الاثنين، 9 مايو 2016

جولد سوشي كلوب / gold sushi club



تاريخ الزيارة كان ابربل ٢٠١٦ 


السلام عليكم ، اخباركم ؟! كيفكم  ، و كيف ايامكم ؟! ان شاء الله تكونو تمام 

حبيت اذكر تاريخ زيارة المطعم في بداية البوست عشان تعرفو اكثر متى كان تقيمي له 

عشان يكون مرجع لسنين قدام ، فاذا اي مطعم اتدهور حاله تعرفو متى انا قيمته (^^)

و ان شاء الله راح اضيف التاريخ قبل كل بوست يتكلم عن الكافيهات و المطاعم 



زيارتي كانت لمطعم السوشي gold sushi club 

المطعم موجود في مركز بوابة صاري على شارع صاري جدة 
مواعيد العمل من ١ مساء  الى ١ صباحا 

للاسف المكان يعتبر من المطاعم الصغيرة و ماشاء الله كان زحمة فما كنت اقدر اصور المكان ابدا 
فاخدت صور من الانستقرام الخاص للمطعم 





زي ما قلت المكان يعتبر صغير ، و اتوقع هما فكرتهم كانت كدا 
يعني يبغو مكان حميمي اكثر ، مكان اصغر من المعتاد ، و مع ذالك ما حسينا بضيق 
اتوقع كانو يبغو ستايل ياباني بحت!

لكن الناس اللي يهتمو انو يكون في مساحة بين الزبائن ما اتوقع راح يناسبهم 
الا لو حجزتو مسبقا ، في الطاولات الكبيرة ، احنا ما كنا حاجزين 

و على سيرة المطاعم الضيقة ، اكثر مطعم ضيق رحته كان نصرت تركيا 
فرع بيبك تبع البرغر مو الستيك 

يا جماعة ما ابالغ لما اقولكم في ٣ كراسي و طاولة وحدة (^^) 
و مافي مطبخ المطبخ سيرفس ، احنا جلسنا في الطاولة ، كنا شخصين 
و الطاولة كانت ٥ كراسي فجلسو معانا تركية و ٢ اتراك ، كان احساس غريب الصراحة 
بس حلو 

ما لقيتلكم صورة من الداخل بس دا شكله من بره ، هوا المطعم اللي فوق 


نرجع لبوستنا (^^) 
المهم بما اني سرت من محبين السوشي ، بس ما اكل نيئ الى الان  (^^) 

قلنا نجرب مطعم جولد سوشي كلوب ، خصوصا انو في سمعة حلوة عنهم 


رحنا تقريبا على ساعة ٣ او ٤ و كان زحمة فخلونا ننتظر في غرفة الانتظار 
و حتى غرفة الانتظار زحمة وكتمة و حر ، لكن و الله ما طولنا على طول دخلونا يدوب ١٠ دقائق

الخدمة كانت حلوة و مرتبة 


اللي لحظته انو المطعم مافيه قسم شباب او عوائل ، كان مختلط 
لكن عازلين الشباب عن العوائل ، كدا كورنر شباب و كورنر عوائل 

بس قريت انو راح يفتحو قريب قسم شباب خاص و راح يفصلوهم عن العوائل 

و مع ذالك ما حسيت الصراحة الشباب ازعجونا ، كانو مرة محترمين و في حالهم 

نجي للطلبات ، حبيت مرة انو المنيو عبارة عن ايباد 


 اول حاجة طلبنا شربة  ثمار البحر ، اول مرة يتحط في اكلي اخطبوط (^^)

جات في حرارة كويسة ، ماهي حارة تلسع ! حرارة تقدري على طول تشربيها 


الصراحة كانت الشربة مرة طعمة ، جيدة و سعرها كان ٤٠ ريال 

و بعدها طلبنا كمقبلات اداماميي حلو كالعادة بس تبع سوشي يوشي اطعم ،  سعره  ٤١ ريال 


كمان طلبنا جمبري مقلي . جمبري تمبورا 
انا الصراحة ما عجبني مرة ، هو عادي جمبري مغلف بقسماط و مقلي 
بس اللي كانو معايا عجبهم ، سعره كان ب ٤٣ ريال 


 انا حبيت اللي يجي معا ! جاء معا حاجة خضراء مغلفة بقسماط 
الصراحة ماني متذكرة ايش هو بس اتوقع كان فول الصويا ؟

دي الصورة  اللى تحت من موقعهم ، ركزو ي اللي لونه اخضر 


طلبنا عصير او شراب اسمه موخيتو بالفواكه/ fruity mojito 
مرة مرة طعم كدا شراب غازي بالفواكه و فيه لمسة جنجر ، مرة يمي لازم تجربو كان سعره ٢٩ ريال 
يستاهل التجربة 


و بنسبة للطلب الرئيسي طلبنا جمبري كوكتيل / Ebi cocktall
هو عبارة عن جمبري تمبورا مستوي (مقلي) مع سلطة الكراب مع صوص المايو الحاو و الترياكو 

سعره كان ب ٧١ ريال  



الصراحة ما عجبني لسبب و احد و هو الصوص الكوكتيل اللي فوقه  (البنك)
اتواقع اسمه المايو الحار 
ما ادري ما عجبني الخلط بينهم ، اللي معايه عجبهم 

و الطبق الاخير كان جولد مكس / golden mix 



كان فيها ايمي تمبورا - ايمي جمبري - شاكي سلمون - ماجورا تونا 
كرسبي شاكي و اخيرا اورا ماكي  ( اجتهاد مني ذكر الاسماء ) 

انا ما حقدر اعلق علي دا الطبق لانو و بكل صراحة ما اكلت منه 
لكن يقال طعم و لاباس فيه 

راي عن المطعم كاكل احس اكثر شي عجبني الخدمة رقم و احد 
ثانيا الشربة و المشرب ، هذولا اللي اقدر اقلكم جربوه و عيونكم مغمضة 

اما الباقي الصراحة ، ذقت احسن منه ! للاسف 
لكن عشان اكون صريحة اكثر كنت اشوف الناس طالبين طلبات زي بعض 
مو من الطلبات اللي احنا طلبينها 

فممكن يكون المطعم مشهور في حاجات احنا ما طلبنها ! 

كاني قريت في موقعم  انو في عندهم توصيل مجانا 
و اخيرا الفاتورة تجي داخل صندوق يشبه ساق البامبو (^^) 



كدا انهينا البوست و خليكم قريب لبوست قريب ان شاء الله 

SHARE:

ليست هناك تعليقات

إرسال تعليق

Blogger Template Created by pipdig