الجمعة، 12 يونيو 2015

dr. dennis gross alpha beta peel 14 day challenge


السلام عليكم بنات اليوم بوست جديد مختص للبشرة 

alpha beta peel هو عبارة عن منتج تقشير 

اخدته من نورد ستروم افتكر ب ٦٠ دولار 

المهم هو عبارة عن خطوتين يوميا لمرة وحدة في اليوم 

المنتج من انتاج دكتور اسمه Dr. Dennis Gross

و اتوقع انو المنتج سبب شهرت البراند او  اول او افضل منتج في البراند 



علي حسب ما سمعت ! 

المنتج يوعد ب مظهر صحي شبابي او اصغر اكثر

يحارب التجاعيد و الخطوط الرفيعة ، يحارب المسامات و يوحد لون البشرة

ويعتبر تقشير لطيف علي البشرة 

و هذا كله من غير اي متاعب مصاحبة للتقشير او بعدها

يعني ما راح يكون في الوقت الضايع اللي بعد التقشير 

الاسبوع داك اللي بعد التقشير  ،اللي ما تقدري تشوفي احد و لا احد يشوفك 

و اخير يعطيك قلو او مظهر صحي مشرق وقت التقشير 



المنتج عبارة خطوتين  ١  و  ٢ 

كذا كانها مسحات طبية بس انها اكبر في الحجم 

طريقة الاستخدام 

تسخدمي يوميا مساء او صباحا ، بعد ما تغسلي و جهك و تجففي 

امسحي مسحة الخطوة الاولي علي وجه نظيف ناشف مستخدمة حركة دائرية تصاعدين 

بعدها انتظري دقيقتين و اتبعيها ب مسحة خطوة رقم ٢ 

اخير و بعد ما تحسي و جهك نشف من الخطوة رقم ٢ حطي الكريم المرطب الخاص فيكي 

طبعا ما تغسلي و جهك بعد المسحة الثانية !

ايش ممكن تتوقعي من المنتج ؟

في العلبة كاتبين ايش ممكن تتوقعي كل يوم من استخدام المنتج 

اليوم الاول : راح تلاحظي بشرة ناعمة على طول من اول استعمال 

اليوم الثالث  : البشرة راح تبان اكثر صحة و اشراق 

اليوم السابع : بشرة ارطب و بشرة تطلع او تظهر المكياج احلي 

اليوم العاشر : المسامات يصغر حجمها 

اليوم الرابع عشر : تغير و اضح في توحيد لون البشرة و التجاعيد 



نجي لراي في المنتج 

المنتج حقي يعتبر حاجة مصغرة من المنتج الاساسي بغرض التجربة قبل ما تشتري المنتج الاساسي

المنتج الاساسي اتوقع انه لا يقل عن ٣٠ مسحة ل ٣٠ يوم ، اما حقي ١٤ مسحة ل ١٤ يوم

و هو اساسا اسمه تحدي ال ١٤ يوم ، و مع ذلك غالي !

المسحات تجي مغلفة كدا زي المسحات الطبية ، و في شكل لا داخل عبوات دائرية من غير تغليف 

و الصراحة ما انصح بالي في عبوات لانو مع كل فتحة راح تجف المسحات 

و كانك يا ابو زيد ما غزيت ! 

انا اخدت المنتج بس عشان حاجة و احدة اللي هي توحيد لون البشرة 

 ولله المنتج كان علي تقيمات حلوة ، فقلت خليني اجربه و خصوصا انو اللي انتجه دكتور 

مادري اطمنت !! 

المهم كنت استخدم المنتج بظبط زي مو مذكور ، و كنت اشوف  بنات يقصو المسحة نصين 

عشان مرة حابينها ، فيطول عدد الايام معاهم ، يعني بدل ماهو ١٤ يسير ٢٨ يوم 

بس اتوقع غلط لانو اولآ فين راح يخلو النصة اللي ما استخدموها و اكيد راح تنشف و تتجرثم 

و كمان اكيد و اتوقع انهم حاسبين بظبط قد ايش مكونات لازم تكون في المسحة 

او امكن الكمية الموجودة في المسحة هي الكمية المفترضة لكل يوم !!؟

يعني باختصار ما اشوفها فكرة حكيمة

عشان اكون صريحة معاكم اول ما شوفت المسحة حسيت انو انضحك عليا ؟! 

قعدت اقول ايش الفرق بينها و بين اي مسحة طبية ؟! امكن هيا مسحة طبية و احنا محنا عارفين 

 

و اخير بعد ما خلصت ال ١٤ يوم اقدر اقول و للاسف ما عجني و ما حبيته 

اولا و مادري ليش و كيف راح عن بالي انو الابلكيشن اللي زي كدا تطلع حبوب و ما تناسبني

يعني اللي زي كدا مسحات او منديل ازالة المكياج او اي حاجة يشبها تطلعلي حبوب 

احسها طلعتلي حبوب صغيرة مرة ، طول فترة الاستخدام و المفروض المنتج يمنع ظهور الحبوب 

ابدا ما حسيت اي تغير في البشرة و كمان ما اتوقع انو المنتج كافي عشان تشوفي نتيجة 

يعني اسلوب ال ١٤ يوم بس دعاية عشان تشتري العبوة الاصلية

الشي اللي حسيته صح او الوحيد ! انو فعلن يخلي البشرة ناعمة و مشرقة  !!

سعره غالي علي غير فايدة و للاسف ولله مرة كان نفسي احبة و يكون منتج حلو

مانصح فيها للي بشرتهم دهنية او لها قابلية للحبوب نقطة علي السطر .

يعني الصراحة كان مضيعة وقت و اتوقع هو تري مرة مرة تقشير خفيف

زي تقشير الفواكه و الاحماض الخفيفة ، يعني باختصار ما انصح فيه

مع انو في كم حاجة عاجبتني في البراند و حابة اجربها 




جاء عينه مع المنتج Ferulic Acid + Retinol Brightening Solution

اتوقع يساعد للتفتيح ، بس للاسف ما اتستخدمه

لانو ابغا اعطيكم فكرة و افية عن استخدام المنتج من غير اي اضافات

 

كدا نكون خلصنا البوست ان شاء لله اكون افدتكم

وشكرا لكم علي حسن المتابعة

وخليكم قريب لبوست قريب ان شاء لله 

SHARE:

ليست هناك تعليقات

إرسال تعليق

Blogger Template Created by pipdig