السبت، 11 أبريل 2015

مجموعة ULTRA FACIAL من klehl's


السلام عليكم بنات 

اليوم ابغا اتكلم عن مجموعة ULTRA FACIAL 

من klehl's 

زي منتو عارفين انو انا من اول ماستخدمت عينة الكريم

من المجموعة حبيته مرة

 و كانت من مفضلات شهر سبتمبر 

المهم من بعدها و انا حالفة يمين اشتري المجموعة كاملة

و اجربها (^^) و فعلن اشتريتها ! 

 

اشتريت المجموعة كاملة في البلاك فرايداي من نوردستروم ، و كان المجموعة عليها عرض 

فما افتكر ولله اخدتها بكم لكن راح اذكرلكم كل منتج لوحده بكم 



 قبل لا ابدا ، ابغا اتكلم لكم عن بشرتي و نوعيتها عشان  تكونو معايا علي الخط

لله يسلملكم انا بشرتي دهنية مختلطه عندي تي زون - و مسام - حساسة للحبوب

 بعض الاحيان تقلب بشرتي عادية او جافة علي حسب الاجواء او المكيف المستخدم (^^)

(ولله ياجماعة احس بشرتي تختلف مع اختلاف المكيف يعني احس

لما اكون في بيتي و المكيف مركزي تسير جافة علي عادية

و لما اروح بيتي في مكة و يكون التكيف سبليت تقلب علي عادية

و لما اروح بيت امي و يكون مكيف شباك تقلب بشرتي دهنية

 لا تضحكو و لله جد ، و دا طبعا من غير اي عوامل جوية )

المهم كمان قريب عرفت معلومة انو كل ٦ شهور البشرة يسير فيها تغير او تتغير عشان كده

لازم تشيكي علي البشرة كل ٦ شهور  يعني بعض الاحيان تكون دهنية و بعدها تسير عادية و كدا

و بتالي دا الشي راح يجبرك تغيري منتجات العناية ،  و اخيرا  اخاف اجرب اي منتج عشان الحبوب

فتلاقيني حريصة علي دي النقطة 



ULTRA FACIAL CLEANSER الغسول 

اولا مكوناته :. زيت لب المشمش و زيت الافوكادو و يحتوي علي الامينو اد بروتين و فيتامين  أ هـ د

مو كميائي - خالي من العطور و الكحول و منتج  يصنف من المنتجات الطبيعية

الغسول ثقيل زي صابون اليد السائل يعني ثقيل على جل زي غسول الاستحمام

بس بسرعة يتمزج مع الموية

 في رائحة كميائيه بس خفيفة ما ازعجتني ، الصراحة اتوقعت العلبة اكبر لكنها صغيرة

و الباكج شوية صعب يتفتح (الغطاء)

ادعاءات الشركة او الشركة توعد انه يغسل المكياج جيد من دون ازالة الزيوت الطبيعية للبشرة

و يحافظ علي توازن البشرة

لما عملت سيرش عن المنتج لقيت كثير ناس حبوه من جميع الاعمار و البشرات

و مالقيت مشكلة الا انو بعضهم اشتكى من انو سبب لهم جفاف 

وحدة تقول طلعلها حبوب حولين فمها و انا كمان اول ما استخدمتها طلعتلي حبوب حولين فمي

لكن اولا مني متاكدة اذا منو لانو كنت جالسة اجرب منتج ثاني مع فمني عارفة من ايت منتج

او ايمكن عشان استخدمتهم الاثنين مع بعض

 ثانيا الحبوب بسرعة راحت و بعدها ما طلع ! فممكن مع اول استخدام المنتج يطلعلك حبوب

لكنها زي ما قلت اختفت و ماعد طلعتلي

  و في ناس قالو طلعتلهم حبوب مع الكلارسونك انا مالاحظت !

لكن عموما انا استخدمته مع و من غير الكلارسونك و ما سارت لي مشكلة

نجي لطريقة الاستخدام :. تحطي كمية بسيطة علي يدك  قد حبة البندول تقريبا

و افركيه شويه بين اصابعك مع شوية موية

و بعدها افركيه علي وجهك علي شكل دوائر تصاعدي من تحت لفوق  لمدة ٣٠ ـ٥٠ ثانية

ولازم تتاكدي انك تزيلي بقايا الغسول بفرشة او ليفة او الكلارسونك

الغسول له حجمين سعر الصغير  ب ١٠ دولار و الكبير ب ٢٠ دولار ، انا اخدت الصغير 

اخيرا راي فية الصراحة احب استخدمة لما ابغا حاجة كدا رفرشنق او احس بالنظافة

بعد الجيم مثلا !

 ما احبيت استخدمة بكثرة اذا حسيت بشرتي شوية جافة يعني مثل اخليها كل صباح او مساء 

 عجبني انه لكل انواع البشرات ينفع للاخوات مثل ، ما نشف بشرتي

 ما طلعلي حبوب لكن طلعي الحبوب الحمراء الصغيرة  اللي في البداية لكنها بسرعة اختفت

 اذا كانت تطلعلك حبوب عشان الجفاف او قلت ترطيب او زيوت البشرة

فماراح تطلع لانه يحافظ علي ترطيب البشرة

 فعلن يخلي البشرة ناعمة و اذا كنتي من اللي يحبو المنتجات الطبيعية راح يعجبك  

 حلو مع كلارسونك

ما يشيل الميك اب او ممكن  يشيل الميكب الخفيف مرة  مو الثقيل

انا احس نفسي لازم قبل ما اغسل الميك اب امسح وجهي بمزيل مكياج بعدها الغسول

احس بعد فترة بزيوت في وجهي دلالة علي الحفاض علي الزيوت

 ما انصح استخدمة اذا عندك سهرة  و ميك اب لانو احس الغسول اللي قبل المكياج

لازم يزيل كل الدهون اللي في الوجة حتي لو طبيعية (تفضيل شخصي)

 المنتج صعب الفتح زي ما قلت في البداية

مع انه صغير لكن كثير لانو انتي راح تستخدمي قليل منه فقط و كمان بنسبالي السعر حلو

 مع انه يخلي البشرة ناعمة لكن لابد من مرطب بعده

 هل راح اشتري مرة ثانية اممم لو كان متوفر في السعودية نعم لكن اروح اتعنالو لا

 و في حاجة كمان مادري اذا بس انا او لا ، في اليوم الثاني بعد ما اغسل وجهي في الليل

احس بنظارة 


 

ULTRA FACIAL TONER التونر 

 مكوناتة :. زيت لب المشمش ، اوفاكادو و فيتامين هـ لا يحتوي علي الكحول 

التونر مرة ما يشبة اي تونر اعتيادي كدا يشبة الصابون السائل الثقيل

يعني مو زي التونر الكحولي الشفاف السائل  لا لونه ابيض ثقيل علي كريمي

شوفتي كيف لما تشتري قناع سائل من الصيدلية و تدهني علي وجهك نفس الاحساس تري

بارد و ما تحسي بحرقة في وجهك زي التونرات التانية ، له رايحة كميائة بس كمان ماهي مزعجة 

 الشركة توعد انه يساعد علي صقل و تقشير سطح البشرة من دون ازالة الدهون الطبيعية للبشرة

و هو لكل انواع البشرات

 ينظف بلطف دون ان يسبب اي جفاف للبشرة 

كمان ثقل المنتج و قربه من الكريمي اكثر من السائل هو اللي يحافظ علي ترطيب البشرة

و يحافظ علي توازن ال بي اتش للبشرة 

  احس اكثر ناس عجبها المنتج هما الكبار من ٤٠ و فوق و الصفار من ١٤ ل ١٧

اللي بشرتهم ما فيها مشاكل و اللي بشرتهم حساسة او جافة لعادية  

 طريقة استخدام التونر بما انه غريب شوية ، عادية زي اي تونر 

 بعد غسل البشرة بغسول حطي كمية صغيرة علي قطنة و امسحي وجهك فيها

و الابتعاد عن منطقة حول العينين و بعدها حطي المرطب 

 انا عبوتي كانت  الصغيرة و سعرها ب ٨ دولار يعني تقريبا ٣٢ ريال

و في عبوة كبيرة ب ١٦ دولار تقريبا ٦٠ 

راي في المنتج الصراحة اتوقع اكثر شي يناسب البشرة الجافة الي العادية

 احس كليز عموم تنفع للنساء الكبار يعني من ٤٠ لفوق

مادري احس اساسا ماشاء لله بشراتهم ما فيها شي بس تحتاج ترطيب و نظارة

 واذا كنتي من صحبات البشرة المختلطة او الدهنية ما انصح فيه ممكن يطلعلك حبوب

 لكن اذا كان كل اللي يهمك انك تحصلي علي ترطيب راح يعجبك المنتج

 فعلن لطيف علي البشرة و فعلن ما يشيل الدهون و كمان فعلن يخلي بشرتك ناعمة

 لكن اللي ما حبيته انو مادري احسة صعب المزج شوية و كمان احس باحساس لصق او لزق (sticky )

يعني ما احس بشرتي نظيفة او احس في دهون في بشرتي ابغا اغسلها مرة تانية

و للاسف العلبة جالسة عندي ما استخدمتها الا ٥ الي ٦ مرات

 اتوقع استخدمه مرة ثانية اذا حسيت بشرتي جافة جدا ، هل راح اشتري مرة ثانية لا 

اذا كنتي تبغي حاجة طبيعية او انتي من الناس اللي التونر اللي في كحول

يسببلك حساسية راح يناسبك

 ما حسيت انو يشد البشرة ابدا و اخير سعره جدا حلو 


 

ULTRA FACIAL CREAM الكريم

 الكريم ذا تفتكرو ذكرته في مفضلاتي في شهر سبتمبر ٢٠١٤

كانت عينه  من السوق الحرة في دبي

 و على طول من اول استخدام سار في قائمتي للتسوق ( shopping list)

و فعلن اخدت المجموعة كاملة في البلاك فرايدي بس عشان المرطب 

 مكوناتة :.  فيه مكونين سبشل اول مرة اسمع عنها

اولها بروتين سكري من القطب المتجمد و هو يحافظ علي تجديد الخلايا

و يحافظ علي رطوبة البشرة

و نبتة الحلف (Cylindrica) و هي نبته من صحراء استراليا يحتبس الماء داخله

و بتالي راح يحفظ الماء داخل الجلد 

 العلبة صغيرة لكن زي ما نوهت في البوست تبع المفضلات تحتاجي كمية صغيرة مرة منه

ما فيه ريحة و هو كريم خفيف و يمتزج بسهولة 

الشركة تقول انه يحافظ علي رطوبة البشرة لمدة ٢٤ ساعة

و يحافظ علي البشرة من المناخ القاسي في البرودة 

و يعطي البشرة مظهر صحي و رطب طول اليوم 

نسبة كبيرة من الناس تمدح في المنتج

و اتوقع اذا مني غلطانة المنتج دا من المنتجات المشهورة للشركة

 في مجموعة اشتكت انو طلعلها حبوب لكن انا الحمد لله ما وجهت ابدا 

في حجمين للمنتج سعر الصغير ب ١٠٠ ريال و الكبير ب ١٧٤ انا تبعي الصغير

راي فيه زي ما هو منتج جميل جدا لكن بنسبالي السعر غالي حبة لكن السعر بنسبة للكمية كويس

 اولا و اهم شي ما طلعلي حبوب لكن لازم انوه علي نقطة

مثل انتي استخدمتي في الليل اليوم الثاني لازم تغسلي كويس

لانه اتوقع لو ما غسلتي كويس راح يتراكم عليكي و يطلعلك حبوب

اللي اقصدو بالغسيل هنا اقصد انك تغسيلي بغسول مو بس موية

و بنسبالي احطة فقط مرة وحدة في اليوم حتي في جفاف الشتاء

فعلن يخلي البشرة ناعمة و رطبة لفترة طويلة

 تمتصة البشرة بسرعة ما تحسي لزق علي وجهك 

مرة ممتاز ممتاز للشتاء حبيت المنتج و نعم راح اشتري ان شاء لله مرة و ثانية و ثالثة 

جدا انصحه فيه 



المجموعة جاء معاها عينة من نفس الكريم و سيرم و شنطة عليها شعار الشركة

السيروم كان MIDNIGHT RECOVERY CONCENTRATE و هو للاصلاح الليلي 

للاسف ما استخدمته لسة ، في الفترة الحالية عندي منتجات كثير استخدمها

ان شاء لله نستخدمو شوية قدام

اخيرا هل انصحك فيه ؟ اتوقع لو بشرتك عادية لجافة راح يناسبك اكثر

واذا بشرتك مافيها مشاكل كمان , و بنسبالي افضل استخدامها في الشتاء

ولازم تعرفي حاجة اخيرة انو اللي يناسبني ممكن مايناسبك ،،،

فتاكدي قبل كل حاجة و دايما اسالي اذا يمديكي تاخدي عينات قبل الشراء

 

كدا خلصنا البوست ، اتوقع انه اطول بوست عملته !؟ مادري ايمكن (^^)

المهم شكرا علي حسن متابعتكم

و اشوفكم ان شاء لله في بوست قريب فخليكم قريب  


SHARE:

ليست هناك تعليقات

إرسال تعليق

Blogger Template Created by pipdig