الجمعة، 15 مايو 2015

Herbal Tea Café


السلام عليكم بنات 

بوست اليوم لبنات الشرقية و زوارها 

هذة كانت اول مرة ازور  فيها الشرقية

و خصوصا الخبر 

مرة حبيت الخبر و حبيت اهل الخبر فديتهم ولله 

المهم الصراحة من و انا في الرياض

كنت اشوف صور لدا الكوفي و اقول ان شاء لله ازوره يوم من الايام 

و الحمد لله ربي تمملي و زرته ، كان يوم الجمعة  بعد صلاة الجمعة مباشرة و قبل السفر  



الكوفي ماكان في و لا احد الا احنا ؟! مع انو كان في كم طاولة محجوزة و كان قسم الشباب فل 

مادري هو فاضي او جديد او تبدا الزحمة بعد العصر ؟

بس بيني و بينكم كويس انو ما كان في احد عشان بجد اخدت راحتي في التصوير 

و حسيت بحميمية المكان اكثر .

و اتوقع و اذا مني غلطانة الكوفي لسة جديد ماله ٩ شهور او اقل

علي ما سمعت طبعا !

 مقهى شاي ألاعشاب بالخبر، مقابل الدانوب بفندق شرفة الخليج

أوقات العمل: ٨صباحا-١١مساء يسمح للأطفال فوق ٤سنوات في القسم الخاص للأطفال 

المكان جدا جدا راقي من الداخل ، و الجو العام كمان حبيته 

الكوفي بطابع اوربي بحت مرة كلاسيك

عاملين مكس بين الطابع الاوربي في التصاميم واغاني فيروز

اللي ما يسمعو اغاني ما راح يناسبهم الوضع لانو الاغاني شغاله طول الوقت 

و مافي برتشينات كمان 














حبيت مرة انهم حاطين كتب في كل كورنر او زاوية 

و ما اكتفو بالكتب الانجليزية لا كان في كتب عربية دينية كمان


حبيت طريقتهم لترتيب الكتب مرة Messy فوضوي 

يعني كل التفاصيل الصغيرة عاملينها عشان تخدم انك تحسي نفسك كانك في بيتك 

في كل زاوية في تفصيل ، نفسك تروحي كل زاوية عشان تتفحصيها اكثر عن قرب 


كراسيهم مريحة خصوصا الكنب ، المكان نظيف و صغير 

اتوقع اذا كان زحمة لازم تحجزي قبلها 

احسو كدا مكان ينفع لجمعة بنات ، بعد الجامعة او المذاكرة اقصد المراجعة (^^)

يعني مكان لترويق ،،،،


بنسبة لطلباتنا ، عشان اكون صريحة معاكم انا ما روحت الا عشان اجرب الشاهي و الكيك 

ما كنا حاسبين انو نبغا ناكل ، لانو اساسا كان فطورنا متاخر و لسة ما حسينا بالجوع 

لكن لما وصلنا قلنا ليش لا خلينا مرة و حدة نجرب اكلهم 

عن نفسي طلبت فتوشيني بالكريمة و عصير اتوقع رمان بالكركادي انا طلبت انو هو يخترلي 




و جبلنا  دا العصير 





الصراحة الفوتشيني مو قد كدا يعني ما عجبتني ، نفس حقت البيت او اسوء  

وصلت حارة لكن مرة سايلة ، للاسف ماعجبتني الصراحة 

ما اتوقع انها من الاطباق اللي يتميز فيها الكافي 

بس دا الشئ عادي لانو هو مو مطعم هوا كافي

دائما تكون جودة الكافي اقل من جودة المطعم ، وهذا المتعارف عليه و الطبيعي

يعني الي اقصدو انو لما تروحي كافي

انتي لازم تحكمي علي جودة الكافي و الشاي و الكيك مو جودة الاكل 

العصير الصراحة ماعلى كلام جيد جدا و يستاهل التجربة 

كمية الاكل و العصير كانت كافية و زيادة كمان 

و بنسبة لطلب الثاني، و سامحوني عشان نسيت اسم الطلب

و المشكلة جالسة ادور علي المينيو تبعهم في النت مني قادرة الاقي بس راح اشرحلكم هوا 





تصدقو جعت و انا جالسة اكتب (^^)

المهم الطبق عبارة عن سمك مغلف بالبقسماط مع الكريمة البيضاء

الطبق جيد جدا مع انو عادة انا ما احب اطباق السمك كثير ، لكن فعلن طعم

الكريمة ممتازة اكثر من حقت الفوتشيني ، و الطبق كان ممتاز و الكمية حلوة بنسبة لشخص واحد

بعدها طلبنا الشاي و الحلا ، و هو سبب زيارتنا الاساسية 

في عندهم cake display  عليها الكيك و الاسماء كمان عشان تختاري من الشكل لو حابة 

و فعلن يجيكي زي الشكل المعروض تماما ، حبيت الفكرة !



اخذنا شاي انجليزي ، الاكواب مرة حلوة و الشاي جدا جدا طعم 

لدرجة كل ما نروح كافي و نطلب شاي انجليزي ، نقول لا مو بجودة كافي شاي الاعشاب

يستخدمو ماركة او نوعية جيدة الصراحة 




و كمان طلبنا كيكة الورد و كيكة الليمون 

طريقة تزينهم و تقديمهم للكيك عجبتني ، عن نفسي مرة عجبني الكيك 

و لله يستحق التجربة خصوصا انو جودة الشاي برز اكثر طعم الكيك (يعني كان مكس جيد)

في عندهم انواع شاي و كيك ثانية لكن انا احب اجرب ال Basics الاساسيات 

و اتوقع تعرفي جودة المطعم او تبان جودة المطعم من جودة الاطباق الاساسية 






و اخير راي فيه الصراحة الكافي بشكل عام جميل جدا تعبانين علي التصاميم 

فكرة حلوة ، و انا عموما تعجبني الكافيهات و المطاعم الحميمية اللي زي كدا 

بنسبة للخدمة كانت حلوة العاملين مرة حبوبين مع اني لاحظت كثير ما يمدحو الخدمة 

عني نفسي و من حظي كانت الخدمة جيدة جدا لكن امكن بحكم انو كنا الوحيدين في الكافي ؟

افتكر كمان انو لما طلبنا الحساب سألني الويتر او الجرسون عن صحني و ليش ما اكلت 

طبعا باسلوب حلو ! و جلس يحاول يقولي انو ليش الاكل ما عجبك و يستفسر من هنا و من هنا 

واذا حابة تغير الطلب و من دا الكلام كله ! يعني الخدمة حلوة 

و على سيرة الحساب ، مرة عجبتني طريقة تقديمهم للفاتورة 





و بنسبة للسلبيات 

الاكل اتاخر حبة بنسبة لبس شخصين موجودين 

المينيو ما يشرح مضبوط الطبق ، العمال اللي قابلتهم ما يتكلمو عربي 

فاذا كنتي ما تتكلمي انجليزي ممكن تتعبي شوية

و مع ذلك العمال يحاولو جهدهم عشان يفهموكي

و احنا جالسين كانو لسة جالسين ينظفو ، و ما اشوف دا شئ صح 

لكن و مع ذلك كنت لما اصور يوقف العامل عشان اصور و اقوله عادي كمل يقولي لا لا صوري 

يعني ال Staff حبوبين و متعاونين و بشوشين 

بشكل عام عجبني الاحساس العام للمكان و يستاهل التجربة 

وعجبتني الالوان و الصحون و الاكواب كمان 

و ان شاء لله اذا رجعت الخبر راح ازورو مرة تانية 

 

ان شاء لله عجبكم البوست 

و خليكم قريب لبوست قريب ان شاء لله 

 

شايفين كيف كنت ماخذة راحتي في كمية الصور 




SHARE:

ليست هناك تعليقات

إرسال تعليق

Blogger Template Created by pipdig