الثلاثاء، 19 مايو 2015

اخر الكتب اللي قريتها


مرحبا بنات

اليوم ابغا اتكلم عن الجزء الاول 

من سلسلة اخر كتب اللي قريتها في النصف الاول من السنة 

بدات فيها من فبراير ، تقريبا نهاية يناير  و راح تستمر الى جون 

في منها كتب ورقية وفي اللكترونية و في منها كتب سمعية



اذا كنتي حابة تعرفي تجربتي مع الكتب السمعية ارجعي لبوست 

تجربتي مع audible ! 



دا الكتاب من اشهر الكتب اللي سمعت عنها ، ما في احد ما اتكلم عنه !

في اليوتيوب و البلوقات في كل مكان

و اللي شدني اكثر  انو ما لقيت ولا احد ينتقدو ! كل الناس تنصح بقراته

ومن ضمنهم ولاء هارت ، وانا الصراحة يعجبني ذوقها في الكتب و استمع لرايها و مدونتها كثير

حتى تنسيقات ملابس طلعو للكتاب ، يعني سارت ضجة كبيرة على الكتاب 

بس قبل لا اتكلم عن الكتاب ابغا اقولكم انو راح احاول قد ما اقدر ما احرقلكم القصة ! 

فاللي نفسها تقراء الكتاب لا تشيل هم ما راح احرقلها القصة 

  

 

الكتاب للكاتبة  Rainbow Rowell لها اكثر من كتاب اتصدر المبيعات 

و خصوصا Eleanor & Park 

الكتاب مضمون ان شاء لله في لستتي الجاية  يآآااآي 

fangirl يحكي او يصاحب قصة اختين توأم و دخولهم الجامعة ، الاولى اسمها كاث و ثانية رين 

امهم ما كان نفسها في اطفال و حتي لما حملت ما فكرت الا في اسم و احد اللي هو كاثرين 

فلما جاها توام فصلت الاسم لقسمين كاث-رين ! 

الكتاب اتوقع يناسب المراهقين او الكبار اللي يحبو يقرأو كتب المراهقين الكبار Young Adult 

الكتاب و القصة رومانسية علي دراما ! 

شخصيات الكتاب حلوة خصوصا كاث ( اكيد هي البطلة ) ! حبيت خوفها على ابوها و اختها 

حبيت علاقتها في اختها ، احس الكتاب في من الواقعية شوية 

المهم القصة زي ما قلت تصحب الاختين في تجربتهم الاولي في الجامعة فبعد ما كانو يتشاركو

كل حاجة مع بعض من غرفة ، لملابس ، لصحبات الخ ...

فجاة قررت رين انها تبغا تخوض تجربة الجامعة لوحدها منفصلة عن كاث 

ودا شي ما كان عاجب كاث و خلاها هيا كمان تخوض مغامرة جديدة مع روميت جديدة 

و من جهة ثانية كاث كانت شايلة هم ابوها و هو في البيت لوحده بعد ما نقلو الجامعة الاختين !

وهنا تسير الاحداث بين كاث و رين - كاث و ابوها - كاث و امها - و كاث و ليفاي 

كاث مجنونة في قصة خيالية مشهورة ( كل اللي قراوء الكتاب اتوقعو هاري باتر ) 

فهي من عشقها للقصة حاولت تنسج او تكمل القصة بنفس الشخصيات و نزلتها علي النت

ودا يسمو fanfiction و سار لها معجبين مرة كثير 

الكتاب حلو بس مو مرة لكن اتوقع راح يعجب المراهقين اكثر ، ما ادري عن نفسي و بنسبالي

كان ممكن اقراه بين كتاب و كتاب لتصفية الجو شوية

يعني زي لما تروحي محل عطور ، بين العطر و العطر تشمي قهوة عشان ترجعلك حاسة الشم !

باختصار و بكل بساطة  FanGirl كان بنسبالي القهوة دي ! بين الكتاب و تاني (^^) .



The Program & The Treatment

الكتاب من تاليف الكاتبة Suzanne Young .

الجزء الاول اسمه The Program و الجزء الثاني The treatment

و فيه له جزء ثالث كمان اسمه The Recovery بس لسة انا ما قريته ان شاء لله قريب 

راح اقولكم القصة اول بعدين راح اقول رأي 

القصة تسير في عالم او في وقت يسير انتحار المراهقين مشكلة كبيرة في العالم 

فلما كبرت دي المشكلة و سارت اعداد الانتحارات زيادة اخترعو حاجة اسمها البرنامج 

و هو زي دار اعادة تاهيل لهذولا المراهقين لمدة ٦ اسابيع والبرنامج يعمل علي مسح ذاكرتهم

تقدري تقولي الدار يشبه السجن الي المستشفي يعني ممنوع الخروج و قوانين سجن صارمة

و في نفس الوقت في جلسات علاج و ادوية .... يعني زي مستشفي المجانين تقريبا 

لكن المشكلة هنا انو لما يخرجو من البرنامج يخرجو ناسين كل ذكرياتهم التعيسة و السعيدة 

فسار البرنامج يراقب المراهقين ٢٤ ساعة في كل مكان و اي ردة فعل توحي بأكتئاب الشخص

راح تدخلو البرنامج ، فاهمين كيف ؟!

يعني اذا كان الشخص ما يتكلم ! ما يأكل ! يتعامل مع الناس بعصبية ! غاب عن المدرسة

ما يضحك !علاماته نازلة !يعني اي تعبير عن الاكتئاب راح يدخله البرنامج حتي لو كان فعل عفوي

لكن الادهى و الامر انو اساسا المراهقين سارو هما خايفين انو يدخلو البرنامج

و من دا الخوف و الاحباط و الضغوط سار عندهم اكتئاب !

بطلة القصة اسمها سلون تتعرض سلون لحاجات في حياتها تجبرها انو تكتئب

خصوصا انتحار اخوها !

و تحاول سلون طول الوقت هي و حبيبها جيمس اللي هوا يسير صاحب اخوها المقرب

انو مايلفتو الانتبه لهم و لاكتئابهم 

لكن تسير حادثة كبيرة في حياتهم تخلي كل قوتهم تنهار و بتالي دخولهم الي البرنامج 

سلون ما كانت تبغا تدخل البرنامج لانها ما كانت تبغا تنسي اخوها و ذكرياتها معه

و كل لحظات حياتها السعيدة و المميزة و الخاصة كمان 

وفي الليلة اللي تدخل سلون فيها البرنامج و سط معمعت الوضع تجري على غرفتها !

و تدس (تخبي) تحت سريرها صورة لها هي و اخوها و جيمس

لانها عارفة انهم بعد ما يخذوها راح يتخلصو من كل الحاجات اللي في الغرفة 

قالت عل و عسى ادور تحت مرتبه السرير و تخليني اتذكر ! وتبدا القصة 

راي في الكتاب و القصة باختصار رائعة قلبي دق مع كل المواقف خفت و حزنت و فرحت

حركت احاسيسي على ما يقولون

 خلت قلبي يدق بسرعة في المواقف الصعبة و خلتني افكر بدل و مع سلون

كنت ما انام الليل من القصة ،،، الكتابة رائعة و الحوار مرة حلو .... تستاهل كل دقيقة من وقتي

من احلي الكتب اللي قريتها اقصد سمعتها ، لكن في شي بسيط ضايقني

شفتو الحدث اللي قتلكم انو هو اللي خلا سلون و جيمس ينهارو و يفقدو قوتهم

و اللي دخلهم البرنامج ؟!  السبب دا ...  جابلي اكتئاب !!!

فاللي ابغا اقولو انو ممكن الكتاب يسببلكم اكتئاب حبة ، ما دري  امكن بس انا ؟

ما انصح فيه للمراهقين اقل من ١٥ نقطة على السطر



The Selection & The Elite & The one

في البداية ما اعرف ليش ما كنت متحمسة للكتاب كنت حيرانة بينه و بين سلسلة تانية

لكن ما اعرف ايش اللي خلاني اختارو علي الكتاب الثاني ، بس الحمد لله اخترته

الكتاب من تاليف Kiera cass , الكتاب له ثلاثة اجزاء اول واحد The Selection

وثاني The Elite وثالث The one

القصة كمان رومنسية درامية ( شكلي احب القصص الرومانسية دوبني الاحظ )

المهم الكتاب او القصة عن عالم (اتوقع في المستقبل ) بعد الحرب العالمية الرابعة

فيه الناس ينقسمو لطبقات او درجات من ١ - ٨

الطبقة الاولي هما العائلة الحاكمة و الطبقة الثامنة الشحاتين

و كل طبقة من الطبقات لها عمل معين زي مثل الطبقة الخامسة يعملو مغنين او فنانين

و الطبقة السادسة خدامين و عمال ،،، يعني كل طبقة لها عمل معين و كل احد لازم يتقيد بعملو !

بطلة القصة اسمها اميركا و هي من الطبقة الخامسة

و في حاجة كمان بعد الطبقة الثالثة يبدا الناس يكونو فقراء اكثر من الطبقة اللي قبلها يعني مثلا

الطبقة الثانية اغنياء و الطبقة الثالثة اقل منهم و الرابعة اقل من الثالثة و هكذا

و كانت اميركا من الناس اللي يعتبرو فقراء لدرجة انو ما عندهم اكل ياكلوه

لكنهم احسن من الطبقة الثامنة اكيد !

المهم هذة البلدة يحكمها ملك و ملكة و عندهم امير في سن الزوج

و في عندهم قاعدة انو الامير لما يتزوج تسير مسابقة لاختيار العروس او الاميرة

( الملكة المستقبلية)

فيتم اختيار ٣٥ بنت من البنات المتقدمات للمشاركة اللي يكونو من سنة ١٦ الي ٢٤

و تكون المسابقة على الملأ و علي التلفزيون ( برنامج واقعي ) ريلتي تيفي

و تنقل البنات للقصر و يختار الامير وحدة منهم يعني تقريبا كل فترة تخرج بنت الين ما تسير وحدة

و المسابقة مو معروف و قتها يعني ممكن تخلص في يوم و ممكن تستمر لخمسة سنين

و بطلة القصة اميركا ما كانت تبغا تشارك لكن بعد اصرار امها و فقرهم الشديد و المتعب !

و خصوصا كمان انو اذا تم اختيارها ضمن ال ٣٥ راح ترتفع طبقتها حتي لو ما فازت

 فضطرت للاشتراك

علي رغم انو عندها حبيب ! و المشكلة كمان انو حبيبها كان يصر عليها انها تشارك ! ( لسبب ما )

و في الحقيقة كانو كلهم متوقعين انها ما راح يتم اختيارها ضمن ال ٣٥ لكن المفاجاءة  !

يتم اختيارها و تبدا القصة

زي ما قلتلكم كنت حيرانه اخده او لا و في الاخير اخدته !

و بداية القصة كانت مرة ركيكة ( غير متناسقة ) او ما تحمس 

و كل يوم اقول خليني ابدله ! مو عاجبني ! خليني اخذ التاني

 لكن يوم بعد يوم بدات الاحداث تحمس و تشدني اللين خلصت الاجزاء الثلاثة

الكتاب شوية للمبتدئين يعني بسيط و يخلص بسرعة 

لكن عجبني مرة ، مرة حبيت اميركا !

صح المفروض ما احرقلكم القصة بس ابغا اقولكم ، يالله الشغالات قد ايش حبيتهم يجننو !

انصحك كثير في الكتاب اذا كنتي تبغي كتاب سريع و خفيف و ممتع 

 



Since You've Been Gone

الكتاب من تاليف Morgan Matson

القصة تتكلم عن بنتين هما ايميلي و سلون ، هذولا البنتين مرة best friend

ايميلي البنت الهادية اللي ما تحب تخوض ولا مغامرة و ما تحب تكون محط الانظار

على عكس صحبتها سلون

سلون البنت الجريئة الجميلة اللي عايشة حياتها بجنون و اللي تلفت الانظار لها في اي مكان

المهم في اجازة الصيف تختفي سلون من غير اي مقدمات لا رسالة و لا مكالمة و لاشي ؟!!

لكن تصل لي ايميلي رسالة منها (سلون) فيها لستة ل١٣ مهمة مجنونة لازم ايميلي تعملها

الشي الوحيد اللي فكرت فيه ايميلي انو امكن هذة اللستة هي اللي توصلها لسلون

و تبدا في تطبيق دي المهمات المجنونة بس عشان تصل لسلون

راي في القصة الصراحة مافي شي يعبر  عن شعوري الا دا الشكل 



نعم دا كان شكلي اول ماخلصت الكتاب ، كدا خلصت الكتاب و ادور احد احضنة 

بس للاسف خلصته متاخر في الليل و الكل كان نايم 

القصة رائعة بمعني الكلمة كويس انو قريتها، يالله قد ايش علاقة ايميلي و سلون حلوة

ابغا احد يعملي لسته كدة ؟!

بس في اشياء او اجزاء ما كان لها داعي ، مادري احس في شي ناقص

بس انا اغرمت اكثر شي في شخصيات الكتاب ايميلي و سلون خصوصا سلون

و انصحك بشدة بشدة انك تاخدي الكتاب السمعي لانه اعطي الشخصيات حياة اكثر

و اتوقع لو ما اخدته كتاب سمعي ما كان حبيته قد كدا ، لا مو اتوقع اكيد ماكان حبيته كدا

انصح بشدة في الكتاب السمعي او تهدي لصحبتك الصدوقة هدية ترمز عن صداقتكم

اذا كنتي تحبي الكتب ال girly راح يعجبك الكتاب

 

و لعلمكم راح ارجع اسمع الكتاب مرة ثانية من كثر ما حبيته ان شاء لله 

بس اقبل لا انهي راي في الكتاب ، بالله ايش رايك في غلاف الكتاب ؟! جدا جميل صح

كدا انا انهيت البوست ان شاء لله قدرت اعطيكم فكرة وافية عن الكتب من غير ما احرقها لكم

و ان شاء لله استنو الاجزاء التانية من السلسلة


دا فيديو عملتة في اليوتيوب عن البوست 


 

شكرا لكم علي حسن المتابعة

و خليكم قريب لبوست قريب ان شااء لله  

SHARE:

ليست هناك تعليقات

إرسال تعليق

Blogger Template Created by pipdig