الخميس، 11 يونيو 2015

كيف تختاري خداديات الكنب و تعمليلها مكس


السلام عليكم بنات 

كيفكم ؟! و ايش اخباركم ؟ و لله يبلغنا رمضان يارب و كل من نحب 

ندخل على الموضوع دوغري " بسرعة " 

من ابسط الحاجات اللي ممكن تغير شكل الغرفة

و تعطيها شكل احلا ،،،،، هي الخداديات 

مع انها بسيطة لكن ممكن تكون معقدة شوية !!!

لانو هي حالة من الاثنين يا انها تطلع الغرفة بشكل حلو او تطلعها بايخة  

اليوم ابغا اتكلملكم علي الاشياء او النقاط اللي انا اعرفها

و اكيد ممكن تكون في حاجات تانية تخص الموضوع 



لكن دي طريقتي و اكيد لو تعرفو معلومات ما كتبتها ياليت تشاركوني هيا



١- اول مرحلة اختيار الالوان 

اختاري اللوان متناسقة مع بعض او من نفس الدرجة او فيها لون مشترك

يعني اختاري حاجة متناسقة مع بعض 

اذا حابين اعمل بوست عن الالوان قولولي اشاركم طريقتي و ان شاء لله ماراح اقصر معاكم 

 لما تختاري الالوان حاولي ما تكثري الالوان عن ٣ و ما تقليلي عن ٢ 

لما اقول ثلاث يعني ما تحسبي الالوان اللي جوه الخدادية 

اقصد انك تحسبي اللون الطاغي علي الخدادية 



٢- حجم النقشات 

خذي احجام مختلفة من النقشات (صغير- وسط - كبير )

لا تاخدي ٢ كبيرة او ٣ صغيرة لا خدي من كل حجم شكل و احد فقط 




و عشان تعرفي اكثر او تفرقي اكثر بين الاحجام اعملي دي الحركة راح تساعدك ان شاء لله 

حطي الشكلين جنب بعض و حاولي تغمضي عينك الين ما تسير الرؤيا مشوشة او مو باينة 

هنا و انتي تطالعي فيهم اذا عرفتي تفرقي بين الحجمين معنها انتي في الامان 

و اذا لا معناها الحجمين نفس بعض او قريب جدا من بعض ، فختاري و احد منهم 

افتكري دايما انو النقشات الكبيرة تعطي تناغم للمكان او الغرفة 

و النقشات الصغيرة للفت الانتباه إلى منطقة محددة من الغرفة.

عشان اشرحلكم اكثر كيف تغمضي عينك ما لقيتلكم غير دي الصورة !! ان شاء لله فهمتوني 

 


٣ـ الطبعات و النقشات 

لما تختاريها حاولي تقليلي عدد الطبعات الي ٣ او ٢ علي الكنبة و ٣ الي ٥ في الغرقة كاملة

و اضيفي لون سادة و شي  ذو ملمس يعني وسادة فرو سادة مثلا ! 

او مثلا المفرش اللي يترمي علي الكنبة اللي هو ال throw يكون فرو سادة !

هذا هو ال Throw



يعني دخلي حاجة لها ملمس 

حاولي ما تخلي المطبوعات كلها مع بعض ... افصليها عن بعض

لانو ما راح يخلي في توازن و راحة للعين

حتي الثرو المفرش اللي علي الكنبة داخل في الموضوع 

 يعني لا تخلي جهة من الكنبة كلها خداديات منقشة و الزاوية التانية سادة 

لا حاولي توازني في الموضوع و كمان تحسبي ال throw معاهم لو كان في نقوش 


و اخير في طريقة كمان مرة راح تسهل عليك العملية 

ايش هيا ؟؟!! شوفي انك تعملي جدول من ٣ خانات اللي هي 

حجم النقوش و نمط النقوش و مشغول او بسيط زي الجدول دا اللي تحت


و حاولي انك توصلي بين الكلمات من غير تكرار 

يعني مثل تاخدي خدادية من النمط الطبيعي زي الورد مثلا و يكون حجم الورد كبير 

و تكون مشغولة يعني الورود كثير و تحسي الخدادية زحمة من الورود 

كذا ايش يبقالك هندسي و حيادي من فئة النمط و صغير و وسط من فئة الحجم و اخير بسيط 

يعني راح تجيبي خدادية عليها رسم هندسي و ممكن يكون الرسم و سط 

كدا يبقالك بس توفري خدادية حيادية بسيطة عليها نقشات صغيرة 

فهمتو كيف الجدول يشتغل ؟! 

يعني اخيرا و لتلخيص ،،  عشان تختاري الخداديات صح و تعمليلها مكس صح

لازم تفكري في النقاط المذكورة و اللي هيا

لون - حجم - نمط 

و نقطة مهمة يابنات لازم تتاكدي انو بيت الخدادية تقدري تفكي و تغسلي 

مرة راح تحتاري و راح يوفر عليكي فلوسك ، صدقيني 

بكدا نكون خلصنا البوست ان شاء لله اكون عرفت افهمك الجدول

و اكيد اتمني يكون البوست فادكم و اضفلكم حاجة جديدة في يومكم

شكرا لكم علي حسن المتابعة

و خليكم قريب لبوست قريب ان شاء لله


SHARE:

هناك تعليقان (2)

  1. جميييل واستفدت من الموضوع ، بس سوال انا عندي كنب زاويه ولحد الان ما فصلت الكوشنز لاني ما اعرف المقاسات اللي نفس الصوره الاولى ياليت تقولين كم يكون حجم لارج والاسمول والميديوم ، اكون شاكره لك

    ردحذف
    الردود
    1. حبيبي كلك ذوق ، انا اقدر انصحك بانك تاخدي كوشن جاهزة و تشوفي الحجم المناسب بعدين تفصلي عليها الاغطية .

      حذف

Blogger Template Created by pipdig