الأربعاء، 5 أكتوبر 2016

تاق ال ١٥ سؤال


السلام عليكم بنات دي الفترة بما اني ماني في بيتي ماني حابة ما انزل حاجة على المدونة 

و في فترة نزلت تدوينة تاق ، و مرة حبيتها ! مع اني عارفة انها ما تفيد احد او ممكن ما تهمكم  

بس مادري كدا حسيتها حلوة ، حلو كدا اعرفكم بنفسي احس دا الشي يقربنا اكثر 

و الله انا و انا بقراء الاسئلة عرفت حاجات عن نفسي ماكنت اعرفها 

و مرة مرة احب اشوف تاقات الناس كمان 


و اقول لكل وحدة فيكم تعمل دا التاق و تمنشني عليه ، احب  اتعرف عليكم كمان

زمان كان عندي مدونة تانيه بس شخصية ، اكتب فيها مذكراتي و احداث يومي و كدا
امكن كانت قبل ٦ او ٧ سنين و اليوم لما ارجعلها يالله قد ايش احساس حلو !
كاني من اول و جديد بعيش الحاجات اللي سارتلي ،
عشان كدا ابغا ازيد الجانب الشخصي في المدونة 

دا التاق اسمه تاق ال ١٥ سؤال ، حبيت اختار حاجة قصيرة عشان لا اطول عليكم 
تعرفو اختكم هنا تحب البربرة (كثرة الكلام) 

١- ماهو الشئ الذي تعتقد/ ين ان بامكانك فعله لكن في الحقيقة لا يمكنك فعله ؟

انا نفسي نفسي اعمل مغامرات خطيرة اللى هيا انط من مكان عالي او ارمي نفسي من طيارة 
العب دي الالعاب اللي في الملاهي الخطيرة ، يعني مغامرة و السلام 

و الله ياجماعة خلاص اكون مقررة اجربها و مافي رجعة في الموضوع ، خلاص انا قدها و قدود 
بس اوصل عندها و الله يا جماعة ما اعرف ايش يسير لي 
كل القوة و الحماس راحت فشوش ، و ارجع البيت ابهدل اللي كان معايا ليش ما جربتها
و ليش ما غصبتني 

و دا الشي سار كلو بعد تجربة الطيران الشراعي في ماليزيا ، ديك التجربة كانت حكاية و الله 

ان شااء الله يوم احكيكم هيا

٢- ما الكلمة الي تصعب عليكي نطقها ؟
حاليا مافي حاجة على بالي لكن عادة لما الكلمة تكون فيها نفس الحرف مع بعض او حرفين متشابهين وراء بعض
زي مثالا حرف التاء مرتين و راء بعض
او التاء و الطاء لما يكونو وراء بعض ماادري ليش التاء تسير طاء و العكس (^^)
 كمان النون و الياء ، الطاء و اللام
 و السين و الصاد اذا كانو في نفس الكلمة  اروح فيها انا (^^)
ههههه مشكلة صح ؟ و الله تتشقلب عندي الحروف عادة بس لا تتفجعو مو دايما (^^)

٣- ما هو برنامجك التلفزيوني المفضل فى طفولتك؟
اووه كثير و الله بس كنت احب اكثر شي ( كا تلفزيون طبعا مو افلام ) كارتون نيلز 
تفتكرو نيلز يا جماعة ؟! 
كمان كنت مرة احب كبمارو (نينجا) و رانزي و الى اليوم اتفرجها (^^)

٤- ما هو أكثر أهمية: الحب، الشهرة والسلطة أو المال؟
بنسبالي و من دون اي مجاملات الحب 
هو صحيح الحب ما يجبلك قرش (^^) بس و الله الناس بنسبالي هم الثروة 
ياختي ثروة تملئ قلبك و روحك ، و يقلك المثل جنة من غير ناس ما تنداس 

٥- ماهي عيوبك و مميزاتك ؟
عيوبي حساسة ، عصبية ، مافيا صبر 
مميزاتي احب اساعد الكل ، متفهمة ، نيتي طيبة و احب العمل ما احب الفضاوة 

٦-. إذا كنت تستطيع العيش في أي من العصور ، اي عصر تختار و  من ولماذا؟

احب اكون عايشة القرن اللي فات ال١٩ خصوصا من الثلاثينات الي السبعينات 
لانو في تسهيلات المعيشة متوفرة مو زي العصور الوسطى حتي حمام الله يعزكم مافي (^^)
و في نفس الوقت مو زي عصرنا دا مشاكل و الحياة كدا تحسيها مكتظة 
احب الوقت اللي زي تايتنك و سالي مرة حلو 

٧- اذا عرض عليكي تبديل كل ملابسك اللي في الدولاب بملابس جديدة من اختيارك من محلين ايش تختاري؟
وووه صعب صعب ، انا راح اختار اتش اند ام اكيد 
بس الخيار التاني محتارة بين مانجو و ايسوس او barneyswarehouse
و كمان net-a-porter مرة حلو

خلاص رأي نهائي اتش اند ام عشان خامته حلوة و سعرها احلا
و net-a-porter عشان في هاي اند (^^)

٨ - هل تذكرون ما كنت تفعل قبل عام في مثل هذا اليوم؟
للاسف لا انا امس ما افتكر ايش فطرت (^^) زهايمر بعيد عنكم
بس جد لو من جد في ناس يفتكرو ايش عملو في كل يوم من السنة اللي فاتت و الله برافو عليهم

٩ -  هل لديك أحلام تكرار و؟ إذا كان الأمر كذلك، شرح
لا الحمد الله 

١٠ -  ما هو برجك؟
الاسد 

١١ - كيف تبدو غرفة نوم احلامك ؟ 
اول حاجة لازم يكون فيها شباك كبير مرة او كذا شباك كبير في الغرفة ابغا النور يدخل الغرفة
و تطل على حاجة حلوة 
يطل على بحر  زي اطلالت اليونان و المالديف و بورا بورا و كمان البيسفور 
 اهم حاجة يكون في مويه في الموضوع (^^)
تكون جدران الغرفة من الورق الفخم اللي يخليكي منتي عارفة ورق و لا بوية
اكيد لازم يكون لها غرفة ملابس كبيرة و حمامها الخاص
 ( طبعا الحمام الله يعزكم حكاية تانية لو بدات اتكلم عنه ما راح اخلص)
و اخيرا فيها جلسة و  تكون معظم الغرفة سمارت هوم من انارة  لستاير 

١٢- ماهي الوضعية اللي تنام فيها ؟
انام على جنبي و اتقلب من جنب لجنب  وبعض الاحيان انام بوضعية الجنين
و لازم في كل الوضعيات يدي تحت خدي او ذراعي تحت المخدة تحت راسي

١٣-  من هو مصاص الدماء المفضلة لديك ؟
مادري انا ما حبيت مصاصين الدماء ابدا ، لكن ممكن اكثر واحد عجبني منهم 
ادوادر اللي في توايلايت 

١٤-  ماذا ترتدينه حاليا على قدميك؟
ولا حاجة الساعة ٤.٢٧ دقيقة فجرا و انا على السرير (^^)

١٥- هل لديكي خط مميز ؟
للاسف لا بس اتمني (^^) صاحبات الخـطوط الحلوة قلولي اسراركم 

كدا انهينا البوست ان شاء الله حبيتو 
و عادي اذا ما عجبكم جاملوني ، و قولولي واوو احلا بوست عملتي هوزا برافو 

اروح انام احسلي . مو؟! هههههه 
يالله تصبحو علي خير و اشوفكم على خير في بوست قريب جديد ان شاء الله
SHARE:

ليست هناك تعليقات

إرسال تعليق

Blogger Template Created by pipdig