الأربعاء، 1 فبراير 2017

life Update



السلام عليكم ،،،،،، 
كم شهر مر و انا ما نزلت تدوينة ! 


التدوينة دي بس عشان اعطيكم ابديت على الحياة ، عني و عن المدونة 

حاسة نفسي مني عارفة اتكلم و من فين ابداء 

فابالله استرو ما وجهتو ! من اخطاء املائية او اي كلاجة او اخطاء تعبرية 

انا راح اكتب كل حاجة على بالي و ان شاء الله ما اطلع كلاجة (^^) 

تقريبا تقريبا راح اكمل الاسبوع دا ٣ شهور ما نزلت حاجة "اعتذر"

" التدوينة دي فيها اخبار و فضفضة شخصية "

اول حاجة مرحبا و كيفكم و حشتوني والله ، و وحشتني الكتابة  

سبب الغياب الاول و الرئيسي كان ،،،،،،


نقلت على مكة ، رجعت لاهلي رجعت لكل الحاجات  اللي متعودة عليها 
الحمد لله 

الصراحة النقل كان على قد ما هو حاجة تفرح لكن كانت عملية مرة صعبة 
من كل النواحي مادية و نفسية و عملية ، الصراحة مرة كانت فترة صعبة 

٢٠١٦ كانت الحمد الله سنة كويسة ليا بس كان فيها تغيرات مرة كثيرة 

بداية السنة و نصها كان عندي عمليتنان 
و من رمضان اللي فات زوجي مرة انشغل في رحلات عمل و امتدت لديسمبر

يعني يمديكم تفهمو كيف كنت دي الفترة هجولة ليا انا 

و بداية ديسمبر جانا خبر النقل على مكة فجاءة ، مرة ماكنا مجهزين لها 
و تقريبا تقريبا لميت عفش بيتي في اسبوع و احد 

تخيلو اسبوع و احد بس ، لميت عفش ٥ سنين ،،، لكم ان تتخيلو الوضع 

بيتي حاليا في مكة جدا جدا صغير ، في البداية مرة زعلت و مرة خجلت 
 بس قررت انو اعمل البيت دا جنة باذن الله 

المهم كنت مرة فرحانة لنقل و مرة متحمسة و ما اتوقعت انو النقلة ممكن تاثر على نفسيتي 

تخيلو يا بنات تقريبا انا نقلت في بداية ديسمبر و تقريبا اخر اسبوعين من ديسمبر 
و اول اسبوعين من يناير انا وجعانة 

و بالمناسبة الله يجعلها سنة خير علينا و عليكم و الله يحفظلنا فيها كل من نحب يارب 
٢٠١٧ 

المهم ديك الفترة جاتني حالة مرة غريبة الله لا يعيدها و الله لا يجعلكم تشوفوها 
جاتني كتمة صدر غريبة ، لدرجة جلست اتشهد 

روحت كدا مرة حطولي اكسجين ، او بالاحرى انا قلتلهم حطولي اكسجين 

بس للمعلومية الحمد الله ما عندي امرض الصدر من حساسية او ربو الله يشفي كل من يعاني منها 

المهم كنت طول اليوم ما اقدر اتنفس لدرجة البكاء 
و كنت اروح المستشفي و كانو يقولولي مافيكي حاجة ماشاء الله دا بس مجرد عرض نفسي 

و انا اقولهم ياناس و الله ما اقدر اتنفس ، و ابداء بكاء  و اقولهم ماحد حاسس فيا ، ليش ما تصدقوني 

و الله مساكين اخواتي مرة حزنو عليا  

عشان اوصفلكم قد ايش الكتمة كانت قوية خليني احكيكم موقف 

تخيلو في المرات الاولي اللي جاتني 

كنت في يومها عادي جالسة على النت بعد المغرب و فجاء من دون اي مقدمات جاتني الكتمة 
كدا احس ما اقدر اخد نفس للاخر و احس نفسي ابغا ادوخ او يغمي عليا 
و القفص الصدري يوجعني 
 وقلبي يدق بسرعة ، بأختصار مافي نفس يدخل كانو الشعب الهوائية مقفلة 

المهم بسرعة طلعت على السطح و الجو كان مرة طيب حلو الهواء يعني الجو مو كتمة 

و ادور في السطح ابغا هواء و الله ياجماعة مافي هواء اتجننت ! 
ما كونت في وعي في ديك الفترة 

المهم بعدها جاء زوجي و اخدني المستشفي و اعطوني اكسجين مع انو ما كنت احتاج 
بس عشان كنت اقولهم مافي نفس و من كثر ما انا مكتومة عيوني تدمع 

ما تدمع من البكاء لا بتدمع عشان مافي نفس 

و بس و مرت الايام و بعدها مرة ماطلعت السطح ، كنت اذا جاتني الكتمة على طول علي اخواتي 

المهم و مرت الايام و يوم من الايام تقريبا بعدها باسبوع 
طلعت الظهر السطح ابغا اشوف مين دق الجرس ، و انتبه انو في حاجة على الارض تلمع مع الشمس 
   
استغربت و رحت اشوفها و تطلع دبلتي طايحة في الارض 

تخيلو اليوم اللي جاتني فيه الكتمة لما طلعت السطح من غير ما ادري فصخت الدبلة و رميتها على الارض من غير ما احس 

كانت فترة مرة صعبة و الله ، الحمد الله على كل حال 

انا الحمد الله اليوم طيبة و الكتمة الحمد الله خفت كثير ، و الله يا جماعة افتكر فترتها كنت افتكر ايام الصحة و اسئل نفسي هل ارجع زي زمان 

و الله ما ابالغ في الكلام لدي الدرجة كنت احس ، كنت احس نفسي خلاص الدنيا انتهت 

الحمد الله على الصحة و العافية و الله انها اهم كنز الانسان يملكه 

و يارب بحق و جهك الكريم انك تشفي جميع مرضى المسلمين في كل مكان و من كل الامراض 
يا حي ياقيوم يا من لا اله الا انت 

و لما كدا جلست مع نفسي ابغا اعرف ايش اللي ممكن كدا غير في نفسيتي و نزلها للحضيض 
ايش الشي اللي خلاني احس دا الاحساس 

بعد الاستنتاجات عرفت او اتوقع انو كان عندي عضلة او ابهر في الظهر 
و انو السنة اللي فاتت مرة ما ارتحت فيها 
عمليتين و خلال العمليتين كنت مرة متوترة

بعدها غياب زوجي و الهجولة اللي اتهجولتها ، كانت كمان فترة مرة متوترة 

و كمان جات النقلة و هموم النقل من مصاريف و نقل عفش و فين السكن و كيف السكن 
كانت فترة مرة صعبة 

و كمان في فترتها جات احداث حلب و الهجمات الارهابية في العالم و اللي ضد المسلمين 

مرة انا زعلت على حلب و المشكلة انو كنت مع الاحداث لحظة لحظة 
و قبل النوم كنت كمان اشيك على وضعهم 

دا الشي مرة كان غلط ما كان المفروض انو اتفرج دي المناظر و اخليها اخر شي اشوفو 

بس ما اقدر قلبي ما يعطيني و الله مقهور مرة كنت و لازلت مقهورة على حلب 
الله يردهم لبلدهم منصورين 
عموما الوضع السياسي للمسلمين مرة سيئ

الله يعز الاسلام و المسلمين 

و اخير وضع مملكتنا الاقتصادي و السياسي كمان مسببلي توتر 
بس ملكنا سلمان قدها و قدود 

المهم هي دي الحاجات اللي عملتلي توتر و جابتلي الكتمة 

ــــــــــــــــــــــــــــــــــــــــــــــــــــــــــ

و عن اخباري و حياتي حاليا 
جالسة اشتغل على تأثيث البيت ، شوية شوية احاول اخلصه ، و اتوقع يبغالو سنة عشان اخلصه
لو مو اكثر الله يسهلنا  ( كل حاجة غالية في السوق )

و مرة ابتعدت عن السناب و الانستقرام و كل السوشل ميديا 
(عشان كده ما تشوفوني انزل في الانستقرام )
 بس تابعوني بليز 

حاليا جالسة ادور على وظيفة ان شاء الله الاقي حاجة تناسبني 

افكر ابداء حاجات جديدة على المدونة مرة حابة اضيف اليوتيوب و اشتغل عليه اكثر 
ما اعرف ايش ممكن يسير 

السنة دي مرة مرة حابة ان شاء الله اخوض الحياة اكثر ، راح افهمكم كيف 

قبل شوية ذكرتلكم انو مرة ابتعدت عن السوشل ميديا 
اللي اقصده انو عادي انزل لكن انا ما اتبع كثير ناس ، يا دوب كم شخص و مو كل يوم اشوفه 
بعض الاحيان يمر اسبوع و انا ما فتحت لا انستقرام و لا سناب 

اللي بقولو انو تعودنا على دي المواقع راح تسبب لنا اضرار نفسية و شخصية اكثر من ما تتوقعو 
و اكثر حاجة راح تاثر على قدراتنا الاجتماعية 
(و على فكرة حتى الالعاب اللي على جوالاتنا و ايبادتنا لها نفس المنظور)


فانا قررت انو ابغا اخوض الحياة اكثر ابغا اعيشها ابغا اخوضها  ابغا اجرب حاجات جديدة 


مثلا زي نفسي ادخل دورة غوص او تعلم ركوب الخيل او اتزلج على الثلج 
او اخيم في منطقة او امشي في غابة اخد دورة خط ، يعني حاجات زي كدا 

الله يبارك في عمري انا وزوجي و نقدر نعملها ، و ان شاء الله اقدر اعملها 

هذة هي حياتي و اخبارها و اعذروني على الانقطاع  
و اشوفكم ان شاء الله في بوست جديد على خير 



SHARE:

ليست هناك تعليقات

إرسال تعليق

Blogger Template Created by pipdig