الخميس، 3 نوفمبر 2016

BooksLovers 5 #



السلام عليكم بنات 
تقريبا في شوال خلصت كم كتاب و حابة اشاركم فيها 

السنة مرة مقللة قراءة ، المهم خلوني اقولكم على الكتب 

اول كتاب اخترته تقريبا في اول نوفمبر السنة اللي فاتت ٢٠١٥ كانت فترة الهالوين 
اكيد ما نحتفل في اعيادهم 

بس ما ادري فترتها ابغا اقراء حاجة تخوف ، و خصوصا انو كمان و من فترة طويلة !
مافي افلام رعب من جد عجبتني ، احس لهم فترة ما نزلو فيلم رعب حلو 

افتكر اخر فيلم مرعب عجبني كان the conjuring
كان من جد مرة مرة حلو اللي ما شافتو مرة انصحها فيه ، طبعا بس الجزء الاول اللي حلو 
يعني تقريبا ٣ سنين مافي فيلم رعب حلو 

المهم دا السبب الرئسي اللي خلاني اختار الكتاب بعد كم ريفيو عنه  


الكتاب اسمه miss peregrine's  
للكاتب Ransom Riggs 
الكتاب مرة مرة غريب و غامض و تقريبا يميل لقسم الفانتاريا 

الكتاب يحكي عن حفيد و جده ، الجد كان يحكي حفيده  الصغير عن مجموعة من الاطفال غريبين الاطوار 
بمواهب خاصة 
و احداث غريبة في حياته مدعمة بصور ! (الصور كلها في الكتاب) 

مع الايام كان ابن الجد و والد الحفيد ينكر الاحداث لابنه ( الحفيد) 
و ان جده مخرف و مايعرف ايش اللي جالس يتكلم عنه ، فما كان في احد  يصدق الجد 
و بمعني ثاني الكل كان يطنشه 

و فجاءة شي يسير للجد و يترك رساله لحفيده !
و يبدا الحفيد بالبحث عن الحقيقة ، فيسافر الى الجزيرة الغامضة اللي كان فيها الجد 
و سارت كل الاحداث الغريبة فيها 


الكتاب ٣ اجزاء و حولوه لفيلم هذة سنة ( لسة ما شفته )

الكتاب جدا جدا غريب و احسه شوية للاطفال ، مرة ماله دخل بالرعب ابدا !
احسه غامض اكثر ، و الصور ساعدتني كثير انو افهم خيال الكاتب 

القصة حلوة لكن الصراحة ، انا اتوقعتها مرة حاجة ثانية 
الكتابة و الحبكة حلوة و يستاهل القراءة ، لكن زي ما قلت ماله علاقة بالرعب 
و اخيرا الكتاب اخد مني وقت كثير عشان اخلصه ، يعني ما خلاني اتعلق بالكتاب 
ما وصلت لشعور انو ما ابغا اسيب الكتاب عشان ابغا اعرف ايش يسير نيكست 
  
و نقطة اخيرة الكاتب عندو خيال مبدع ! 


الكتاب الثاني we were liars 
للكاتبة e. lockhart 

اوه . ماي . قاد OMG 
مافي كلمة او جملة توصف شعوري لدا الكتاب . رائع 

انا قبل اي كتاب ، كالعادة ادور ريفيو عنه ، و تقريبا كل الريفيوهات اللي شوفنها 
نصحو انو اقراء الكتاب من دون ما اعرف و لا شي عنه 
و كان الكل مشدد على دي النقطة ، و مشيت على النصيحة 

و ما ندمت ، و انصح الكل ما يكمل اللي راح اكتبو و يقرو الكتاب على طول !
و الله راح تستمتعو فيها اكثر 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

و اذا لساتك حابة تكملي قراءة راح اتكلم شوية عنه من دون ما اضيعه عليكي 

الكتاب يتكلم عن عائلة غنية تتكون من اب عنده ثلاث بنات 
كل وحدة منهم تحاول انو تحصل على اكبر قدر من الارث ، بارضاء ابيهم 

و كل صيف كلهم يجتمعو في جزيرة الاب الخاصة .

كل وحدة من البنات عندها اطفال و هم ابطال القصة 
بطلة القصة اسمها كايتي 
كايتي كل صيف تجتمع مع ٢ من اولاد خالتها و صاحب و لد خالتها 
و المجموعة دي تسمي نفسها we were liars

للاسف بس دا الشي اللي اقدر اقوله (^^) 

رائي في الكتاب ، الصراحة دا الكتاب اكثر كتاب صعب انو اكتب عنه ريفيو 
لانو اي توقع للكتاب قبل لا تقرؤ راح يضيع عليكم القصة 

و في نفس الوقت احس نفسي ابغا اتكلم ابغا اطلع اللي جوتي 
ابغا اطلع اللي في قلبي بس ما ابغا اضيع عليكم الكتاب ، قصة رائعة بمعني الكلمة 

و القصة ما تبان الا في الاخير،  في اخر فصول ! 
و الله يا جماعة ، تخيلو انا ماخده كمان الكتاب الصوتي منه عشان اسمعه قبل النوم 
المهم كنت خلاص مرة داخلها في النوم و انا باسمعه 
و فجاةء اسمع او عرفت الحدث الخطير اللي في القصة ! و الله يا جماعة فزيت من نومي 
ما استوعبت 
الكناب نوعه انو كل حاجة باينه قدام عيونك لكن ما تنتبهيلها !!!!
و بس تعرفي الحدث راح تحسي نفسك غبية ، كيف ما استوعبت 
كانت في اداله في كل القصة لكن ما قدرت استوعبها ، الكاتبه خدعتني (^^) 
 و الصراحة حبيت الشعور ، لاني رجعت من اول و جديد اقراء الكتاب بس عشان اعرف ايش اللي فاتني

استمتعت استمتعت في القراءة و من افضل الكتب اللي قريتها و انصح الكل فيه 


كدا انهينا البوست ، ان شاء الله اشوفكم في بوست جديد فخليكم قريب 

SHARE:

هناك تعليقان (2)

  1. السلام عليكم

    تشجعت اشتري الكتاب we were liars

    شكرا

    ردحذف
    الردود
    1. سعيدة انو حمستك ، ان شاء الله يعجبك و بالله قوليلي رايك لما تخلصي ابغا اشارك مشاعري للكتاب مع احد (^^)

      حذف

Blogger Template Created by pipdig