الاثنين، 16 نوفمبر 2015

منتجاتي من SACHAJUAN


السلام عليكم بنات 

اليوم حتكلم عن براند , اعتبرها من افضل البراندات اللي احبها لشعري

شركة ساشاخوان Sachajuan , الشركة سويدية تعتبر من الهاي براند

الصراحة و من غير اي مبالغة اعشق دي الشركة و منتجاتها 

و لازم ارجعلها بين كل فترة و الثانية بس قبل خلوني اتكلملكم عن شعري



شعري فيه شويه جفاف مع الصبغات و يعتبر متوسط الناعومه و فيه نفشه

فاحب دائما ادور علي الترطيب في منتجات شعري

و كمان الحمد الله شعري بسرعة يبان عليه اي منتج ، يعني ما اتعب معاه 



شامبو للشعر العادي بحجم ٢٥٠ مل 

الشامبو ماله ريحه قوية لكن ريحتها تحسيها يونسكس unisex 

 تقريبا فيها رائحة كلونيا شوية 

طريقة استخدامه : تفركي كمية قليلة منه على فروة الراس بطريقة المساج ثم شطفه

الشامبو جميل جدا يحافظ على الشعر صحي و يلمع و يتمشط بسهولة 



الشامبو ما ينعم الشعر لكن يخلي الشعر صحي اكثر 

يعني اذا شعرك كيرلي راح يخلي شعرك كيرلي صحي ناعم 

راح تحسي بالفرق من اول استعمال و انتي في الحمام كمان (◍•ᴗ•◍)

و راح تعرفي قد ايش شامبوهات السوبرماركت و الصيدليات ما تعمل حاجة 

و كمان انصح فيه للبنات اللى تكون الموية اللى في مدينتهم سيئة 



معالج الشعر Hair Repair بحجم ٢٥٠ مل 

المعالج دا اللى يميزه انه يحتوي على تقنية جديدة اسمها ocean silk technology 

و هي تقنية تساعد علي تقوية الشعر و تعطيه مظهر صحي و لامع 

اول احساس حسيته مع اول استخدم انو شعري سار ثقيل و يتحرك بخفه bounce 

تحسي شعرك كدا يتمرجع مع كل خطوة (^^) جد و الله 

و كمان ناعم من غير نفشة يعني يوخر النفشة ، يعني ترطيب على اصواله 

و كمان يساعد الشعر انو يحافظ على نتيجة الشامبو و البلسم و المعالج لفترة طويلة 



طريقة الاستخدام انو تفركي علي شعر مغسول على طريقة المساج

و تركه على الشعر ٥ الى ١٠ دقائق 

و بعدها شطفه ! 

بكل اختصار من افضل المنتجات اللى استخدمتها لشعري و انصح الكل فيه 



Ocean Mist بخاخ ملح البحر بحجم ١٥٠ مل لل beachy look

هو البخاخ مخصص عشان يعطي الشعر تموجات الشاطئ اللى تسير بعد السباحة عادة 

و هو عبارة  عن مزيج بين مثبتات الشعر ورذاذ المياه المالحة 

فيه كثير منتجات زيه في السوق لكن كثير ناس يمدحوه و خصوصا اني احب دي البراند 

فقررت اجربه ، الصراحة احسه عادي زي اي بخاخ مكون من ملح البحر 

بس عشان اكون صريحة معاكم انا ما هبيت في دا النوع من اللوكات 

بس احب استخدمه في الصيف و انا علي البحر او المسبح ، يعني ما استعمله دائما 

لكن ممكن اذا كان عندي دوام سواء دراسي او عمل ، اتوقع راح استخدمه بكثرة اكثر 

طريقته انو تحطي على شعر نظيف سواء ناشف او مبتل

و بعدها تخلي ينشف سواء طبيعي او سشوار 

عن نفسي ياما احطه علي شعر نظيف مسشوار او شعر نظيف مبتل و بعدها اسشواره

و الكميات مرة بسيطة ما اكثر . يعني لازم سشوار في الموضوع 





Sachajuan Volume Powder بحجم ٢٠٠ مل

هو شامبو جاف و في نفس الوقت بودرة عشان تعطي الشعر حجم اكبر

الصراحة حلو ، له نوعين نوع للشعر الفاتح بلون فاتح و نوع للشعر الغامق بلون غامق

 و مع انو حقي للشعر الفاتح

و انا شعري اسود غامق ما حسيت انو يبان ، و هو على شكل بخاخ للمعلومية

انا استخدمه عشان يعطي حجم لشعري بشكل يومي بدل السبري ، يعني كحماية

و احسه ينفع مرة للي فروتهم دهنية جدا

زي اختي مسكينة تخيلو اليوم استحمت لازم نهاية اليوم تستحما

 من كثر ما فروة راسها دهنية

فانصح الناس اللى زيها فيه ، لانو زي ما احنا عارفين الاستحمام اليومي مو كويس للشعر

كمان انصح فيه بعد الرياضة ، او للبنات اللي يشتغلو في مناطق زي منطقتنا حارة

احسه افضل ، خصوصا المدرسات يعني اللي تحتاج تروح اماكن غير مكيفه

تاخده معاها الدوام و تحط كل ما حست بحرارة !

بنات النظافة حلوة لا تعتمدي علي المنتج بس

يعني لا تجلسي اسبوع من غير استحمام

و تقولي لا شعري نظيف عشان استخدم شامبو جاف

ترى الاجانب وصخين !

بنسبة للحجم اللي يعطيه للشعر ، كويس طبيعي بس ما يدوم فترة طويلة

اخيرا المنتجات من عيوبها انه غالية و حجمها كا منتجات شعر احسها قليلة او  صغيرة

و كمان  غير متواجد في السعودية

ممكن تلاقو في امازون ، عن نفسي كل سفرة لتركيا اخد احتياجاتي منه

تلاقو في تركيا  في Beymen Zorlu و Harvey Nichols و Sevil stores 

و كمان للمعلومية العبوات كانها زجاج ، لكن لا هي حاجة زي البلاستك لكن اقوى 

حبيتها عشان ما تتكسر بسهولة و كمان ممكن تاخدها في السفر

بختصار المنتجات تساعدك للمحافظة على شعر صحي

ان شاء الله راح انزل بوست عن المنتجات الثانية اللى جربتها من الشركة قريب 

 

كدا انهينا البوست ان شاء الله اشوفكم في بوست قريب فخليكم قريب 


SHARE:

ليست هناك تعليقات

إرسال تعليق

Blogger Template Created by pipdig