الأربعاء، 3 فبراير 2016

wanter favorite 2015-2016 / مفضلات الشتاء ❤


السلام عليكم بنات 
كيفكم و كيف البرد معاكم  ، سرنا ابرد من لندن ، سرنا دولة اوربية 

مادري اذا كنتو تعرفو عني اني من عشاق الشتاء و البرد ، يدخلني جو مرة رهيب 
يعدلي مودي و يعدل نفسيتي و يعدل كل شئ فيا 
اي احد يبغا مني اي حاجة يستغل وقت الشتاء (^^) 


المهم اليوم ابغا اشاركم مفضلاتي لشتاء السنة الحالية ، مفضلات استخدمتها اكثر شي فدا الوقت 




اكتر حاجة كنت البسها دا الشتاء كان دا الونزي /Onesie او المفروض يكون اسمه
  One Piece Hoodie
 هي بجامة قطعة وحدة مع هودي ، الصراحة ما اعرف من فين اخته 
ما افتكر ، بس اتوقع اخدتها من مكة مول ، تقريبا قبل سنتين 
و ماشاء الله الى الان  على نفس جودته ، اهم حاجة انو مرة يدفي 



Orogold انا اخدت من عندهم حاجتين للوجة و دي الاثنين للجسم 
على اليمين المقشر و اليسار المرطب 
اخدتهم رمضان مو السنة اللى فاتت لا اللى قبلها من دبي ، الامارات مول 
كان كشك قريب من سكاي دبي 

كان عليه عرض مرة حلو تقريبا كان بنص السعر 
انا مخليه المقشر و المرطب بس ليديني (اليد) ، مرة حلوين تشوفي الفرق في نفس اللحظة 
المقشر كدا كانه على سكر تقشيره حلو ، و المرطب كاني احط قشطة على يدي 
ريحته كدا حاجة فخمة ، و مرة حبيت النتيجة معاه 

نصيحة يابنات اهم حاجة لليدين تقشير و ترطيب ، دايما قشريها و رطيبها شوفي كيف راح تسير بعدها يدك!

المهم انا ماكنت اعرف عن دي الماركة حاجة ، لكن افتكر في رمضان او بعدها 
ما اعرف بظبط متى ، اذا ما كنت غلطانة ولاء هارت قالت انو الناس قالولها انو الشركة يهودية 
و مكتوب صنعت في اسرائيل ، و هي ولاء تقول مني متاكدة اذ الكلام صحيح او لا 

انا الصراحة انصدمت ، بس قيدني اشتريتها 
و انا على علبتي مكتوب صنع في اليابان ، ودورت حتى اتوقع ولاء دورت بس مالقيت حاجة 
مالقيت اي صله في الموضوع ، فكملت معاه 

المهم اذا اي وحدة عندها معلومات اكيدة تخبرني بليز ! 



stress relief from bath and body works 
اهم حاجة الشركة او المنتج ما يختبر علي الحيوانات ، المنتج يريح الاعصاب 
سبق و كتبت عني مجموعتي اللي قبلها كانت باللافندر هنا تلاقونها 
اما هدا المنتج بنوع من انواع الاشجار اسمه Eucalyptus 
بالاضافة الى الشاي ، حبيت فيه انو يعتبر ثقيل و نفس الوقت يرطب من غير ما يلصق علي الجسم 
و يتمزج بسرعة ، كمان ريحته جدا تهدي النفس و تحسي بهدوء 
احس فترة الشتاء غالبا اجسامنا تكسل و نتعسر في القومة ، هدا ادهني في الليل مرة راح يريحك 


wet brush  سرت ما استغني عنها بتاتا 
احسها الطف فرشة على الشعر ، و مهما كان الشعر مجعد ما راح يعورك  وقت التمشيط 
لسسب انو شعر الفرشاة الطف في التعامل مع الشعر 
و ممكن تستخدمي في الحمام و بعد الحمام و لما شعرك  ينشف ، مرة مرة حلو للاطفال 
ما يطيح الشعر لكن ممكن تشوفي كم شعرة في الفرشاة خصوصا لو عندك تساقط شعر
مايمنع تساقط الشعر لكن ممكن يقلله حبتين 
ممكن ما يوصل شعر الفرشاة لفروت الراس للبنات اللي شعرهم مرة كثيف ، ممكن ! 

اهم حاجة انها مرة لطيف على الشعر 




Bobbi Brown Hydrating Eye Cream

هذا النوع اللى عندي فقط مرطب لتحت العين له نوع ثاني  هو 
Bobbi Brown 'Extra' Eye Repair Cream
النوع الثاني  يعالج اعراض اكثر مني اللى عندي ،  منها الدارك سيركل 
او السواد اللى تحت العين 

انا حقي فقط مرطب و مع ذالك حبيته ، ممكن في حاجات احلا منه لكن
 انا حبيت استخدمه في دي الفترة 


clarins hand and nail treatment cream
من احلا و افضل كريمات اليد ، و الله رائع و سمعت كمان انه المفضل عند الملكة اليزيبث 
اخدته من مطار اسطنبول ، السوق الحرة 
و يحتوي على اكثر مواد احبها اللي هيا جوز الهند و الولوفيرا و الشيا 
رائع 


في بوست THE “ME TIME” TAG
ذكرت انو افضل مناكير حاليا اجربها كانت O.P.I Care to Danse ، و لا زال الي الان الافضل عندي حاليا 
الي احبه فيه انو يعطي الاظافر مظهر طبيعي صحي جدا 


بنسة للمرطبات كان الافضل سيتافيل و كيوفي ، الافضل ! 
سيتافل ذكرته في الانستقرام على هاشتاق #PicTakeAndTry هنا لو  حابين تشوفوه 

انا راح اتكلم فقط عن كيو في الان 
كريم غني بترطيب عالي جدا ، خالي من العطور و الالوان الصناعية 
يناسب الاكزيما كمان و الجلد الجاف من ركب و اكواع الخ ، خالي من اي روائح 
يحارب الجفاف و يمنع الجفاف 
هذولا المرطبين افضل مرطبين في السوق من غير اي منازع ، يتوصوفو طبياً
سمعت كمان انو ممكن يستخدم مع الروكتين ، مع انو انا ما انصح ! 
كريمات الوجه لازم يكون عليه مكتوب كريم للوجه و فقط للوجه 
استخدمي صباح و مساء و راح تشوفي الفرق ، لكن النصيحة الوحيدة اللى اقدر اقولها 
او الحاجة السلبية الوحيدة هو بكج الكريم 
اذا تقدري خدي البكج اللى على توب او عصار احسن 



نجي لدفاء (^^) بداية الشتاء تقريبا رحت ومن سيكرت 
و اخدت من عندهم  كم روب شتوي ، انا عادة اول ما اصحى الصباح لازم اكون بردانة 
مين زي ، و احب ادفى نفسي بروب دافي 

المهم كانت اسعارهم مرة حلوة تقريبا ١٠٠ وشي او تقريب ال ٢٠٠ 
الخامة مرة ناعمة و تدفي سار عشق !
لكن اذا تبغي حاجة تجلس سنين معاكي ، ما ظن انها من الخامات اللى تجلس سنين معاكي 
لكنها حلوة ، و انا من النوعية اللي احب كل سنة الى سنتين اغير الروب 
هذا الروب قصير !





و اخدت كمان من عندهم روب طويل ، عشق و الله عشق ، حبيت مرة 
حبيت الروب الطويل اكثر من القصير بحكم احب الدفا (^^) 




كمان من الحاجات الحلوة اللى حبيتها في دا الشتاء 
او الصراحة مو في الشتاء من قبل الشتاء استخدمه و مرة حبيتها 
هو مرطب للشفايف من  Burt's bees اسمه Replenishing   

ليش ما صورتها ، اخ + تنهيده طويلة 
القصة و مافيها انو قبل فترة امكن ٣ اسابيع استخدمته  ، طيب !؟
المهم و حطيته على التسريحة كدا في اولها علي الطرف ، بعدها جبت السشوار و جلست اسشوار شعري 
مع هواء السشوار و قدام عيني طاح المرطب على الارض 
و عادي ما اهتميت قولت اخلص سشوار و بعدها ارجعه ، بعد ما خلصت نسيته و رحت اتعشيت و كدا 
على و قت النوم و وقت العناية الليلية جيت ادوره و مني لاقيته 
و الله يابنات دورت كل مكان مالقيته ، مافي مكان ما دورت فيه ، لدرجة جبت المكنسة و دخلت تحت التسريحة 
قلت امكن تتشفط ، لكن مافي !! مقهورة كان مرة حلو 
في النهاية التوقع كان ، انو يوم ما كنت اسشوار كان في كيس صيدلية تحتي 
كنت دوبي مشتريه حاجات ، المهم الكيس فاضي مافي الا كراتين فاضية و فواتير 
انا بعد ما خلصت سشوار لميت كل حاجة و رايا و رميتها ، فا اتوقع انو المرطب بدل ما طاح في الارض 
طاح جوت الكيس و انا رميت الكيس 

المهم انو المرطب مرة حلو و لازم تجربوه ، اخيرا حاجة طبيعية تعجبني (^^) 
العادة لا ، احب المنتجات سريعة المفعول و الغالب انها ما تكون طبيعية !

  
كمان من الحاجات اللى كنت استخدمها بكثرة هي النسبريسو 
بس عشان اعرف ايش احب و اخترع خلطات جديدة ، اذا كنتب حابة تشوفي البوست هنا 



عشق عشق ، سرت مدمنة على netflix and Hulu plus 
مرة تجربة و خدمة حلوة (اتكلم طبعا على الامريكي )


الصورة تمثلني بظبط (^^) 

كدا انهينا البوست خليكم قريب لبوست قريب ان شاء الله 





SHARE:

ليست هناك تعليقات

إرسال تعليق

Blogger Template Created by pipdig