الأحد، 18 أكتوبر 2015

٣ BooksLovers#


السلام عليكم بنات 

كيفكم مع القراءة و الكتب الجديدة ؟ 

بما اني خلصت كم كتاب قلت راح انزلها في المدونة عشان ما ابغا انسى تفاصيلها

فدا البوست مخصوص لمحبين القراءة ، فا اذا ما كنتي مهتمه لا تكملي (^^)

 

اول كتاب خلصته كان Reed Queen



كاتبة القصة Victoria Aveyard

القصة تتكلم عن عالم الناس مقسمين فيه بناء علي لون دمهم

قسم لون دمهم احمر و قسم لونه فضي

الفضيين Silver هم الاقوى و الاغنى و هما اللى يتحكمو في العالم

و كمان السلفر ( اللي لونهم فضي ) عندهم قوة خارقة

كل شخص فيهم يتمتع بقوة تميزه عن غيره

بطلة قصتنا اسمها مير ، مير و عائلتها من الرد ( اللى لون دمهم احمر )

الرد يعتبرو خدم عند السلفر و الرد ما عندهم امكانية يقولو لا لسلفر !

يعني زي العبيد للسلفر

و عندهم تقليد في عالمهم انو اذا الرد او شخص من الرد وصل عمر معين

لازم يجند لصالح السلفر

و منها يا يموت او يرجع مصاب ! و دا الشئ عامل رعب للرد

المهم مير تسرق و تنهب بس عشان تساعد عائلتها الفقيرة

و فجاةء عرفت انو صديقها و صاحبها الوحيد !تم استدعاه للتجنيد

 فحاولات تغامر بكل شي بس عشان تحرره من هذا الاستدعاء !

و هذة المحاولات تودي الي تغير مصيري في حياتها !

و هو انو مير تسير تشتغل في القصر عند العائلة الحاكمة

وهذا الشي مو كل الرد يوصلوله . الا المميزين منهم 

و هناك في القصر بين العائلة الحاكمة و بين مجتمع كله سلفر و قوتهم الخارقة

تكتشف انها هي عندها قوة

نعم ، مير و هي من الرد تطلع عندها قوة خارقة !

و تبدا الاحداث ...

رائي في القصة ، اول حاجة كنت احسبها رواية مو سلسلة

 لكن اكتشفت انها سلسلة رواية

بداية القصة مرة كانت بطيئة و ماقدرت شخصيا انو اندمج معها بسرعة

الصراحة كانت فيها كلمات صعبة عليا فكنت دائما اترجم

عادة انا لما تجي كلمة ما اعرفها اقدر افهمها من الجملة كا كل !

اما في دي الرواية كانت تجيني كلمة صعبة ما افهمها في بتالي ما افهم الجملة كاملة

اللي ابغا اوصله انو اللى في المستويات الانجليزي الاولى ممكن يكون شوية صعب عليهم

لكن لما بدات الاحداث تتسارع بدات اندمج اكثر مع القصة

استمتعت في القصة علي الرغم انها ممكن تكون للمراهقين اكثر ما انها للكبار

كمان ما حسيت في القصة كدا في مشهد قلبي دق معه

يعني كدا في مستوي و احد مافي تصاعدات و تنازلات

النهاية كانت مرة تقهر بنسبالي ، كان نفسي ابكس احد ( ►_◄ )-c<*_*; )

كاكل القصة لا باس فيها فيها احداث حلوة و استمتعت في القراءة 

صح ما وصلت لنشوتيلكن استمتعت

اتوقع ؟! راح استني السلسلة تنزل عشان ابغا اشوف ايش يسير ! 

اتوقع ، مادري الصراحة 



Leave Your Mark

الكتاب كتبته Aliza Licht عن تجاربها و نصائحها العملية 

هي حاليا مسؤلة الاتصالات الدوليه ل Donna Karan 

الكتاب حلو للكبار اذا حابين يستفيدو 

و اشوفه لازم علي كل وحدة اتخرجت من الثانوي او الجامعة تقراه 

خصوصا البنات اللى يشتغلو في الشركات التجملية او الفاشن 

او حتى اي مجال يطلب خدمة عملاء

للاسف بعد ما بداؤ البنات العمل في المتاجر

 للاسف كثير منهم ماعندهم خبرة ابدا في التعامل

او التصرف ! 

عشان كده مرة انصح البنات اللى داخلين بزنس

او دوبهم مبتدئين في وظائفهم يطلعو عليه

الكتاب يحتوي كم من اخلاقيات العمل اللى لازم تتوفر في اي شخص يعمل 

الكتاب ما اقدر اتكلم عنه كثير بسبب انو ما في قصة !

هي تحكي عن حياتها العملية و منها تقولك هيا فين اصابت و فين اخطأت 

بنسبالي حبيته لكن زي ما اقولت اتوقع راح يفيد اكثر اللي دوبهم متخرجين 




Rich Bitch

A Simple 12-Step Plan for Getting Your Financial Life Together

الكتاب لخبيرة الشؤون المالية Nicole Lapin 

هو عبارة عن ١٢ خطوة لترتيب حياتك المالية 

الكتاب حلو و فعلن استفدت منه كم خطوة و كم معلومة 

لكن للاسف الكتاب في معظمه مخصص للاجانب !

 ليش لانو تعاملتهم البنكية جدا مختلفة عننا 

حتى استثماراتهم الشخصية جدا مختلفة عننا 

و مع ذالك الكتاب استفدت منه كم معلومة ما لقيتها و لا في كتاب ثاني 

لكن زي ما قولت ٧٠٪ منه مخصص للاجانب 

حبيت انها حاطه مستندات عشان تعبيها و تساعدك عشان تديري شؤونك المالية 

مستندات عبارة عن جداول ، و ممكن تلاقيها في موقعها مجانا 

لكن تحتاجي الكتاب عشان تفهميها بالتفصيل 

نيكول عندها موقع و كمان قناة في اليوتيوب تنزل مقابلاتها اللى عرضت في التلفزيون 

الصراحة حتى لو ما حتشتري الكتاب خدي لفة في موقعها و يوتوبها فيه معلومات حلوة 

 

بعد ما خلصت الكتاب الصراحة حمدت نعمة الاسلام ، بنوكهم جدا ربيوية 

حرام ولله 

صح كمان ممكن الكتاب يفيد الناس اللي عايشين هناك سواء مستقرين هناك

او فقط جالسين هناك لمدة طويلة شوية ، في الحلال اكيد (^^)

 

كدا خلصنا بوست اليوم ان شاء الله اشوفكم في بوست قريب فخليكم قريب 

 
 

 

 

SHARE:

ليست هناك تعليقات

إرسال تعليق

Blogger Template Created by pipdig