الأربعاء، 15 مارس 2017

مطعم Evet Life Steakhouse جدة


تاريخ الزيارة ٢٠١٧ فبراير ١٢ 

السلام عليكم قبل كم يوم روحت مطعم ايفيت التركي 
المطعم تركي  للحوم و الستيك موجود في شارع الامير سلطان

للاسف ما لقيت موقع عشان اقدر اخد تفاصيل عن المطعم اكثر ( للعلم هو لسة جديد ) 

و للاسف مافي صور عن المطعم ، لانو كان زحمة و كنا شخصين فكنا جالسين في زاوية 
فما كان لو داعي اصور مافي بوينت انو اصور 
لانو ما حتطلع الصور حلوة ، و الناس ما راح ترتاح في جلستها 

و للاسف ما لقيت للمطعم مكان غير الفيس بوك عشان اخد صور رسمية منهم 

لكن للصراحة المكان مرة حلو مرتب نظيف مرة مرة حسيت نفسي في تركيا . ما ادري ليه (^^) 

المكان مريح مافي بارتشين ، و الموسيقي شغالة  طول الوقت اذا ما تحبو تسمعو اغاني 

اهم اهم حاجة ما كان في ريحة لحم في المكان ، امكن عشان ما في احد طلب انو يطبخ عنده 

عادة تطلع الريحة لم ينطبخ اللحم عن الزباين 

و بنسبة للطلبات طلبنا سلطة تركية و جاء معاها مقبلات عبارة عن بابا غنوج و حمص و خبز 





كلها كانت جيدة بس مافيها حاجة مميزة ، و كانت مرة ماخده النكهة و الستايل التركي 

و بعدها جانا العصير كنا طالبين سنجريا 


يسرسح علي القلب زي ما يقولو (^^) 
هو شراب اسباني يعتبر من الحمضيات او فيها نكهة حامضة اكثر من الحلوة 

كمان لاباس فيه حلو كان 

و بعدها طلبنا الاطباق الرئيسية
الطلب الاول كان نيويورك بيف معاه سبانخ و بطاطس مهروسة بالكريم 


طلبنا ولدن well done  ( مستوي ) 
كان مرة لذيذ و الله . بس كان طعمها اقرب لكباب من ستيك 
اتوقع لانها نيويورك بيف مو نيويورك ستيك ، بس كان جدا ممتاز 

و بنسبة للطلبات الجانبية اللي معاه ، حاجة جنااان ايش اقولكم اه بس 
البطاطس المهروسة بالكريمة قوامها جدا جدا سائل اول مرة اجربها بدا القوام 
تقريبا زي الصوص من كثر ما هي سائلة بس خفيفة على المعدة
و الله حاجة خيال 
و السبانخ بالكريمة يا جماعة امكن اروح المطعم مرة تانية بس عشانها 
مرة طعمة ، اساسا من يوم ما رجعت جالسة ادور في النت عن طريقتها (^^) 

بليز يا جماعة اللي عندها الطريقة او تعرفها بليز بليز تعطيني هيا 
 تكسب اجر فيا و الله

هي عبارة عن سبانخ مرة مرة ناعمة مغمسة في كريمة و نكهتها كانها مطبوخة في مرق

و الله حاجة عجيبة لازم تجربوها

و بنسبة لطلبي ، طلبت انا شيشلك  well done



اذا ما قد جربتي ششلك ، فاتك حاجة كبيرة تري


و الله يا جماعة اذا جربتوها راح تدمنو عليها
هي عبارة عن قطع او شرائح من لحم العجل منقوعة في مزيج معين من المنكهات
اتوقع بصل و حليب و زيت و بهارتهم الخاصة

حاجة تذوب في الفم ، و الله يا جماعة دا الطبق من الاطباق اللي اذا خلصت ازعل
من جدا ازعل ما امزح

من جد و الله لما يخلص طبقي ابغا طبق ثاني ، بس لولا الرجيم و المتن كان طلبت 
اه حكم القوي على الضعيف 

بعدها قدمولنا ضيافة الشاي التركي 


و اكيد بعدها لازم في اي مطعم تركي نحلي بالابقلاوة 

كمان كانت ممتازة احسن من مطاعم كثير ، بقلاوة بقلاوة على اصولها 




الاكل و المكان و العمال كان كل شي تمام 
 لكن ما ادري مرة حست انو كل شي جاء بسرعة زيادة عن اللزوم 
ما اعرف امكن عشان زحمة او ما يبغو الزبون ينتظر كثير 

المكان و الاكل و التجربة كانت ممتازة و تستاهل التجربة 
 و بنسبة للسعر اتوقع طلعنا ب ٤٠٠ و شي ما افتكر و الله 
بس غالبا مطاعم اللحوم مكلفة نوعا ما 

كدا انهينا البوست فخليكم قريب لبوست جديد ان شاء الله  


SHARE:

ليست هناك تعليقات

إرسال تعليق

Blogger Template Created by pipdig