الجمعة، 27 نوفمبر 2015

نوزومي Nozomi


السلام عليكم بنات

اليوم نزلت في الانستقرام انو راح انزل بوست

عن تجربتي لمطعم نوزومي الرياض ، و الصراحة الى الان ما اعرف متى

راح ينزل !!؟يعني في اي و قت من اليوم

لانو اختكم تكتب بين اشواط الطبيخ (^^)

يعني ما بين السلقة و التانية اجي اكتب و ارجع

ليش دا الوضع ؟  و ليش عاملة دي الحوسة ؟ (^^)

 

لانو بكل بساطة اليوم قررت اوقف الكسل و انزل بوست

زمان ما نزلت بوست ...

و في نفس الوقت اليوم عاملة عشاء لجارتي ، مسكينة تعبانة و ابغا ارسلها عشاء

المهم عشان كدا راح اكتب البوست بين الاشواط ، و ما اعرف متى راح ينزل

اتوقع متاخر ، فاعذروني (^^)

المهم قبل فترة امكن شهرين زرت مطعم نزومي في الرياض






هو مطعم ياباني حاصل على جوائز

 و في الاصل هو من لندن او الفرع الاصلي في لندن

و فتح في الرياض كفرع له في المملكة 

المطعم له موقع و يمديكي تحجزي منه ! يعني تحجزي اون لاين 

و هذا الشي مرة اقدره في المطاعم ، احب انو المطاعم تهتم في مواقعها الالكترونية 

بنسبة للمكان جدا جدا راقي و الديكورات مرة حلوة 

مرة حلو تعزيمي ناس عليه ، اساسا هذا اللي يسير عادة 

لكن للاسف زي اغلب مطاعم الرياض ما قدرت اصور المكان و اخد راحتي 

بحكم خصوصية الناس و مرة احب احترمها ! 

لكن راح احط صوري و اضيف عليها صور خاصة للمطعم من صفحة الانستقرام الخاص فيهم

المطعم فيه قسم للافراد و قسم عوائل و قسم خاص او برايفت

ممكن يتعمل فيه جميع انواع الاجتماعات سواء عمل او عائلي


صور من صفحة الموقع الرئسية على الانستقرام 























اول حاجة طلبنا عصير اسمه CLASSIC MOJLTO موهيت ، سعره كان تقريبا 39 ريال

كان جدا طعم بالحبحب (البطيخ ) 



بعدها طلبنا Miso soup كانت توفو مع اعشاب بحرية و البصل الاخضر

انا الصراحة عجبتني ( اول مرة اجرب التوفو )

بس ما حسيت لها طعم حسيت طعم البصل الاخضر طاغي شوية

كان سعرها تقريبا ٢٨ ريال 





بعدها طلبنا ادمامي و احد على البخار و الثاني بالصلصة الحارة 

الاول سعره ٢٨ ريال و الثاني ٣٢ ريال سعودي 

ادمامي البخار اطعم بكثير من الصلصة الحارة 




كمان  طلبنا Steamed Rice رز مطهي على البخار مع حبات السمسم السوداء

كان سعره ٢٨ ريال و الصراحة مادري ليش طلبتها ، الطعم كويس 

بس لازم يجي معا الرز شي ثاني يتاكل معها  زي قطع لحم الستيك ، بس انا ما طلبت 



Pop Corn Shrimp مجموعة من الجمبري الصغيرة مغطاة بصلصة الكريمة الحارة

هذا من اشهر الاطباق اللي عندهم ، سعره كان ٩٧ ريال ، الطعم حلو بس

انا ماعجبني مرة 

بس محبين الجمبري اتوقع راح يعشقوه ! 



كمان طلبنا روبيان مقلي اتوقع كان سعره ٨٥ ريال سعودي 



و اخير السوشي (^^) 

بنات انا لسة مبتدئة في السوشي ، لسة ما قد جربت حاجة نية (نئ) 

اخد حاجات مستوية او خضار ، لكن اعشق السوشي 

المهم اخدنا نوعين سوشي للاسف في و احد مع الحماس نسيت اصوره (^^) 

و للاسف لما اطالع في الفاتورة مني عارفة افرق بينهم ؟

ايش اسم اللي صورته و ايش اسم اللي ما صورتها 

انا راح احط الاسماء من الفاتورة و الاسعاز و دبرو نفسكم انتو (^^) 

شان سي رول ب ٩٥ ريال ، روبي ب ١٢٥ ريال 





كل الاثنين كانو طعمين و كلها روبيان و مستويين 

 

في النهاية رايي السريع عن المطعم ، جدا حلو و راقي ، حجمه حلو 

ما في بارتشينات ، اسعاره غاليه ، جدا جدا اكله طعم 

الخدمة ممتازة و الاكل جاء بسرعة 

مرة انصحكم تزوره ، ان شاء الله انا كمان ابغا ارجعله 

 

الوقت اتاخر بس راح انزل البوست (^^) 

خليكم قريب لبوست قريب ان شاء الله 


SHARE:

هناك تعليقان (2)

  1. تقرير بطل ، شكراً الله يعطيك العافية 👏🏻👌🏻👌🏻🌹

    ردحذف
    الردود
    1. شكرا حياتي و الله كلك ذوقك (^^)

      حذف

Blogger Template Created by pipdig