الخميس، 6 أبريل 2017

تجربة ليزر ازالة شعر الجسم / اول جلسة


السلام عليكم 
امس كانت اول جلسة ليزر ليا ، كانت بتاريخ ٥ ابريل ٢٠١٧

تقريبا ليا سنة و انا بفكر بشكل جدي انو اعمل ليزر ازالة شعر الجسم 
لكن ما اتيسرت ليا الا دي الفترة 


و ان شاء الله خلال دي الفترة راح انزل بوستات عن تجربتي لكل جلسة 
ما اعرف صراحة كيف راح يكون نظام البوستات 
ما ادري اذا راح انزل بوست عن كل جلسة او اجمع كم جلسة في بوست واحد 

ان شاء الله راح يبان مع الايام 

تقريبا قبل شهر من اليوم روحت عيادة في جدة (ماراح اذكر اسمها الا اذا ارتحت لها )

كان في نفس العيادة تخفيض على ٥ جلسات ليزر جسم كامل 

فتوكلت على الله و روحت 
ما كونت عاملة موعد او اي شي ، روحت وقالتلي موظفة الاستقبال 
لازم تقابلي الدكتور عشان يحددلك الجهاز 
وعادة الموعد اللي زيك مالها حجز مسبق ، عادي تتدخلو بين المواعيد 

يعني مابين موعد و موعد تدخل كشفية ليزر 

المهم تقريبا استنيت ساعة و دخلوني على الدكتور 

شافني و حددلي جهاز ايليت 
الصراحة الدكتور كان جدا مو متجاوب ، ما اعطاني اجابات كافية و وافية عن اسئلتي 
و كم سؤال الصراحة حسيت انو اجابته غلط بس بيسلك الموضوع 
و كم سؤال بديهي قالي ما اعرف ؟! 

المهم انا ما اهتميت للموضوع لانو السستر هي اللي تهمني 
بما انو هي اللي راح تعملي الجلسات 

المهم خلصت و نزلت على الاستقبال عشان احجز موعد 
ماشاء الله مع الزحمة مالقيت موعد الا بعدها بشهر ، اللي هوا امس 
و حجزت بكج ٥ جلسات للجسم كامل 

طبعا الحاجات اللي لازم تعرفيها ، انو ما تكوني حامل 
تكون ليكي فترة ما عملتي لا واكس و لا حلاوة بس حلاقة 

و طلبو من انو احلق قبلها بيوم و ما استخدم و لاحاجة على جسمي من كريمات او مزيل عرق
و ابتعد تمام عن العطور و اخير ما اتشمس و ما استخدم ادوية مثل الروكتان 

و فموعدي وقعوني على ورقة علي الحاجات اللي لازم اتوقعها و هي :.
ان النتائج تفرق من شخص و الثاني ، انو غالبا تبان النتيجة من ٤ - ٦ جلسات 
الشعر يخف ما يختفي ، اللتزام بتعليمات قبل و بعد الجلسة للحصول على نتائج مرضية
 الليزر له اثار جانبية من تفتيح او تسمير او حبوب او حروق 
او تهيج الى اخره  
-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-٠-
و بس دخلتني السستر الغرفة و قالتلي افصخ و البس الزي الموجود على السرير 

الزي زي حق العمليات 

الجهاز عبارة عن انبوب ليزر و انبوب تبريد (يطلع منه هواء بارد جدا )
و السستر كان معاها موس طول الوقت اذا شافت شعر تشيله 
و خططت جسمي  و حطتلي كريم مخدر في البكيني و الشنب 
و بدات تشتغل 
وعلى فكرة انا قبل الموعد بنص ساعة حطيت نفس المخدر اللي هي حطتو 
يعني المنطقة ادهنت مرتين ، و اعطيت السستر خبر

الصراحة كنت مرة خايفة و قبلها بيوم فتحت اليوتيوب و اتفرج على الجلسات 
الكل جالس يصرخ و يتألم 

خوفت و الله بس ايش اسوي على قولهم اللي يبغا الدح ما يقول اح (^^)

بدات اول حاجة في منطقة الشنب ، و الله يا جماعة ماشاء الله مرة مرة مرة ما يعور 
مافي حاجة ، ما تحسي و لا بحاجة 

الشي اللي حسيتة في منطة الشنب انو اسناني سرلها زي الحساسية 
اللي اسنانهم حساسة راح يفهموني 
شوفتي كيف لما تشربي حاجة باردة او تعملي جلسة تبيض !
شوفتي كيف اسنانك تسير او تجيها موجة حساسية ، زي كدا حسيت 

اللي يبغا يعرف قصة اسناني يشوف دا البوست هنا 
المهم السستر ما شاء الله عليها على طول فهمت و اعطتني قطعة شاش و حطيتها على اسناني من جوة 

و ابد ماشاء الله بعدها ما حسيت بحاجة 

و بعدها عملت ايدي و بعدها بطني و البكيني و بعدها رجولي 
و بعدها قلبت و عملتلي رجولي من وراء و البكيني من الخلف و الظهر 

في اماكن يكون الشعر فيها وبري فا هي ما تعملها 
زي مثلا انا ما عملتلي اعلا البطن و اعلا الفخوذ و ظهري من الجناب 

و بنسبة للالام الحمد الله و ماشاء الله اقدر اقولكم من كثر ما الالام خفيف مافي الالم 
و انا اعتبر من الناس اللي مرة يتعورو بسرعة و ماعندي قدرة تحمل 
و خوافة مرة ، مرة اخاف انو اتعور 

لكن و الله مافي الام مرة ، خصوصا انو احنا متعودين على الحلوة و الواكس 
و الله و لا شي جنبهم ، تحسي بلسعات بسيطة و في وقتها يعني بس ثانية 
و مع الهواء البارد مرة ما تحس شي و الله كنت راح انام من كثر مافي الأم 

و كمان هي السستر لما تكون في منطقة تعور مرة تحاول تتجاوب معاكي 
توقف مرة ، وتعمل ومضات قليلة مرة ، و تشغل هواء بارد بس عشان تبردلك المنطقة مرة

يعني الحمد لله مرة تحاول انو تخفف عليك 
لكن بجد ماراح تحتاجي انو تعمل كدا لانو و الله مافي الالم 
و ان كان في بس يلسعك لاقل من ثانية او فانية 
على قول سعيد صالح الله يرحمو
 انشالله يكون فاضل فانية اللي هى اقل من الثانية

يعني الحمد الله ما اتعورت لا في البكيني و لا في الشنب و لا في الاند ارم 
و الصراحة من كثر  ما مافي الام خفت انو الجهاز ما ناسبني او مو قوي 
لكن انا كنت جالسة اشم الشعر ( تطلع ريحة كانو الشعر يتحرق )
فمو معقولة انو مو جالس يشتغل 

لكن احتمال انو كل جلسة تزيد قوة الجهاز ، فما اعرف و الله 

و بنسبة لمنطقة البكيني 
الصراحة انا كونت متخوفة اعملها بسبب الحكم و الحرمة و كدا 
لكن اخدت بدي الفتوة ، و الله اعلم


لكن كل وحدة و رايها الشخصي ، وفعلن السستر ما تكشف المنطقة الا لما تشتغل عليها 
اساسا ما تكشفلك و لا منطقة الا لما تشتغل عليها 
تكون مغطيتك بشرشف و كل ما تعمل منطقة تكشفها حتي رجولك و يدك 

يعني تحس نفسك مستورة ، و هي ماتحسسك بالخجل ، وبسرعة مرة تخلصلك البكيني 

تقريبا اخدت الجلسة من ٦ و ربع ل ٩ و خمسة 
يعني تقريبا ٣ ساعات ، بس اشتغلت و الله بضمير ، تسلم يدها

و لما خلصنا دهنت لي كريم تحسي بعدها بحرارة شوية 
و اعطتني ورقة تعليمات مكتوب فيها 
عدم غسل المنطقة المعالجة بالليزر من ٤ - ٦ ساعات 
و السستر قالت لا تخلي الموية تجيها كمان - استخدم الماء البارد لمدة ٣ ايام عند غسل المنطقة
ايقاف النتف و الفتلة و الشمع و الحلاقة كمان 
يتم الحلاقة قبل يوم واحد فقط من موعد الجلسة - عدم التعرض للشمس و التشميس 
وضع واقي شمسي 
- الابتعاد عن وضع اللوشن و مزيل العرق و العطور من ١٢ - ٢٤ ساعة بعد الجلسة 
الابتعاد عن اي علاج لتقشير الجسم لمدة اسبوع - الابتعاد عن ارتداء الملابس الضيقة من ٢-٣ ايام 
الابتعاد عن حك المنطقة المعالجة لمنع تهيج الجلد 
وضع الكريمات التي تحتوي علي الكورتيزون او احد مشتقاته في حال التهيج
عمل موعد بعد ٣-٤ اسابيع لتحقيق افضل النتائج

احس اللي نفعني و خلاني ما احس بألم ما شاء الله
اتوقع يعني ، امكن كلامي مو صحيح ، بس راح اقولكم 
اول حاجة كنت في يومي السابع من دورتي يعني اغتسلت قبلها بيوم 
و هما يقولو لا تروحو وقت الدورة لانو راح يوجعك 
و كمان حاولت قدر الامكان انو احلق الشعر كويس و قبلها بيوم 
لانو اذا كان في شعرة و ما اتشالت مظبوط راح يوجعك ، عشان كدا السستر كان معاها موس طول الوقت 
و كمان كان لي سنة و انا بس اشيل بالموس ، بحكم انو مخططة اعمل ليزر 
ما اعرف اذا له دخل بالموضوع 
و اخيرا حطيت مخدر قبلها بنص ساعة بالاضافة الي مخدر السستر 

بنسبة لاسم المخدر PRILA 

اللي حسيتو في اليوم الثاني ، حسيت بحكة في بعض مناطق الجسم و غالبا المناطق الحساسة 
و ثنيات الجسم 
و احساس كأنك شايلة بالموس ، الاحساس داك اللي كانو دبابيس 

و على اليوم الثالث طلعتلي حبوب حمراء صغيرة في اماكن متفرقة في جسمي
الصراحة اتفجعت و خوفت ، لكن بعدين قريت لدكتور انو دي الاعراض دليل عليى نجاح الجلسة
و راح تختفي لوحدها بس ادهنها لمدة ثلاث ايام ب fucicort

وبس و الله دي تجربتي الاولى و الحمد الله احسها كانت موفقة و متحمسة للجلسة الثانية
فخليكم قريب لبوست قويب ان شاء الله 

SHARE:

هناك 14 تعليقًا

  1. مره شكرا ع البوست وتجربتك حبيت انو ذكرتي كل التفاصيل ما تتخيلي قد ايش تساعدنا .. مره شكرا

    ردحذف
    الردود
    1. حياتي انا و لله شكرا لك علي كلامك الحلو ، و انا مرة انبسط انو في احد استفاد من بوستاتي (^^) اتمنالك تجربة ليزر ممتعة

      حذف
    2. جزاكي الله كل خير انك افدتينا


      حذف
  2. انا صلحت جلسه بس احس م ثاني يوم منطقه البكيني بدا يطلع فيها الشعر ومرره تضايقت منها يعني شي طبيعي او لا الي نفس تجربتي ترد بالله علي

    ردحذف
    الردود
    1. ايوة حبيبي عادي لازم يطلع ، الفكرة من الليزر انو بعد علي الاقل ٤ جلسات يبان الفرق .. فهمتي كيف
      شوفي كثير ناس على بالهم انو اذا عملت ليزر خلاص معاد راح يطلعلها شعر ! لا يطلع الشعر بس الفرق انو يخف الشعر و يطلع بشكل ابطء
      يعني بدل ما الشعر يطلع كل اسبوع ، لا بعد الليزر يطلع كل ٤ الي ٦ شهور .
      و طبعا دي النتيجة ما تبان الا بعد علي الاقل ٤ جلسات و في ناس بعد ١٢ جلسة ، كلو يعتمد علي كثفة الشعره و بشرتك و الجهاز
      فبختصار انتي راح تستمري طول حياتك تعملي ليزر لكن بدل ما كونتي تعملي حلاوة او شمع مرة في الشهر او حلاقة كل اسبوع ، لا تسيري تعملي جلسة ليزر كل ٦ شهور الي ٧ شهور
      ان شاء لله اكون قدرت اوصلك المعلومة كويس (^^)
      جلسات ممتعة لكي يارب

      حذف
  3. يعني انتي كنت شايلة كل شعر جسمك حتى الصدر والبطن والجوانب بالموس قبل ما تجي العيادة ؟

    ردحذف
    الردود
    1. ايوة كل شي .... و هي اذا شافت شعر انا ما شفته و شلته هي تشيله

      حذف
  4. وأيضا أذكريلنا النتائج بعد الجلسة الأولى الشعر خف أو لا ولونه وغيرها والإحمرار كم دام بعد الجلسة من فضلك .

    ردحذف
    الردود
    1. النتائج ما تبان الا بعد الجلسة ٣ الي الخامسة

      حذف
  5. أنا أريد القيام بجلسة ليزر للوجه جلسة واحدة هل بعد جلسة يكون الشعر خفيف ومو واضح أو يرجع قاسي أكثر ماكان

    ردحذف
    الردود
    1. الوجه ابدا ما انصح ، و علي كلام الدكتور ما ينفع تعملي الوجة يطلع حبوب

      حذف
  6. بعد الجلسه الثالثه غالباً تشوفي النتيجه اوضح 💕👌🏻

    ردحذف
  7. جربت من اول جلسه والشعر ضعيف وبيقع صراحه احسن كثير من الوسائل الثانيه

    ردحذف
  8. كيف كانت تجربتك مع جهاز الايليت؟

    ردحذف

Blogger Template Created by pipdig