السبت، 4 فبراير 2017

كام فور سيل - cam4sell /online try - on


السلام عليكم 
بوست جديد من سلسة اون لاين تري اون / online try - on

اذا اول مرة تزوري مدونتي زوري دا البوست عشان تفهمي السلسلة تتكلم عن ايه 



اخيرا اخيرا اشتريت كاميرا كانون ال G7X Mark II


من زمان كونت ادور عليها ماشاء الله بس تتوفر في اي مكان على طول sold out
و ما شاء الله بس اتوفرت في كام فورسيل و لا ثلاث ايام و خلصت من الموقع

مع انو خدمة العملاء لما كلمتهم قالولي لا احنا جايبين كمية كبيرة

القصة و مافيها انو كان ليا فترة تقريبا اسبوعين او ٣ مرة حابة اشتريها
و كل ماروحت مكان او دخلت موقع كاتبين ماهي متوفرة

و سبحان الله يا جماعة ما ادري ايش اللي خلاني اتصل
"عادة انا خلاص لما تكون ماهي متوفرة اكنسل الموضوع "
المهم ماادري كيف داك اليوم الساعة ٣ عصر دقيت على كام فور سيل

و رد الرجال عليا و سالته اذا تقدرو توفروها ليا  دي الفترة
" و الله في قلبي يا جماعة كدا جالسة اقول مافي امل ليش مضيعة وقتك "

والا الرجال يقولي حاليا ماهي متوفرة لكن راح تتوفر بعد بكرة في الليل متاخر
وقالي انتي سجل في الموقع و عند الكاميرا اختاري خيار "اخبرني عند توفرها"

و فعلن و الله ياجماعة بظبط زي ماقال توفرت  في اخر الليل على الموقع

نجي نتكلم على الموضوع الاساسي اللي هو موقع كام فورسيل

الموقع سعودي لهم معرض في الرياض

الموقع يوفر جميع مستلزمات التصوير من كاميرات و عدسات و و حقاىب و حوامل

اول مرة اتعامل معاهم الصراحة و كانت تجربة حلوة

وسائل الدفع عندهم يا اما بطاقة ائتمانية او تحويل بنكي
شحنهم سريع و يشحنو للسعودية و دول الخليج
و منتجاتهم كلها اصلية و عليها ضمان لمدة سنتين

هذا هو الموقع  cam4sell

نجي لتجربتي معاهم ......
الموقع كان مرة سهل للاستخدام ، طلبت كاميرتي الساعة ٨ صباح
و الله يا جماعة ما كملت ٢٤ ساعة الا و الكاميرا ف مكة
هذا اسرع موقع اتعاملت معاه في حياتي ، و الشحن كان عن طريق سمسا
شحني انا كان مجانا ، هو اذا كانت الطلبية تتجاوز مبلغ ال ٥٠٠ ريال سعودي تكون مجانية
و اذا اقل يكون الشحن ٣٥ ريال سعودي داخل السعودية

وبنسبة لدول الخليح يبدا من ١٢٠ ريال سعودي

و بنسبة لسعر الكاميرا ٢٢٠٠ ريال سعودي
و اخليكم مع صور الفتح ال Unboxing










محتويات الصندوق كانت الكاميرا و البطارية و شاحن البطارية و كتيب و حبل تعليق الكاميرا
 البكج جاني مغلف كويس و الحمد الله وصلتني الكاميرا سليمة

عندهم رقم خدمة عملاء كانو كويسين في المعاملة و سرعين الخدمة و يردو

تتوقعو ليش اخدت الكاميرا ؟!!! اذا عرفتو ،،،، ان شاء الله اتجراء و اعملها
بس احتمال كبير ما راح اتجراء 

كانت تجربة حلوة و اكيدا ان شاء الله مو اخر مرة اشتري من عندهم

انهينا البوست ان شاء الله اشوفكم في بوست قريب على خير فخليكم قريب


SHARE:

ليست هناك تعليقات

إرسال تعليق

Blogger Template Created by pipdig