الجمعة، 8 مايو 2015

Bath Body Works Aromatherapy Sleep Lavender


السلام عليكم بنات 

عارفة عارفة ولله من قبل لا ابدا راح اتهزاء 

البنات اللي تابعو مفضلاتي لشهر سيبتمبر فاهمين الهرجة

و اتواقع راح يشوفو الصور يطلع منها غبار !

من كثر ما الموضوع قديم (^^)

وعدتكم راح اتكلم عن المجموعة كاملة و اتاخرت عليكم 

بس يقولكم اذا عرف السبب ،، بطل العجب ، راح اقولكم السبب بس استنو عليا 

المهم انو اخير اخير شديت حيلي و نزلت البوست 

و سبب التاخير ياجماعة الخير هو 



انو و بكل صراحة كنت اقول في نفسي او مخططة مع نفسي انو 

راح استخدم المجموعة لما احس بتعب جسمي او تعب نفسي عشان احكم علي المنتج صح 

و فعلن و بكل حزم و قوة مستنية اتعب من الرياضة او من تنظيف البيت  او من شغلي ! 

او تجي النفسية اللي قبل كل دورة شهرية 

بس ايش يسير ؟!

اللي يسير و يضحك في الموضوع انو كل ماارجع تعبانة جسديا او نفسيا (لله يحفظنا من كل شر )

تكون النفسية زفت و الجسم ما يتحرك و بتالي ما استخدم المجموعة 

يعني الموضوع يسير فشوش و اسير انا اونطة (^^) علي قول اخواننا المصريين 

لكن و قفت وقفة جدية مع نفسي و الحمد لله من شهر او اكثر شوية بدات استخدمها 

فسامحوني يا جماعة علي اي تاخير 

بس ولله حبيت اخد وقت كفاية عشان اجربها 

وبسم لله نبدا البوست 

المجموعة اخدتها من باث اند بودي واركس تقريبا في شوال السنة اللي فاتت 

او رمضان (لله يبلغنا و من نحب ) بس ولله مني فاكرة بظبط متى المهم بين دي الفترة 

اللي اخدتو من المجموعة هو كريم جسم ، معطر مخدات السرير  

مقشر الجسم ، لوشن الجسم ، غسول الجسم و ال Luxury Bath

اتوقع انها المجموعة كاملة و لله مني متاكدة



المجموعة كاملة هي موصوفة عشان تساعد علي النوم و تتقسم لقسمين 

الاولي برائحة اللافندر و الفانيلا ، و الثانية اللافندر و البابونج 

في البداية ر اح اتكلم عن الكريم بما انو هو اول شي عجبني !

ريحته لافندر و بابونج مرة سهل يتمزج و ريحته جدا حلوة انا عجبتني مرة

لكن هما كاتبين انو يساعد علي نعومة الجسم و يحافظ علي ترطيبها لمدة ٢٤ ساعة 

الصراحة انا ما شفت ترطيب لدي المدة ؟!

هو نعم مرة يرطب البشرة لكن تقريبا لصباح اليوم الثاني فقط (اذا استخدمتي في الليل )

اساس هو الغرض من الكريم و المجموعة كاملة فقط تريح الجسم مو علاجي او ترطيب

اتكلمت علي بتفصيل اكثر في بوست September favorites 2014 مفضلات شهر سبتمبر

و بنسبة لمعطر السرير (عادي تستخدمي لمخدات و مفارش السرير كمان ) 

هو يحتوي علي اللافندر و البابونج اللي يساعد انك تصفي ذهنك و يريح جسمك 

طريقة استخدامي له انو قبل النوم بربع ساعة او اقل شوية اروح السرير ابخ المعطر من ٤-٥ بخات

و بعدها اروح اجهز نفسي للنوم امسح مكياجي او احط كريماتي و ارجع الاقي السرير نشف !

فعلن تحسي بهدوء و استراخاء جميل و تكون لمسة حلوة لقبل النوم 

ويفضل انك تستنشقينه و انتي مسدوحة عشان ترتاحي

سعر الكريم  ٦٠ ريال و سعر المعطر ب ٤٠ ريال  علي ما اعتقد 



نجي للوشن و المقشر ، ولا تسالوني ليش اللوشن في الحمام ؟!! عزكم لله 

اللوشن تقريبا زي الكريم لكن اخف شوية طبعا بما انو لوشن 

كمان هو برائحة اللافندر و البابونج

 عن نفسي استخدمو خلال اليوم اذا كنت حاسة بضيق او توتر

ادهن شوية في يدي و استنشقه 

العطر تحسي قوي لكن ما يأثر او يحسس البشرة، كمان مايدهن او يدبق علي الجسم 

انصح انك تخلي واحد في العمل لوقت التوتر و ضغط الشغل راح يريحك ان شاء لله 

المقشر اول حاجة لاحظتها و شفتها  وحسيتها بعد اللاستخدام النعومة ،نعومة خيالية ولله 

هو مقشر بسكر برائحة اللافند و الفانيلا

 تحسي مقشر سكر علي زيت ، و حبات السكر تحسيها كبيرة حلوة 

تستخدمي زي اي مقشر و بعدها تغسلي بغسول جسم

لانو لو ما غسلتي زي الناس راح يسبب حكة خفيفة هذا عن نفسي !

يعني اتبعي بغسول و ليفة مو بس غسول 

لكن فعلن البشرة تسير ناعمة مرة ، و عادي مرات استخدمه اول ما اصحي الصباح 

مو ضروري بس قبل النوم !

سعر اللوشن ٥٢ ريال و سعر المقشر ٦٠ ريال تقريبا 


 

الصراحة الغسول عادي مافي شي مميز و لا شي سئ

يعني حلو تستخدمي مع المجموعة عشان تكمل الريحة 

غطاء العلبة شويا يقهر اتوقع مع الايام راح يتكسر ، حلوة الريحة لافندر و بابونج 

بعد الغسول لاحظت الحمام يسير ريحته نفس ريحة الغسول لفترة كويسة 

و بنسبة luxury baths الصراحة ما استخدمته كثير امكن مرة او اثنين 

لانو ما احس نفسي من البنات اللي تعبي البانيو و تجلس فيه 

ما ادري اطفش الصراحة  !

فعادي المنتج دا ما يهمني لكن ريحتها جدا حلوة و تقيل 

اذا كنتي تحبي تعملي ببل باث اتوقع راح يعجبك بس عن نفسي 

ما احس نفسي احتاجه

بس انا و لا تضحكو عليا احب احط شوية في البانيو  قبل الاستحمام و ارشو بموية

 عشان لما استحم تطلع الريحة و تريح اعصابي بس انتبهو رشو الموية كويس عليه الين ما يروح

عشان لا قدر لله ممكن تتزحلقي ، و كمان رغوته حلوة 

سعر الغسول ٥٠ و سعر ال  luxury baths ٦٥ ريال 

الصراحة يا جماعة الاسعار تري ما اتذكرها لانو من فترة بس افتكرها في هذة الحدود 

و بنسبة لراي النهائي 

المجموعة ما جابتلي النوم لكن مرة تحسي بعدها باسترخاء تام فعلن 

لاحظت في بنات استخدمو اللوشن و الكريم للوجة ؟! المنتجات تري للجسم فقط

البكجنق او التغليف حلو لو تبغي تستخدمي لغرفة نوم الضيوف 

هل انصحك تشتريها ؟ اذا كنتي من محبات اللافندر نعم و انصحك اكثر شئ بالكريم و المعطر 

اكثر اثنين عجبوني و راح اشتري منهم مرة ثانية ان شاء لله 


بكدا وصلنا لنهاية البوست شكرا علي حسن متابعتكم 

و خليكم قريب لبوست قريب ان شاء لله 


SHARE:

ليست هناك تعليقات

إرسال تعليق

Blogger Template Created by pipdig