الأربعاء، 23 مارس 2016

Indian Healing Clay



السلام عليكم جميعا  ،،،

بكل اختصار فيني عن دا المنتج من زمان !!!


الكل اتكلم عنه ، الكل او الاغلب مدحه ، اتوقع الكل يعرفه او سمع عنه 

تقريبا في اوغست "اغسطس" ٢٠١٥ قريت عنه في امازون 

و قررت اجربه 

هو عبارة عن طين هندي , مصنوع من الكالسيوم البنتونيب المخوذ من رماد البراكين

طبيعي ١٠٠٪ ، يقال انه اقوي ماسك للوجه في العالم 



من مميزات المنتج انه يشد البشرة ، ينظف البشرة بعمق

التخلص من الاوساخ و الدهون و الرؤوس السوداء و البيضاء في البشرة

يعمل على تصغير المسام ، علاج لحب الشباب ، التخلص من اثار حب الشباب

شوفت ناس يستخدمو لكامل الجسم و ناس لشعورهم كمان ! 

طريقة استخدامه جدا سهلة ياما تخلطي بمقدار متساوي مع  الماء او خل التفاح العضوي

يفضل استخدام خل التفاح العضوي مو اللى في السوبرماركت

لانو اولا خلطه مع خل التفاح يخلي قوامه افضل و سهل الدمج و سهل الدهن

على عكس الماء كدا يطلع فقاقيع و يتكتل عليكي

و سبب ثاني انو خل التفاح العضوي له منافع اكثر من الماء للبشرة ( يقال )

 و يحفز البودرة او الطين للعمل بكفاءة اكثر

يمديكي تدوري عن فوائد الخل الطبيعي العضوي في النت عشان معلومات اكثر

عن نفسي اخاف حبة من الخل ، فتلاقيني حذرة شوية معاه ، للاسف

و لازم تنتبهي انو تخلطي فى  مواد غير معدنية و ملعقة خشب عشان التفاعلات

و بعدها تتركي القناع ١٠ - ١٥ دقائق ، عن نفسي اخليه الى ان ينشف

هذا شكل البودرة من  الداخل ، ناعمة جدا و لونها على اخضر



نجي لتجربتي الشخصية معاه 

اول مرة استخدمته ما كان عندي خل تفاح عضوي ، فقلت استخدمه مع المويه

كانت النتايج حلوة مبدئيا

لكن فترتها كنت لسة ما تعالجت من حب الشباب ، فمرة عملي ازمة المنتج !

بشرتي كانت حساسة ، و مرة طلعلي حبوب ، فوقفته و رجعت للمنتج هذي السنة

القناع و هو على و جهك تحسي بحكة فضيعة لما يبدا ينشف ، و يشد الوجه على الاخر

لكن زي ما قلت حسيت الخليط اتكتل معايا ، لكن النتيجة كانت لا بأس فيها الصراحة .

طبعا الكمية اللى انتي تحتاجيها اقل من ملعقة ، صدقيني راح تكفيكي ! 

المهم بعد كم استعمال ، اشتريت خل التفاح ، و  بدات اجربه مع خل التفاح 

اول حاجة شفتها زي ما قولت المزيج اتمزج اسهل و كمان اتدهن اسهل

طبعا انا كنت استخدمه مرة في الاسبوع ، و الحمد الله ما عاد سار عندي علاجات استخدمها للحبوب

استخدم بس ديفرين من فترة لفترة ! 

يعني القصد انو ما عندي علاجات استخدمها في فترة ما استخدمت القناع ، فهمتو عليا !؟

يعني اذا عندك علاجات تستخدميها سواء للحبوب او غيرها اتاكدي انو ما يتعرض مع بعض


نجي للحاجات اللي لاحظتها و شوفتها اتغيرت في بشرتي بعد تجربة القناع

اول حاجة بعد ما تشيلي القناع و جهك مرة يحمر و دا الشي جدا طبيعي

البشرة مشدودة و فيها لمعة صحة ، و المسامات باين انها مرة صغرت ، القناع يزيل الرؤوس السوداء

لكن مع الاستمرار ، مو من اول مرة يزيل الروؤوس السوداء

ثاني يوم  راح  تلاحظي انو طلعت حبة او حبوب صغيرة برؤوس بيضاء ، كمان هذا الشئ طبيعي

ليش ؟! لانو القناع يعمل على اخراج الدهون و الحبوب الى و على السطح

كمان يعمل على توازن البشرة ، فراح يخفف من الدهون بشكل كبير

و مع خل التفاح لاحظت الرؤوس البيضاء كدا تطلع من نفسها ، و الله (^^) ما تحتاج مجهود

و اخيرا النعومة ،،،،

بكل اختصار منتج جبار و الله ، يستاهل كل المديح انصح اي احد فيه  ( بشرتها مو حساسة )

و الاحلا انو سعره تقريبا ١٠ دولار يعني اربعين ريال تقريبا

و الكمية اظن راح تكفي لثلاث سنين قدام (^^)



الشئ اللى ما حبيتها انو مرة مرة صعب الازالة ، صعب تغسلي
و ممكن تعاني في الاسابيع الاولى من الاستخدام ، راح تطلعلك حبوب . غالبا

اللى ممكن اقوله انو ممكن المنتج ما يناسب الكل ، خصوصا اصحاب البشرة الحساسة او الجافة
و لازم اذكر اذا كنتي تعاني من الحبوب و ماعالجتيها ، لا تستخدمي ، هو ما يعالج الحبوب
 و ممكن يعدم بشرتك
اسالي دكتورتك اول اذا يناسبك او لا ، لانو احتمال كبير يطلع حبوب اذا ما كان يناسب بشرتك

حاليا انا استخدمه على مناطق معينة و في اوقات متباعدة ، و غالبا مع الماء


كدا انهينا البوست . شكرا لكم على حسن القراءة و خليكم قريب لبوست قريب ان شاء الله




SHARE:

ليست هناك تعليقات

إرسال تعليق

Blogger Template Created by pipdig