السبت، 20 يونيو 2015

مشترياتي من العود و البخور


السلام عليكم بنات  

قبل فترة نزلت السوق و كنت مخصصة ابغا اروح ماك 

و الماجد و القرشي  ، خصوصا انو  كانو عاملين تخفيضات

من جدا ما تحلا التخفيضات الا في محلات البخور !! 

لانو نفس البضاعة ما تتغير بس يسير عليها تخفيض جامد 

فدائما انصح انو تحطي و قت التخفيض في الاجندة  و تخلي عينك عليها 



مو عشان غالي او شي ، لا ! لانو اذا كنتي زيي ! راح تشتري كمية راح توفري

انا اخد هدايا و لنفسي و للبيت و للمناسبات يعني اخد مجموعة حلوة 

فعشان كدا مرة اهتم اروح وقت التخفيض !! منها اقتصد و منها اشتري كمية حلوة

المهم البوست خليته بوستين

بوست لمشتريات البخور و بوست لمشتريات ماك

و قلت ماشاء لله بما اننا دخلنا رمضان قلت انزل بوست البخور اول

البوست في حاجات دايماًَ اخدها و في حاجات اول مرة اشتريها

في البداية راح اقولكم مشترياتي و بعدها طريقتي في التبخير

اتوقع طريقتي كل الناس تعملها او تعرفها ؟ مادري !!

لكن حبيت اطلعكم عليها بس للفائدة



اول حاجة التولات من القرشي  و الي دايماًً اخدها و احرص انها تكون عندي 

مسك العروسة - مسك الختام - مسك الطهارة - دهن العود 

و انا احب اخد منهم ربع تولة "حبتين" يعني المفروض اخذ نص تولة بس انا احب اقسمها 

عشان لا تتفتح كل شوية فاخلص و حدة و ابدء في الثانية جديدة

و تطول معايا ما شاء لله ، يعني انتي و استخدامك 

مسك الجسم ، و لله افضل مسك جسم من القرشي

كدا تحسي اصلي !! و ريحته قوية ، دا المسك لازم يكون متوفر عند كل بنت

العبوة حلوة و البكجنق " التغليف " حلو كمان 



اخدت العود المعطر الملكي . اخ ايش اقولكم و ايش اخلي علي ريحته بس ، جنان !!

مرة حلو و باين فخم 



كمان اخدت معمول القرشي ، هذا المعمول اطلع كل الحجج عشان ابخر به 



من جدا تري يا بنات حلو ، امكن كلكم تعرفو

بس جد كل الحاجات اللي اقول عليها حلوة ، حلوة  


و اخير وليس اخرا ، اخدت من القرشي العود الكمبودي و يعتبر من اثقل انوع العود




هذة بنسبة للحاجات الي اخدها دائماً و لازم تكون عندي و كمان تعتبر من اساسيات التطيب 

نجي للحاجات اللي الصراحة اول مرة اخدها و اجربها ، كانت كلها من الماجد 

الصراحة حبيت اجربها بعد ما سمعت عنها من البلوقر نورة العوفي 



اول حاجة كانت من مجموعة رتاج ، ريتاج للجسم و رتاج العطر 

يا جماعة اتعب اتعب و انا امدح دا العطر ، مرة حلوة و باختصار لازم تجربوها 

الصراحة ما حبيت اخد المجموعة كاملة قلت اخاف في البيت تطلع ريحة تانية او خفيفة 

صدقوني يا بنات من احلا الروائح ، حتي لو ما تحبي العود و البخور راح تحبيها . 






و اخدت كمان من مجموعة العاذرية ، عطر العاذرية

مرة مرة قوي ويعتبر زي المثبت ، ريحته تجلس و فخامة . كانك دوبك راجعة من مناسبة

في البداية ما حبيتها لكن استعمال عن استعمال مرة اتعلق فيه

لكن العيب الوحيد ، عبوته ؟!! مرة يبان او مطلعه كانه رخيص للاسف

المهم هو يعتبر من العطور الفرنسية الشرقية



اخدت كمان من المجموعة فراش العاذرية 

من كثر ما هو حلو سرت ارش علي اي حاجة في البيت كنب ، ستاير ، مفارش سرير 

المكنسة من و راء عشان تطلع ريحة حلوة ، كل شي ،،، بجد حلو 

حتي زوجي من كثر ما ريحتة عجبتة سار يبخه علي بدلة العمل (^^) سرنا مدمنين 

و الريحة  تجلس كمان

زي مثلا لما ابخ علي كنب الصالة ، لما اصحي اليوم الثاني و انزل الصالة ريحتة لسا جالسة

ولله سرت ما استغني عنه و اتوقع راح يخلص بسرعة (^^)


اخيرا اخدت من نفس المجموعة فواحة العاذرية ، ولله جدا انصح تجربو المجموعتين رتاج و العاذرية 

اذا تبغي الكل يقول عنك ست بيت ممتازة ، جربي الفواحة 



نجي في طريقتي في تعطير و تبخير جسمي و شعري 

اولاً دي الطريقة استخدمها كل اسبوع و لما تكون عندي مناسبة حتي لو بسيطة 

يعني زي جمعة الاهل او الزوارة ، و الطريقة مرة بسيطة و تثبت الريحة علي جسمك 

اول حاجة استحما و عادي استخدم مستحضرات الاستحمام اياً كانت 

بعدها انشف جسمي و شعري تنشيف خفيف مرة ، يعني اخلي جسمي رطب 

احط اي نوع مسك ابغا علي يدي مع شوية مرة زيت جسم ، اذا كان ماعندي مو لازم 

و ادهن وراء الاذن و علي الرقبة مكان النبض و مكان النبض علي الايادي 

و احط عطر مسك الجسم او اي عطر جسم متوفر عندك

و بعدها البس جلابية مغربية ببرنوص او اي حاجة تشبهه زي روب الاستحمام 

بس الجلابية ميزتها انها واسعة و مكان الاتصال بين البرنوص و الجلابية اوسع من الروب 

ان شاء لله فهمتوني !؟ يعني اللي اقصده انو البرنوص و الجلابية كانها قطعة و احدة

بحيث انو تخلي مجال للبخور يوصل للشعر 

بعدها اجيب فحمتي و احط البخور اللي ابغا و احطه تحت الجلابية و اجلس شوية

بعدها

البس ملابسي و امشط شعري و احط اي مسك علي يدي مع شوية زيت شعر من غير عطر 

و ادهن اطراف شعري ، و ابخر شعري و هو رطب 

بعدها ابخر نفسي مرة ثانية و بعدها اعطر نفسي باي عطر اصلي و بعدها ابخر نفسي مرة ثانية 

عشان تثبت الريجة ، وبس 

هنا احط كريم الجسم و اسشور شعري

و للمرة الاخيرة احط مسك مع نقطة زيت شعر و ادهن اطراف الشعر 

 وبعدها و اخر شي ابخر شعري 

عارفة الطريقة طويلة بس بجد تخلي ريحتك عذاب ، و مع التعود تسير سهلة و بسرعة تسويها

للاستشهاد 

اي احد جنبك راح يشم ريحتك

 افتكر مرة و انا اسلم علي خالتي كدا ضمتني اكثر و هيا تبوسني عشان تشمني و تشم شعري 

و كمان مرة زرت اهلي و ما اخدت كل عدتي معايا فما كنت اعمل السلسلة الطويلة دي 

المهم يعني مر علي شعري فترة اسبوع و كم يوم و انا ما بخرته و ولله يا جماعة و من غير مبالغة 

كنت جالسة اسشور شعري جنب اختي و تقولي شعرك مرة ريحتة عودة 

يعني بعد استحمامين ، و الريحة لسة باينة ، الصراحة انا ما حسيت بالريحة 

لكن اختي تقول ولله شعرك ريحته عودا مرة 

 

كدا خلصنا البوست ان شاء لله يكون فادكم 

و خليكم قريب لبوست قريب ان شاء لله 

SHARE:

ليست هناك تعليقات

إرسال تعليق

Blogger Template Created by pipdig