الثلاثاء، 25 أغسطس 2015

CookShop


السلام عليكم بنات 

قبل رمضان لما كنت في مكة مرة حبيت اجرب 

كافي CookShop في جدة

 الصراحة اكثر حاجة شدتني له ديكورته 

لدرجة لما روحته ما كنت عارفة انه مطعم و كافي تركي 

روحنا تقريبا علي وقت الغدا ، ما كان في احد الا احنا و طاولة ثانية  




الكافي بشارع التحلية، بإتجاه الكورنيش في مركز إسترا  










الديكورات و لله تشوق مرة عجيبة اللي صممته ينضرب لها تحية صراحة 

و من الحاجات اللي عجبتني كمان سقف الكافي فكرة جديدة



كمان عاملين فازات الورد من قوارير الكوكولا 




المطعم/ الكافي له دورين لكن انا للاسف ما طلعت فوق اصور

يعني الصراحة المكان مرة مرتب و باين عليه انو تصميم بنت

لانو مرة طاغي عليه الطابع الانثوي الريفي الدافي 

و في كمان كم حاجة مستخدمتها كا اعادة تدوير زي قوارير الكوكولا 




و بنسبة لطلبات حاولت ولله اطلب قد ما اقدر بس عشان اقدر اعطيكم فكرة كافية عن الاطباق 

تقريبا اغلب المينيو كان اطباق تركية ، لكن راح تلاقي اطباق مو تركية كثير 

يعني المينيو شامل الصراحة ، راح تلاقي شي يعجبك ان شاء لله 

بنسبالنا غلب علي طلباتنا الطابع التركي 

بس معلومة صغيرة قبل لا ابدا 

بنات شوفو انا لما زرت تركيا مرة ما عجبني اكلهم مرة ما قدرت اكل شي للاسف 

الصراحة كان بنسبالي مادري ! النكهات كانت اوفر ؟! مادري ما حبيته 

فالقصد اذا حبيتي الاكل في تركيا حطي في بالك انو ممكن اذواقنا تختلف 

فممكن راح تلاقي الاطباق اخف في النكهة من الاطباق التركية في تركيا 

الاطباق في المطعم اقرب لي اكلنا في السعودية من تركيا ، ان شاء لله قدرت اشرح كويس 



اول حاجة جابولنا complimentary عبارة عن خبز و زيت زيتون مع دبس الرمان اتوقع 

بعدها انا طلبت عصير برتقال و كمان طلبنا عصير كرز بالفرولة مثلجة 




و بنسبة للمقبلات طلبنا سلطة خرشوف كانت كويسة الصراحة 



دولما تركية اللي هيا ورق عنب بصلصة الطماطم بنسبالي كانت مرة كويسة 

انا احب ورق العنب لما يكون معتدل الحموضة ، يجي معا طبق لبن او زبادي 





شوربة كوك شوب و شوربة ايز وقلين الاولى كانت بالعدس

و الثانية بصلصة و الخضروات 

شوربة العدس يجي معاها زبدة ، كانت مرة ممتازة نفس شوربة عدس ازنجول 

بعد ما جربت شوربة العدس في ازنجول سارت هي المعيار الصحيح لشربة العدس

يعني اذا كانت طعمة اقول نفس حقت ازنجول

و اذا لا اقول حقت ازنجول اطعم 




كمان طلبنا بيتا باللحم هي زي فطائر اللحم ، مرة خطيرة 

ولله اني جالسة افتكر الاكل و مشتهيته من الصور (^^) 



كمان طلبنا منتو تركي بااللبن او الشيش برك ، ولله ياجماعة انو مرة كان لذيذ

حموضة ممتازة مقدار اللبن مرة حلو ، لا كثير و لا قليل و حجم المنتو مظبوط و الحشوة موزونة

يعني الطبق اتعمل خصيصا ليا !  



بعدها انا طلبت برغر كوك شوب باللحم و للاسف و ماشاء لله ما اقدرت اكله 

اخدته معايا تيك اوي ، بس كان جيد زي اي برغر لحم

يجي معا صلصات و بطاطس




دجاج مشوي بالفلفل الحار الطبق ماكان لي فماذقتة لكن يقولو طعم 





هو عبارة عن صدور دجاج مشوية بالفلفل فوق بطاطس مهروسة 

و يجي معها كتشب و خضار سوتية ( مسلوق )

و اخير نجي للحلا ، طلبنا اتوقع كاسترد لانو الاسم بالتركي irmik helva

هو تقريبا زي الكاسترد حلا بارد 



الاسعار كانت كويسة بنسبة للمكان و الطعم ، تعتبر معتدلة و حلوة 



نجي لراي بالمطعم بشكل عام 

المكان حلو له دورين في جلسات خارجية ، عندهم اطباق متنوعة تناسب الكل 

الستف او الويترز كانو مرة لطيفين و حبوبين 

الاكل جاء بسرعة و كان ساخن و في اطباق جات مرة حارة 

التقديم مرة كان حلو و مرتب 

انا اقدر المطعم اللي يمديكي تحجزي عن طريق موقعهم و كمان تختاري مكان الطاولة 

اسمع انو عندهم الفطور مرة حلو و كويس كان نفسي اجرب فطورهم 

و كمان كان نفسي اجرب ايسكريم المغانوليا و الشاي بس ولله خلاص مافي مكان للاكل

الحمد لله 

عندهم انواع شاي تركية و قهوة و في منيو للاطفال ، و تقدرو تلاقو المنيو في الموقع

الشي الوحيد اللي ممكن ماحبيته انو سار لخبطة في اسماء الاطباق 

افتكر انو الاطباق في المنيو مو كلها في منيو الموقع زي مثلا الدولما مالقيتها في الموقع 

كمان الاسماء في الفاتورة غير عن المنيو ! مادري 

 

كدا انهينا البوست و ان شااء لله اشوفكم قريب في بوست قريب ان شااء لله 

SHARE:

ليست هناك تعليقات

إرسال تعليق

Blogger Template Created by pipdig