السبت، 11 يونيو 2016

جهاز PMD التقشير الكريستالي المنزلي



السلام عليكم بنات ، 
كل عام و انتو بخير و الله يتمم الشهر علينا و يعيدو علينا اعوام عديدة 
المهم ، كيفكم مع رمضان و الصيام و كيف رمضان معاكم 

و الله رمضان مع الاهل غير ، الحمد الله راح اقضي اسبوعي هذا مع اهلي في مكة 
و ما اقولكم الطقوس الرمضانية كيف ،،، جناان (^^) 

الله يديم جمعتنا و جمعتكم يارب 
بوستي اليوم خطير و الله ، و اخيرا اخيرا قررت انزله 

قلت كدا تشوفو قبل العيد ، و تجربو في رمضان 

على فكرة ترى هنا احنا اهل مكة و جدة و اتوقع المدينة كمان عيد الفطر هو الكبير 
بنسبالنا عيد الفطر هو العيد الكبير 
بحكم الحجاج ، لانو وقت الحج ما شاء الله مع الزحمة الكل هنا يجلس في بيته 
فنتعب على عيد الفطر اكثر (^^) 

المهم نرجع لموضوعنا ، تقريبا في نهاية ٢٠١٣ قررت اجرب دا المنتج اللى هوا PMD


شايفين كيف  الكرتون ممزع و مشقق و حالته بالباله 
(الترجمة : يعني الكرتون في حالة مزرية )
اتهرا مع الاستعمال ، بس قلت يا بنت صوري ، خليك ايزي (^^)

المهم و اخدته هديك الفترة و استخدمته في فترة ما كنت استخدم  Acne.org 
استخدمته تقريبا لمدة اسبوعين ، يعني مرتين 
و انتبهت انو حسسلي بشرتي حبة ، طلع انو المفروض ما استخدمه مع اي منتجات تقشير 
فوقفته !

و رجعت له تقريبا بداية او منتصف ٢٠١٥ ،،، و بدات اشوف النتائج 

بس اول خلونا نتكلم عن الجهاز نفسه 



الجهاز اسمه PMD هو تقشير ميكرو ذاتي 
يعتبر زي التقشير الكريستالي لكن للمنزل ، انا اتوقع اخدته من بيوتي دوت كوم 
و سعره كان في حدود ٧٠٠ و شي غير الشحن .

تقريبا في فترة ما اشتريت الجهاز كان بس له نوعين ، لكن اليوم في له عدة انوع 
انا جهازي الكلاسيكي ، بسرعة وحدة 

الجهاز يقوم بتقشير سطح البشرة و ازالة الجلد الميت من خلال الروؤس الصغيرة المركبة على الجهاز 

مكونات الجهاز و المرفقات ، يجي مع الجهاز كتلوج الاستخدام و التعريف و كمان سي دي 


الجهاز يجي معاه محول واحد بقوة ١١٠ 



كمان  يجي معاه عدة روؤس للتقشير مختلفة الالوان و المقاسات و كل لون له درجة تقشير 
الروؤس الصغيرة تستخدم للوجه و المقاس الكبير للجسم 
وكل راس يستخدم اربع مرات فقط 




بالاضافة الى غطائين واحد بفتحة كبيرة للروؤس الكبيرة 
و الثاني بفتحة اصغر للروؤس الصغيرة 



طريقة الاستخدام 
في البداية يكون مع الجهاز راس تجربي ما يقشر ، بس يعلمك طريقة الاستخدم 
يعني تجربي اول على بشرتك قبل الروؤس الحقيقة عشان تعرفي فين و كيف تمشي الجهاز

قبل تركيب الرأس على الجهاز في قطعة اسفنجية دائرية (فلتر) لازم تركبيها قبله 
من دون القطعة دي جهازك ماراح يشتغل صح




في اول استخدام لكي لازم تبداي خفيف ، يعني تبدائي بالروؤس الاقل قوة اول 
بعدها حبة حبة تروحي للي اقوي شوي ، الي ما توصلي لروؤس الاكثر قوة 
عشان لا تخربي او تعدمي بشرتك 

بعد ما تركبي الجهاز بالشكل الصحيح تبدائي تمشي الجهاز بهذا الشكل على الوجه




تحاولي انك تشدي بشرتك بيدك الثانية ، كمان لا تخلي الجهاز يمر على منطقة مرتين 
و حاولي تمشي الجهاز بسرعة على وجهك يعني مو بشكل بطئ
و اكيد ما تقربي من منطقة حول العين ، ما تستخدمي الجهاز اكثر من مرة في الاسبوع 
ما يستخدم مع اي علاجات تقشير ، صدقوني عن تجربة 

اذا كانتي تعاني من الحبوب الافضل تعالجيها لا تستخدمي الجهاز معاها 
هذا الفيديو هو شرح الاستخدام الموجود على السي دي 


بعد ما تخلصي من جلستك تمسحي الراس و الغطاء بالكحول و الفلتر اللى هو قطعة الاسفنج بالماء 



المنتج يوعد بتوحد اللون ( سواء من اثار حب الشباب او ندوب او اي تصبغات ) ، تحفيز الكولاجين ، النعومة
تخفيف التجاعيد ، يزيد فعالية امتصاص المنتجات المستخدمة على البشرة ،    

بنسبة لتجربتي مع المنتج اول حاجة بنسبالي السبب الرئيسي لاستخدامه هو توحيد لون البشرة
( يعني هذا احد منتجات التفتيح اللي استخدمتها )

اول حاجة لاحظتها على طول بعد الاستخدام النعومة ، نعومة بشكل لا يوصف 
تحسي البشرة كدة طبقة وحدة مافيها تعرجات (مطبات) (^^) 
بعد الاستخدام الاول و في خلال الاسبوع الاول كدا تصحي الصباح كل يوم و بشرتك احسن من اليوم اللى قبله 
و الله من غير مبالغة ، لانو خلال الاسبوع بعد الجلسة البشرة تبدا ترمم نفسها 
تحسي بشرتك حيوية صحية 

بنسبالي انا ابغا توحيد لون تصبغات اثار الحبوب ، و الله ياجماعة مرة يخففها بشكل خيال 
و كل حاجة تستخدميها مع المنتج فعلن يكون بفاعلية اكثر 

كمان الجهاز سار يحافظ على توازن البشرة من الدهون ، و الله يا جماعة انو لما استخدم الجهاز
 ما تطلعلي حبوب الا فين و فين ! منتج جميل 

عن نفسي اعشق التقشير ، لكن اكره التقشير الكميائي بسبب ان يحتاج وقت نقاهة مع انه اقوي
يعني ما تقدري تعمل تقشير كميائي و بعدها تروحي عزومة او زواج ، لازم قبلها بشهر اقل شي 

اما التقشير الكريستالي قبلها بيوم و انتهينا ، لا وقت نقاها و لا يحزنون (^^) 
 شايلة هم اذا خلصت الروؤس ، ابغا اشتري بسرعة ، و الله ما اقدر اعيش من غيره 

مع الجهاز اشتريت الروؤس الحمراء ، ايام ما اشتريت الجهاز ، كانت الروؤس الحمراء هي اقوي شي 

حاليا اتوقع السوداء اقوى شي 

المهم اني اخدت الروؤس الحمرا بس لسة ما استخدمتها الى الان 
بس اجربها راح انزل تحديث هنا 



اليوم تاريخ ٢٧ اكتوبر ٢٠١٦ و تحديث عن الروؤس الحمراء 

باختصار قوية قوية جدا ، اذا ما تعرفي تستخدميها راح تعمليك علامات (^^*)

اول ما جربتها كنت في بيت اهلي ، المهم على الساعة ٧ صباح جاية ابغا استخدمها 
افتكر دا الكلام كان في العشر الاوخر في رمضان 
المهم دجين انا متعودة على الروؤس اللي قبلها فعادي استخدامها و انا مغمضة (^^)

كانت الساعة ٧ صباح في غرفة اختي و بتجهز للنوم قمت شغلتها و استخدمتها في الظلام 
و عادي كملت يومي و حطيت كريماتي و نومت 

على الفطور اخواتي مفجعوني و يطالعو فيا !! يقولولي اشبك 
و انا مستغربة اقولهم اشبي ؟!! مساكين ماهم عارفين يركبو السبب مع المسبب هههههه 
يقولولي و جهك في شي ! شايفين علامات على وجهي بس ماهم عارفين السبب !!
و مستغربين لانهم متاكدين انو انا ماسرلي حاجة تستدعى الشي اللي على و جهي لانهم طول الوقت معايا 
 و ماهم عارفين السبب ، ههههههه حاسو هههههه

المهم انا قمت على المراية و اشوفلكم الصدمة !!!! 
تخيلو خطوط افقية على و جهي هههههههههههههه

عشان افهمك اكثر و ياليت اوصلكم الصورة صح 
دحين انتي لما تستخدمي الجهاز تستخدمي على شكل خطوط افقية زي ما قولت سابقا 
 المهم لما تستخدمي على منطقة يتغير لونها بسسب التقشير كدا يفتح درجة عن اللي لسة ما سويتها
فانا سار وجهي سطر و سطر لا ههههه سطر سويته و فوقه سطر ما سويتها و فوقها سطر سويته و هكذا

هههه بسبب الظلام في اماكن عملتها و اماكن لا ،  و العادة مع الروؤس الثانية ما يبان قد كذا
فوجهي سار خطوط و الله ههههههه

يعني الجهاز مرة مرة قوي اي غلط راح يبين على وجهك او جسمك

كمان انا كنت احسب نفسي اعرف استخدمه ، طلع انو انا مرة بطيىة في الاستخدام
يعني يعلم  او يطبع دائرة في بداية كل خط  لو ما كونتي سريعة ، حوسة و الله هههههههه

فراح يعلمك اخطائك مظبوط (^^)

بنسبة للعلامات جلست تقريبا ٤ الى ٥  ايام باينة (^^)

و رائي الاخير في الروؤس الحمراء  انو حلو تاخديها و تجربيها لكن مو كا استعمال اسبوعي دائم !
يعني مثلا تستخدميها شهر كل اربع او سته شهور حلو

و بنسبالي ما اشوف فيها اي عيب ، بس يبغالك تعرفي كيف تستخدميها و تكوني سريعة
و اهم شي تستخدمي في النور ههههه (^^)

و لا تنسو تاخدو النسخة الانترناشنل من الجهاز
و بكدا خلص التحديث .






عن نفسي انصح الكل يستخدمها ، صحيح سعرها غالي لكن راح تطلعي حقها في بشرتك 
لكن اذا كنتي ما تحبي التقشير الكريستالي ، لا تاخديها 

يمديكي تشوفي كثير صور و فيديوهات في اليوتيوب عن قبل و بعد تجربة الجهاز 

كدا نهينا البوست و شكرا لكم على حسن الاستماع 
خليكم قريب لبوست قريب ان شاء الله 



SHARE:

هناك 8 تعليقات

  1. من زمان خاطري فييه والله من قبل سنه بس ماجات فرصة ..واحسه حلو بجد يكون من روتينك انا اعمل قشير كرستالي بالعيادات كل فترة عشان بشرتي تصير ناعمة احسس الجهاز راح يحل محله وعملي وتوفيري اكثر 💕😁 ان شاءالله بجيبه 🤗الريفيو حمسسني اكثر يعطيك العافيه👌🏻❤️

    ردحذف
    الردود
    1. حبيبتي يا هاجر مرة شكرا على التعليق ، فعلن و الله الجهاز مرة حلو و انصحك فيه ، لكن تري هو مو بقوة تقشير العيادات بحكم انو منزلي
      لكن صدقيني يؤدي الغرض و مع المداومة الاسبوعية عليه راح تشوفي الفرق في بشرتك ، خصوصا انو سعره تقريبا سعرة جلسة تقشير فا مرة راح يكون توفير عليكي

      حذف
  2. السلام عليكم ورحمة الله وبركاته
    من أين يمكن الحصول عليه من دالخ السعودية ؟
    شكرا لك

    ردحذف
    الردود
    1. عليكم السلام حبيبي . اتوقع موجود في موقع citrusstv و يوصلك لحد يبيتك ، ودوبي شوفته سعره كمان حلو عندهم
      شوفي هنا https://ar-sa.citrusstv.com/beauty/skincare/grey-device-full-combo-1.html
      و اعتذر عن التاخير في الاجابة

      حذف
  3. مشكوره اختي لكن سؤالي يسير استخدمه يوميا

    ردحذف
    الردود
    1. العفو حبيبي ، لا مرة انتبهي
      لا يستخدم الا مرة كل اسبوع ، عشان تلحق البشرة تعالج نفسها

      حذف

Blogger Template Created by pipdig