الأحد، 26 يوليو 2015

2 BooksLovers#


السلام عليكم بنات مرة متاسفة علي التاخير !

لكن راح اخوض في التفاصيل ان شاء لله البوست الجاي

ان شاء لله بكرة ينزل ، اذا ربي احيانا 

لكن خلوني ابدا في دا البوست اول !

البوست دا الجزء الثاني من سلسلة اخر الكتب اللي قريتها 

و اخترتلها اسم BooksLovers# 

اذا عندكم اسم احلا قولولي ، لانو الاسم طلع معايا في اخر لحظة 



بسم لله نبدا 



DEPARTURE

القصة عن مجموعة اشخاص طيارتهم تطيح في مكان قريب من

بريطانيا

علي حسب كلام مساعد الطيار انو بسبب شي

او نور ساطع شافوه في السماء

و لي اول مرة يشفونه  !

يحاول ابطال القصة ان ينقذو اكثر عدد من الناس

لكن للاسف مو الكل ينجو 

الابطال هم كاتبة ، سيدة مختصة في الطب ، رجل من عائلة معروفة

و كمان في كم شخصية لكن الثلاثة هذولا هم الاهم 

 المهم الناجون يجلسو ينتظرو الانقاذ اللي المفروض يجي

بعد كم ساعة او في وقت قصير

لانو اولا المكان مو بعيد

و ثانيا الكابتن اعطي اشارة للمركز قبل ما تطيح الطيارة

لكن يمر اليوم الاول و الثاني و الثالث و محد جاهم و الكل يجلس يتوقع ليش ؟

هل قامت الحرب .. هل هل ؟

و فجاة لما يقررو يتجولو في المكان عشان يجمعو اكل ، هناك في مكان ما وجدو شي غريب جدا

و من خلاله يكتشفو هما فين ؟ و ليش محد جاهم و ايش سبب سقوطهم ؟

 

الكتاب كان سمعي فكانت الاصوات بلهجة بريطانية ، و مو كل اللهجات البريطانية  تعجبني

صعب اركز معها !

و كانت القصة تنقل من عدة اشخاص ، يعني الفصل الاول كان بصوت الكاتبة

و الفصل الثاني بصوت الدكتورة 

و الفصل الثالث كان بصوت الرجل الثالث ، ما اعرف دا الشي ما خلاني افهم او احس بالشخصيات 

القصة فكرتها مرة حلوة لكن الكتابة ما كانت حلوة او بالاصح الالقاء ما كان حلو

امكن دا من الكتب اللي اقولكم لا تاخدوه سمعي 

افضل انا الورقي ، باختصار فكرة حلوة لكن اسلوب مو قد كده 

  

 

 Landline 

القصة عن عائلة تتكون من جورجي و زوجها و بناتهم الصغار

 في موسم الكريسمس كانو متفقين انهم يروحو عند الجدة

اللي هي ام الابو في الاسكا

يعني يقضو العيد عندها

 و قبل الرحلة بكم يوم الام او جورجي يطراء عليها او يجيها اهم عرض

في حياتها !

و هو انو تم اختيار مسلسلها للعرض التلفزيوني ، و تقرر انها ما تروح مع العائلة

 مما يودي الي انزعاج الاب نيل

المهم فيسافر الاب و بناته الاثنين و هو زعلان فما يسير يكلمها

او هي تسير ماهي قادرة توصلو و يأنبها ضميرها ، و تحس انو راح تفقد عائلتها

و في يوم و هي عند امها تلاقي تليفون اصفر و تاخده عشان تدق علي زوجها

و المفاجاة انو اللي راح تتواصل معه هو زوجها لكن زوجها قبل ١٥ سنة

فتبدا تتعرف عليه و علي حاجات جديدة

و تبدا القصة .


الكتاب للكاتبة Rainbow Rowell اللي كتبت Fangirl اللي كتبت عنه في الجزء الاول من السلسلة

الكتاب كان عليه مدح كثير زي كل كتب Rainbow

لكن للاسف مرة ما عجبني ! احس كتب Rainbow مافيها قصة ، لكنها تبدع في كتابة المحادثات

الصراحة ما قد شفت شخصية مستفزة زي الزوج نيل !

لكن الشخصيات اللي تبتكرها Rainbow مرة و اقعية ، بس ما حبيت القصة للاسف 




سعودي في اسرائيل 

القصة عن شاب سعودي يدرس في اسرائيل و حبيبته يهودية 

المهم القصة كلها عبارة انو هو يكلمها في التلفون

او برنامج محادثة الكتروني

يحكيها عن اللي سار في السعودية  عام ٢٠٢٢ ميلادي 

و هي كارثة طبيعية هزت العالم ككل 

 

الكتاب للاستاذ د. عبداالله المسند

أستاذ مشارك بقسم الجغرافيا بجامعة القصيم

الكتاب كان الكتروني

الدكتور عبدلله نزل النسخة علي حسابه في توتير

الصراحة اللي جذبني في الكتاب اسمه كان مرة يجذب 

للاسف القصة ما كانت بالمستوي المطلوب كان باين اسلوب المبتدئين في الكتابة 

 الدكتور عبد لله ليس كاتب لكن اتوقع هو كان يبغى يوصلنا فكرة معينة

في مجاله  او تخصصه " الجغرافيا "

و اتوقع انه وصلها صح ، الا وهي ايش ممكن يسير في العالم 

و السعودية خصوصا اذا فقدنا النفط ! لعنة النفط 

الصراحة حبيت التفاصيل العلمية ، وشرحه بترتيب ايش ممكن يسير لدرجة اني خفت !

الصراحة قال حاجات ما كونت اتوقعها و لا راح تجي علي بالي

و حسيت قد ايش احنا ما عندنا موارد اخري غير النفط  

القصة قصيرة جدا ممكن تخلصينها في يوم و لو حابة تقري كتاب سريع مثل في الطيارة 

الصراحة انا مرة اتفق في حاجات كثيرة مع الدكتور

 حاجات لازم نغيرها فينا كخليجين حاجات يارب تتغير قبل فوات الاوان 

حسيت بقيمتنا

الصراحة حسيت بقيمة السعودية بنسبة لكل العالم و كيف اذا احنا سرلنا شي لا قدر لله

راح يآثر دا الشي في كل العالم 

و قد ايش احنا ممكن نكون فريسة قيمة لكثير ناس ، الله يحفظ بلدنا من كل شر و يرزقنا الحكمة 

الكتاب كا قصة ماهي حلوة ، لكن لو تبغي تعرفي احداث علمية ممكن تسير لنا اذا فقدنا البترول

و ماكان في موارد ثانية انصحك في الكتاب 




The Recovery

هذا الجزء الثالث و الاخير من سلسلة كتاب البرنامج اللي كتبت عنه في بداية السلسلة 

انا في البداية لما خلصت الكتاب الثاني اللي هو العلاج او The Treatment 

كانت نهاية الكتاب توحي انو خلاص دي النهاية 

فلما شفت الجزء الثالث قولت اكيد في شئ جديد سار

 اكيد في شي كان بين السطور في الاجزاء الاولى انا ما انتبهت لها 

و دحين ظهرت في الجزء الثالث ! 

لكن لا مو زي ما اتوقعت ، الجزء الثالث فقط يشرح ايش سار في حياة ابطال القصة بعد نهاية القصة 

فهمتو كيف ؟! 

و اساسا الجزء الثالث مو عن الشخصية الاساسية في القصة اللي هي سلون ! 

لا ، الجزء الثالث عن شخصية رام ، اللي قرت الكتاب راح تعرف مين رام 

المهم الكتاب بس يشرحلكم ايش سار في حياة كل شخصية من شخصيات الكتاب

يعني مافي قصة 

فاذا كنتي حابة تعرفي ايش سار لكل شخصية اشتري الكتاب مع انو نهاية الكتاب الثاني تكفي 

القصة كانت حلوة ، الجزء الثالث مالو داعي 



GIRLBOSS#

كثير ناس اتكلمو عن الكتاب في اللي ذمه و في اللي مدحه ! 

انا راح اقولكم وجهت نظري بكل صراحة و من غير اي مجاملة ! 

باختصار الكتاب من اكثر الكتب اللي استمتعت في سماعها مرة حبيته و الله

الكتاب فيه حاجات كثيرة محفزة 

الكتاب زي ما تعرفو عن صاحبة موقع Nasty Gal اللي هي Sophia Amoruso 

ثروتها تقدر بمية مليون علي ما اعتقد !

لكن عشان اكون معاكم صريحة ما عرفتها و ما عرفت موقعها الا بعد الكتاب 

فكان الكتاب خطة ترويجية لها حلوة في انحاء العالم ، باين البنت ذكية 

هي في بداية الكتاب تقول انا ما راح اقولكم كيف تنجحو او اقول خطة معينة لنجاح 

و لا راح اقولكم كيف تعملو شركة او كيف تدخلو مجال الازياء 

لكن اوعدكم انو في النهاية الكتاب راح اعطيكم حماس يخليكي بس تبغى تشتغلي ! 

و فعلن دا اللي سار معايا ، حبيت الكتاب 

هي صحيح كثير من المعلومات اللي قالتها باين جابتها من كتب هي قرتها

و في حاجات قالتها انا قريتها في كتب ثانية 

لكن هي في كتابها خلتني اعرف كيف احققها في العالم الواقعي اكثر 

و من احلي الحاجات اللي قالتها انو كيف هي تعتبر نفسها ملزومة انها تاخد نسبة معينة

من ربحها و تحطه في حسابها للادخار 

تقول انو اعتبر دا الشي زي فاتورة علي دفعها بداية كل شهر

فاتورة ما تقدر تاجلها زي فاتورة الكهرباء 

عن نفسي زي ما قلت مرة حبيت الكتاب ، و امكن حبيته اكثر لانو اخدته كتاب سمعي ! 

فكانت الكلمات فيها حياة اكثر

و كمان ان شاء لله راح اشتري الكتاب لانو في الكتاب منزله مجموعة مقالات و صور

ماهي مذكورة في الكتاب السمعي 

لكن الكتاب السمعي حببني اكثر في الكتاب 



To All the Boys I've Loved Before

الكتاب للكاتبة Jenny Han  و هي عن قصة بنت نصف كورية في امريكا اسمها لاراجين 

لاراجين مراهقة عمرها ١٦ في الثانوي

و عندها اخت اكبر منها اللي هي في مقام امهم ( المتوفية )

مع انها اكبر من لاراجين بسنتين امكن

و اختها الصغيرة اتوقع ثمانية او تسعة سنين و عايشين مع ابوهم  

المهم لاراجين عندها عادة انو لما تحب احد تكتب له رسالة خاصة

و تقول في الرسالة كل اللي علي بالها و كل اللي في قلبها من دون خوف 

لانو هذة الرسائل محد راح يقرها الا هي 

و لما تخلص تقفلها و تخبيها و تحطها في علبة للقبعات امها اهدتها هي 

و من لحظة ما تخلص الرسالة خلاص تنسي الولد و ماعد تفكر في 

يعني الرسائل زي رسائل الهجران ! 

المهم و في يوم من الايام و في اول يوم من الدراسة يجيها ولد

و يقولها انو يبغا يكلمها علي الانفراد 

و فجاة يقولها اسمعي بس لمعلوماتك انا ما عندي STD ؟ ترجموها اذا حابين 

و مو انا اللي اخذ اخر قطعة بيتزا ؟! قالتلو :هااه 

قلها هذا اللي مكتوب في رسالتلك ؟! قالتله رسالة ايت رسالة انا ما ارسلتلك رسالة 

و تكتشف انها رسالتها اللي كتبتها له من سنين  ! و رجعت البيت لقيت الصندوق كلو مافي 

ورسائلها كلها اترسلت

 

القصة مرة حلوة و دمها خفيف حبيت اسلوب الكتابة حبيت علاقة الاخوات 

مرة و اقعية ، استمتعت بالقصة مرة و دحين طلعلها جزء ثاني كمان 

الصراحة راح اشتري كتب Jenny Han باين كتبها مرة حلوة و من النوعية اللي احبها 

اللي مرة انثوية 

انصحكم فيه جدا 

عملت فيديو عن الكتاب في اليوتيوب 


كدا انهينا البوست و اشوفكم ان شاء لله علي خير في بوست جديد  

SHARE:

ليست هناك تعليقات

إرسال تعليق

Blogger Template Created by pipdig