تاخدي مجانا كتاب واحد (يعني زي التجربة )

بعدها اذا ماعجبك يمديكي تلغي الاشتراك و الكتاب يجلس معاكي 

في Audible مو لازم تشتركي تقدري تشتري الكتب من غير اشتراك

لكن مع الاشتراك الكتب تطلعلك ارخص 

يعني اذا ما كنتي مشتركة و عجبك كتاب ب٢٥ دولار راح تشتري ب ٢٥ دولار

اما اذا كنتي مشتركة راح تاخدي ب ١٤ دولار الي هي قيمة اشتراكك الشهرية و هي اقل خطة اشتراك 

الموقع عنده ٤ انواع اشتراكات ٢ شهرية و ٢ سنوية 

الشهرية

AudibleListener® gold كتاب واحد كل شهر ب ١٥ دولا  تقريبا

AudibleListener® Platinum كتابين كل شهر ٢٢ دولار تقريبا

السنوية

AudibleListener® gold ١٢ كتاب في السنة ب ١٤٩ دولار تقريبا

AudibleListener® Platinum ٢٤ كتاب في السنة ب ٢٢٩ دولار تقريبا

 يعني كل شهر علي حسب اشتراكك يجيكي نقطة تشتري به كتاب

(زي مثال الاشترك الشهري القولد اول كل شهر تجيكي نقطة

تشتري بها اي كتاب ايش ما كان سعره يعني انتي اشتركك كان ١٤ دولار 

بالنقطة دي تقدري تاخدي اي كتاب و باي سعر حتي لو ب ٢٥ دولار )

 

و حتي لو انتي مشتركة و خلصت نقاطك تبع الشهر عندك طريقتين اولها انك تشتري نقاط

او انو تشتري الكتب لكن هنا راح يعطوكي علي كل كتاب تشتري ٣٠٪

تخفيض بس عشنك مشتركة معاهم 

وكمان فيه حاجة حلوة انو لو الكتاب اللي اخدتيه ما عجبك يمديكي تغيريه

و كمان يمديكي توقفي اشتراك لفترة معينة تصل ل ٤ شهور في حال عندك ظرف

بس تبلغيم عن طريق طرق الاتصال تبعتهم 

 الكتب يمديكي تنزليها علي جوالك ايبادك لابتوبك كمبيوترك او الايبود , MP3

او حتي تنسخي علي سي دي و تسمعي في اي مكان

 لكن عندك عدد محدود من الاجهزة ناسية كم و لله بس قليل انا شابكة ماك و ايفون و ايباد و HP

 الصراحة الموقع يوفر ارخص كتب يعني افضل الاسعاره عنده

و الاحلا انهم يعملو عروض علنية و سرية و كل يوم في عرض علي كتاب

 سمعت مرة انو و احد كلمهم عشان يلغي اشتركه

عشان يبغا يعمل ريفيو كامل عن الموقع فبيشوف طريقة الالغاء 

ادوبل عرضو عليه ٢٠ دولار و قال اني ما قدرت ارفض العرض و اخد ال ٢٠

(تصدقو ابغا اعمل نفس الحركة ابغا اكسب شوية خخخ )

طبعا بعد الغاء اشتراكك الكتب راح تفضل معاكي 

 كمان الشي الحلو  في الكتب خصوصا كتب المذكرات او الشخصيات يكون نفس الكاتب

هو اللي يحكي

يعني مثل كتاب جينفر لوبيز هي اللي تتكلم و كتاب كريس جنر هي كمان اللي تقرا

كمان كتاب كرداشيان هما اللي يتكلمو و كده

كتب الاطفال مرة حلوة كدة فيها موثرات صوتية ، يعني باختصار تعبانين علي الكتب 

انتي اساسا تلاقي تحت كل كتاب ايقونة تضغطيها و تقدري تسمعي موجز للكتاب

تقريبا و غالبا تسمعي ٥ دقائق من الكتاب ودا الشي راح يسهل عليكي الاختيار 

و المدة تبعتهم اطول من مدة كتب ابل السمعية 

الكتب فعلا تخرج للحياة علي قولهم كدة تحي الشخصيات اكثر 

 و خدمة كمان عندهم بس الصراحة انا ما تهمني او ما احسيتها مهمة لكن الاجانب مرة حابينها

اللي هيا

Whispersync for Voice

وهي انك بعد ما تشتري الكتاب السمعي يوفورولك الكتاب اللكتروني نفسه في كندل

بس ارخص بكثير

و يسير في ربط بين الكتاب السمعي و اللكتروني

بحيث فين ما توقفي في السمعي و تفتحي اللكتروني

راح تلاقي نفسك فين ما وقفتي و العكس صحيح 

انا دا شي شفته بين اجهزتي و حاجة حلوة الصراحة ما يقدرها الا اللي مفتقدها

و هي لما مثل اسمع من ايبادي و اوقف او تخلص البطارية ، المهم يعني اوقف

افتح ايفوني الاقيني في نفس المكان اللي وقفت فيه 

 اما عن السلبيات بنسبالي ما حسيت في سلبية لكن ممكن يكون سعرها شوي غالي

لانو الكتاب الورقي اللي بغلاف صلب تقريبا يكون سعره ب ٢٠ دولار

يعني الفرق بينهم فقط ٤ دولار او اقل 

الالغاء يتطلب الاتصال عليهم علي ما سمعت مني متاكدة الصراحة بس لو صحيح دا الشي سلبية 

صح عندهم كتب كثير لكن حطي في بالك في كتب ماعندهم

خصوصا المهنية حقت الهوايات و الكرافت و كذا 



و اخير نجي لراي الشخصي 

انا حبيته مرة لدرجة بعد اول شهرين بعد الشهر المجاني اخدت الخطة الشهرية اللي بكتابين

(انا في البداية كانت خطتي الخطة الشهرية القولد )

في البداية كنت اشوف كتاب ب ٢٥ ساعة مرة كثير ما اقدر اخلصها في شهر

لكن بعدها سرت اخلصها في اسبوع بالكثير اسبوعين 

الموقع يخليكي تدمني  علي الكتاب ، بس تبغي تسمعي

انا اخلص كتبي و اجلس علي نار استني الشهر يخلص عشان اشتري كتب مرة تانية 

و اكثر شي حبيته و امكن قلته اكثر من مرة طريقة سرد القصة مرة حلوة

كذا كانك تشوفي فيلم سمعي ، مرة حلو الصراحة ، احساس ثاني 

خلاص تلاقيني كل وقت و انا جالسة اشتغل او اتمكيج او اي حاجة جايبة الكوب

و حاطة الايفون داخله و اسمع (عشان الصوت يعلا) 

حتي و قبل لا انام و انا علي السرير اسمع او لما يكون معايا ارق


 


حاليا جالسة اسمع Since You've Been Gone

بعض الاحيان اقول يليت يكون عندنا كتب كده بالغة العربية

خصوصا لاخواننا اصحاب الاحتياجات الخاصة 

طيب هل انصحك تشتركي ؟

شوفي اذا كنتي شخص يحب الكتب و عندك و قت للاستماع و لغتك الانجليزية كويسة

 اقدمي علي الموضوع و لو تجربة صدقيني راح تكون تجربة حلوة 

حاليا في تخفيض الربيع ٥٠٪ من الكتب الموجودة في قائمة امنياتك

و اذا اخذتي ٤ كتب لهذا الشهر راح يعطوكي ١٠ دولار هدية ،،،، الحقي العرض 

و عرض ال ٥٠٪ هذا اكبر عرض يعملو في السنة اتوقع

لا تشيلو هم اختكم ماقصرت كوشت علي كل شي (^^) مو اقولكم ادمان 




و قبل لا انهي الموضوع ابغا انبهكم علي حاجة

لو كونتي ام او في البيت لوحدك الافضل انك ما تسمعي بهيدفون 

حتي لما تسمعي و انتي تمشي في الشارع حطي سماعة و حدة 

عشان تنتبهي للي حولينك 

رابط الموقع هنا audible

كده انا انهيت البوست ان شاء لله فادكم و ساعدكم علي القرار 

خليكم قريب لبوست قريب ان شاء لله 

SHARE:

هناك 6 تعليقات

  1. شكراً جزيلاً على ثنقل تجربتك الجميله و الشرح الكافي والوافي وشكراً لأميرة انها قالت بسنابها عن الموضوع
    صحيح إني اعرف الموقع بس ماسبق اشتركت فيه ! ماتخيلته كذا يحمس ويقرأ بتلوين صوتي ..
    وبالمناسبه ترا فيه كتب عربيه مسموعة ومواقع زي فكرته صحيح اقل بس سار موجود زي مثلا ( ضاد ).
    تشرفت فيك

    ردحذف
    الردود
    1. حياتي انا و الله معليش دوبي انتبه لتعليقك ، و الله انتي الي جميلة و كلك ذوق و لسانك زي العسل و الله ، حياتي و الله
      و فعلن شكرا لي امورة الحلوة ،،،،،
      ايوة صحيح في كتب عربية مسموعة لكن للاسف انها اجتهادات شخصية جزاهم الله خير فللاسف النتيجة مو قد كدا
      انا اقصد علي اللي في اليوتيوب
      اول مرة اعرف عن موقع ضاد مرة حلو وجودة مرة حلوة الصراحة ، مرة شكرا دلتيني عليه ، مرة عجبني .
      و شكرا علي تعليقك الجميل و انا و اللخ اللي اتشرفت فيك و السموحة علي التاخير في الرد (^^)

      حذف
  2. كثير حبيت الموضوع
    بجد افكر اشترك حمستيني 😍
    مرره شكرا

    ردحذف
    الردود
    1. حياتي انا و الله ، انا اللي فرحت انو حمستك (^^)
      و راح احمسك زيادة صدقيني من اول ما تشتركي فيه او مجرد ما تسمعي كتاب سمعي صدقيني راح تدمني عليه
      و شكرا لك علي تعلقيك

      حذف
  3. يعطيك العافيه انا حملته من فتره و ما اعرف ليه ما عرفت استخدم التطبيق ياليت تشرحي كيف نسجل فيه و كيف نشتري الكتب شكرا مقدما

    ردحذف
  4. اهلين حبيبي انا في الخدمة (^^) شوفي كل حاجة تتم عن طريق الموقع مو التطبيق
    التطبيق فقط للاستماع
    يعني اول حاجة تدخلي الموقع و بعدها تسجلي عادي ، حتى كمان يمديكي تسجلي عن طريق حسابك في امازون اذا عندك !
    لانو تابع لامازون
    و بعد ما تكتبي بيانات الماستر كارد تبعك راح يخصمو منك المبلغ و راح تلاقي الكرديت Credits او النقاط في حسابك
    و بعدها خلاص عن كل كرديت Credits كتاب ، بس تختاري الكتاب و تحطي في سلة الشراء
    تروحي علي سلة الشراء و راح يقولك كيف تحبي تدفعي عن طريق الكرديت Credits او بفلوس
    تختاري كرديت Credits و خلاص راح يتحمل معاكي في تبويب كتبي
    و بعدها تدخلي علي الاب او التطبيق و تلاقي هناك (^^) و بس
    شكلي راح اعمل فيديو تيتوريل عن استخدام الموقع علي اليوتيوب (^^) اتحمست اذا ربي اراد
    و اكتبيلي ايش راح تسمعي اول كتاب (^^)

    ردحذف

Blogger Template Created by pipdig