الاثنين، 26 سبتمبر 2016

PAUL KSA / كافية و مطعم بول


السلام عليكم قبل اسبوع تقريبا زرت كافية بول جدة 
مني عارفة بظبط كان يوم ايه ، بس خليني اكتب الشهر والسنة 
سبتمبر 2016 

المهم من زمان و انا نفسي اروحه لكن مرة كنت متردد !
على بالي كان كافية ايطالي ، بس طلع لا هو في الاصل مخبز فرنسي 


بول في جدة زي ما اعرف له فرعين و احد خلف التحلية و هو الاقدم و فرع جديد في العرب مول 

احنا بحكم انو كنا قريب من الفرع الاول روحنا فرع التحلية 

يعتبر حجم المطعم حلو ماهو كبير و لا صغير كدا ملموم 
فيه جلسات خارجية لكن انا ما شوفتها
( يعني شوفت الساحة الخارجية فاضية مافيها كراسي 
لكن عادة يكون في جلسات ، امكن ايام البرد ينزلوها )
علي العموم انا زيارتي له كانت علي فترة الغدا ء

فيه جلسات للعوائل و للعزاب كمان 

الطاولات قريبة من بعض و مافي بارتشينز ، لكن سمعت انو في ستاير ينزلوها كابارتشين 

للاسف ما قدرت اصور المكان كان زحمة ماشاء الله و الناس جنب بعض 
انحرجت اصور الصراحة (^^) 

لكن اخدت صور لنفس الفرع اللي روحته من الحساب الرسمي للمطعم في الانستقرام 

ياله enjoy (^^) 






ديكورات المكان حلوة و شرحة (تفتح النفس) لكن للاسف المكان مرة مدهوك 
ههههه جالسة ادورلكم معني  كلمة مدهوك مني لاقية 

مدهوك يعني حاجة اتخربت من كثر الاستعمال (ان شاء الله عرفت اشرحها)

المهم انو كان باين علي المكان انو استعمل كثير و ماسارت صيانة دورية عليه
يعني اقمشة الكراسي كانت مبقعة و اقمشة الستاير كمان و المنيو مجعد و قديم

الصراحة مرة ما حبيت دا الشي 




قدمولنا زيدة و زيتون كضيافة مع الخبز الفرنسي
و اتوقع المفروض يكون معاهم جبنة لكن ما قدموها !



الصراحة كلها كانت لذيذة و الخبز الصراحة اللي عمله باين فاهم شغله كويس
جابولنا غير الخبز السادة خبز بزيتون و خبز اتوقع بنوع من انواع السمسم

دي الصورة اقرب للخبز و الصراحة كلها كانت حلوة , طرية و ناعمة


و بعدها طلبنا Paillasson Saumon Fumé
كانت عبارة عن  سلمون و تحتها بطاطس مهروسة مع سلطة جانبية
من الذ الاطباق اللي ذقتها في جدة ( مع اني ما اكل سلمون ) 
انصحكم مرة تجربو و شكل الطبق كان حلو !
شوفت صورة لنفس الطبق من و احد من فروع بول في العالم كان السالمون محروق !


كمان طلبنا croque madame
و كان عبارة عن طبقتين توست بينها طبقة من الديك الرومي مغطية بالجبن فوقها بيض
مع سلطة جانبيه ، كان جيد لا باس فيه ينفع للفطور و البرنش
لكن زي ما انتو شايقين البيض جاء محروق شوية و الويتر ما سألني كيف احب البيض يكون


و طلبنا طبق  غراتان فورستييه 
عبارة عن نوع من انواع الطواجن مكون من صدور الدجاج و الفطر و الجبن و البشاميل 
كمان كان طبق يساهل التجربة لكن حسيت انو كثرو الدهن، كان في زيت كثير طالع علي الوجه 


و اخير برجر لحم بول يجي معاه سلطة و بطاطس جانبية
للاسف مرة ما حبيته ، كان في ريحة زفر اللحم ، كان جاف و البطاطس تعتبر محروقة
ما حبيته ابدا !


و بنسبة للمشروبات طلبنا بول باشن و ستربوري كولادا الاثنين دمار مرة حبيتهم و الستربوري اطعم



اخيرا كانت تجربة حلوة لكن للاسف المكان جدا يحتاج لصيانة 
ان شاء الله اذا ما صلحو المكان ، فرع العرب مول راح يكون وجهتي مو دا الفرع

الاكل كان جدا ممتاز (الغالب) لكن للاسف الويترز ما يسالو الزبون كيف يحب طبقه !

الويترز كان خدومين و حبوبين
للاسف سارت حركة قدامي من و احد من السوبرفايزر اتوقع مرة ما عجبتني
 و حسيت انها مرة حركة ماهي برفشنال !
اللي صار انو جاء زبون يشتري قهوة تيك اوي و طلب الطلبية و وقف في الطابور يستني دوره
عشان يستلم طلبه
لكن جاء السوبرفايزر دا و باين انو يعرفه و اخده من الطابور و عمله طلبه !
مرة ما حبيت الحركة و مع ذالك كان الزبون يقوله لا مافي داعي انا استني دوري
اتمني اذا احد من اللي شغالين في بول يهتم في دا الموضوع و انو دي الحركة المفروض ما تنعاد

كان نفسي اجرب قهوتهم و الحلويات باين انها مرة لذيذة و ماشاء الله زحمة طلبات عليها
و بنسبة للاسعار احسها كانت عادية زي المطاعم و الكافيهات التانية

كدا انهينا البوست كان سريع بس وحشتوني و حبيت انزل شي 
اشوفك ان شاء الله قريب في بوست قريب ان شاء الله 


SHARE:

ليست هناك تعليقات

إرسال تعليق

Blogger Template Created by pipdig