الأحد، 31 يناير 2016

❣2015 favorites


السلام عليكم بنات 

اليوم اخيرا رجعت المدونة بشكل نهائي و كامل 
الصراحة ما حبيت اقول ايش سار حوسة في المدونة الا لما اخلصها كاملة 
امس على الفجر الحمد الله خلصت تعديل اخر بوست 
عشان ما انطول في الموضوع ! طبعا عارفين انو مدونتي اتعطلت و الارشفة كلها راحت 

فعليا راح كل شي 


ما كان عندي الا يومين بس عشان انقل البوستات من موقعي السابق الى حسابي الجديد هنا في البلوقر 

نعم يومين بس لنقل البوستات بطريقة النسخ و اللصق كمان 
و اكيد ما قدرت انقل كل شي ، و انا في نص العملية اكتشف انو كل صوري راحت 
بغيت ابكي ! 

لكن الحمد الله انا كنت منزلة الصور على حسابي في البنترست ، لكن للاسف مو كل الصور موجودة
فظطريت في بوستات معينة انو اعمل صور جديدة خصوصا بوستات الديكور 

و بعد دا كلو اخدت تقريبا اسبوع الى اسبوعين عشان بس ارجع الدومين تبعي 
بس الصراحة مرة مبسوطة من نفسي انو كل دا عملته و انا ما اعرف شي 
من تركيب قالب للاكواد لكل شي 

كانت مهمة صعبة و الله ولسة احس المدونة يبغالها تعديل ، لكن مبدئيا كل شي تمام 
كل شي رجع لسابق عهده ، و امس كان اخر تعديل لي اخر بوست 
ممكن تتطلعي عليه اذا كنتي حابة 

المهم بعد المقدمة الطويلة دي ندخل على بوست مفضلات السنة ، سنة ٢٠١٥ 

الصراحة السنة اللي فاتت جربت فعلن حاجات او منتجات مرة حلوة 
لكن  في دا البوست حاولت قد ما اقدر اختار حاجات او منتجات ما تكلمت عنها قبل 
و ما اتوقع راح اتكلم عنها في بوست خاص 
صحيح في كم منتج قد اتكلمته عنه لكن ذكرتهم هنا بس عشان جد ما سرت اقدر استغني عنهم
 لكن اخترت منتجات اول مرة اجربها دي السنة لكن فعلن غيرت حياتي 
منتجات ما سارت اقدر استغني عنها



ملحوظة في منتجات مرة حبيتها في السنة اللى فاتت لكن ما راح انزلها هنا 
لاني ان شاء الله ناوية انزل عنها بوست تفصيلي خاص اكثر فيها 

المهم نبدا في بوست اليوم 


gentle hydro cleanser 

الصراحة منتج حلو ، حلو مع الكلارسونك ، و الاهم من دا انو ما طلعلي و لا حبة 
انا استخدمه فقط مع الكلارسونيك ، بعد مسح المكياج كامل 
و انا اساسا الكلارسونيك ما استخدمها الا مرة في الاسبوع الي اسبوعين او بعد المكياج فقط 

لكن بنات بليز قولولي اذا كلارسونيك تعمل اختبارات على الحيوانات 
اليوم قريت انو المنتج احتمال تم اختباره على الحيوانات !!!! 
اذا كان الكلام صحيح ، انا جدا اسفة و راح ازيل المنتج من البوست 
اذا اي وحدة عندها علم بليز تقولي و انا راح ارسلهم ايميل عشان اتاكد 
ان شاء الله يطلع لا 


 Smooth Care  مشقر بوتس 

اخ يابنات بس فين كنت عنو انا ، افضل مشقر استعملته مرة مرة حلو 
انا قبله كنت استخدم الاكسجين العادي ويلا مع المشقر الازرق 

المهم انا اشقر فيه حواجبي و وجهي ، المهم السنة اللي فاتت مرة بدات اتحسس منه 
بشكل فضيع ، يادوب بس اخليه دقيقة الي دقيقتين و حرقلي و جهي 
مو اتحرق و جهي لا احس بحرارة ، هذا الكلام كان على حواجبي فقط 
لما شوفت الوضع كدا قلت ابدا ما راح اعمل وجهي و من ساعتها ما شقرت وجهي بس حواجبي 

المشكلة تخيلو انو حواجبي تتقشر تسير كدا زي الجروح 
مرة يئست الصراحة ، المهم داك اليوم سمعت نورة العوفي تمدحه مرة و قررت اجربه 
لكن كل ما اروح بوتس الاقي مخلص للاسف ، اللين ما روحت بوتس حراء جدة لقيته هناك 

اخ يا بنات ايش اقول و ايش اخلي عنه ، منتج محصلش ابدا 
ابدا ابدا ابدا ما حسسلي بشرتي ، يجلس التشقير وقت اطول من مشقر ويلا 
ما يحرق ، و حبيت الصحن و الملعقة اللي تجي معاه يسهلك تشقير الوجه
الصراحة يستاهل كل قرش دفعته فيه ، مرة حبيته 


الحب ديالي فراش العاذرية ، بكل اختصار لازم يكون في كل بيت 
اساسا سار العلامة المميزة في يبتي خلاص الريحة اللي تميز بيتي 

اتكلمت عنه في بوست قبل كدا لكن فعلن يستاهل الذكر مرة تانية 
لانو فعلن من المنتجات اللي غيرت حياتي  لعام ٢٠١٥
اذا ما جربتي لازم تجربي حالا 
هذا هو البوست عشان تقري اكثر عنه مشترياتي من العود و البخور 


غسول افين الجل 
قد سبق اتكلمت عنه في الانستقرام اذا كنتي تتابعيني على هاشتاق #PicTakeAndTry 
اللى حبيته في الغسول انه يعمل على تجفيف الحبوب من غير من يجفف البشرة 
هو و المرطب مع بعض خلطة عجيبة مرة ، المرطب كمان اتكلمت عنه في نفس الهاشتاق 
عشان تقري معلومات اكثر عنها شوفي هنا 


Infallible Matte
من احلا فاندشنات الدرق ستور هذا لو ما كان احسنهم ، و احسن من كثير فاندشنات هاي اند 
تغطيته تعتبر من ميديم لفل كفر ، تقدري انتي تبني طبقات اللين ما توصلي لنتيجة المطلوبة 
يجلس طول اليوم او لفترة طويلة مرة ، ما يدهن و الاهم ما طلعلي حبوب ابدا 
حتى مع الاستعمال اليومي ابدا ما طلعلي حبوب 
انا الى الان ما لقيت درجتي عادة اخلط درجة امبر مع فانديشن تاني افتح 
انا اللي عندي امبر و ريدينت روز ، نفسي الاقي هوني و قولدن بيج و ساند 
للاسف دايمن مخلصة ! 


kenra Shine serum 

hands down يا جماعة ، This is the best 
من افضل الحاجات من غير اي مبالغة ، هو سيريم للمعة الشعر و النفشة 
خطير ، الصراحة مادري عن اللمعة لكن فعلن يوخر النفشة و يخلي الشعر سهل التسريح 
مرة يسهل عليكي السشوار و يقلل الوقت كمان 
مرة حبيته 


عجلة كارولاين 
الصراحة من زمان اعرفها لكن كنت ماخذة فكرة سئة عنها خصوصا من عاملات المكياج 
عاملات مكياج مو الميك ارتست لانو مع كل احترامي ما كانو فاهمين الفن 
المهم كنت ماخدة فكرة سيئة عنه من عاملات المكياج زمان 
كانت تستعمله بطريقة جدا جدا غلط لدرجة يقلب يسير عجينة ، المهم من وقتها و انا شايلة يدي منه

لكن في الفترة الاخيرة او السنتين اللي راحت الميك اب ارتست سارو يعلمونا الطريقة الصحيحة 
لاستخدامه 
و من بعدها اتعلقت فيه و سرت اشوف اي بنت لازم يكون عندها منو ، لازم !
خصوصا البنات اللي يشقرو حواجبهم ، حتى للكنتور و الله بس مو كثير او مو دايما 


 جل الحواجب من انستازيا 
اي بنت ما عندها حواجب ، حواجبها قليلة ، تشقر حواجب 
افضل خيار لكي جل انستازيا ، سهل الاستخدام ، يعطي شكل طبيعي مرة
و في نفس الوقت يطلع الحواجب مرسومة بطريقة اكثر برفشنل 
انا مرة احبه الصراحة ، و سرت ما اقدر استغني عنه 


audible 

خدمة ادبل للكتب السمعية ، كمان سبق و عملت بوست خاص في دي الخدمة 
في البوست السابق ، بوست انجازات ٢٠١٥ ذكرت انو نجحت في تحقيق قراءة ٢٠ كتاب بدل ١٢ 
و الفضل بعد الله كان لادبل ،،، 
خدمة حلوة و ممتعة و مفيدة ، ما اتوقع راح اوقفها قريب 
في اوقات كثيرة خلاص ما ابغا اشوف تلفزيون ابغا اريح نفسي ، او لما يجيني ارق في الليل
هذا التطبيق هو منقذي ، و الحلو كمان فية انو يشمل جميع انواع الكتب ، تطبيق بمعني الكلمة مفيد 
هدا هو البوست تجربتي مع audible 




كريم ديفرين
هذا الكريم الصراحة من افضل و اكثر الكريمات اللى غيرت بشرتي ١٨٠درجة
بعد ما استخدمت الاكني دوت اورق بشرتي الحمد الله مرة اتحسنت ، المهم و خلاص و قفته
لكن بعد فترة امكن ١٠ شهور الى سنة رجعتلي الحبوب ، ما عرفت السبب !
المهم قررت اروح عند دكتورتي للجلدية و قالتلي انو بعد اي علاج للبشرة لازم نستخدم منتجات ثانية عشان نحافظ على نتيجة العلاج ، حتى اللي اخدو الروكتين
المهم و صفتلو ليا ، اللى هو الديفرين
تقريبا اسبوعين و شوفت النتيجة الجبارة ، الكل سار يسالني عن السر و لما اقلهم عنه محد يصدقني
يحسبوني اخبي عنهم السر ، و الحقيقة انه هو السر
في البداية كنت استخدمه يوميا في الليل ، حاليا استخدمه يومين في الاسبوع قبل النوم
كريم جبار و الله 

كدا انهينا البوست و ان شاء الله اشوفكم في بوست قريب فخليكم قريب 

SHARE:

ليست هناك تعليقات

إرسال تعليق

Blogger Template Created by pipdig