الأربعاء، 19 يوليو 2017

مطعم هاري رامسدانس


السلام عليكم جميعا 
اليوم بوست جديد عن مطعم جديد في جدة 

زيارتي له كانت في شهر سبتمبر ٢٠١٦ تقريبا في نفس وقت زيارتي لمطعم ليلي  

سبب التآخير كان انو نسيت اسماء الاطباق 😅 
و مافي ولا مكان او موقع في النت قدر يوفرلي المعلومات ، للاسف حتى المطعم ماكان له موقع خاص 

لكن اليوم عرفت الاسماء بفضل النت و قلت انزله 
لانو حرام المطعم جدا جبار و ماحبيت اهظم حقه و انزل بوست اي كلام 
فشعان كدا ما نزلت البوست 

اولا المطعم اسمه هاري رامسدانس بريطاني الاصل 
متخصص في الاسماك او معروف ب Fish and chips او سمك و بطاطس 
الوجبة المشهورة في بريطاني 

انا اعرف انو نفس المطعم كان مفتوح في التسعينات في جدة و قفل 
ورجع انفتح السنة اللي فاتت ٢٠١٦ 

الموقع في جدة سكوير في شارع الامير سلطان تقاطع صاري 

اخليكم مع صور المطعم و الجلسات 





المكان راقي و حلو نظيف و واسع ، جلسات العائلات تحت و الشباب او الافراد فوق
في كدا نوع من الجلسات زي ما انتو شايفين و المطبخ تقدرو تشوفو كمان 


حبيت حركة الجرايد و دي الحركة معروفة في كل مطعم السمك و البطاطس 







اول حاجة طلبنها اتوقع اذا مني غلطانة موخيتو فرواله 
للاسف كل الاطباق عرفت اسمها الا المشروب فحطيت توقعي الشخصي 
لكن افتكر انو كان مرة طعم و يسرسح علي القلب و الله الطعم مرة كان متوازن 



و بعدها طلبنا نوعين  شوربة ، الشوربة الاولي شوربة الشودر و هي شوربة كريمية بالجمبري 
تقدم داخل خبز ، حلو طعمها تستاهل التجربة ، كان سعرها ٣٨ ريال سعودي 


و شربة حسااء اليوم كانت شوربة البصل البحرية الكريمية كانت حلوة
 لكن الشوربة الاولى عجبتني اكثر الصراحة 



و كمقبلات كمان طلبنا سلطة هاري الخاصة ، الصراحة لأباس سعرها كان ٣٠ ريال سعودي


و الطبق الرئسي الاول كان سمك السلمون المشوي الفاخر مع الخضار المسلوقة والرز المبهر
شوف يا جماعة انا دايما اشوف الاجانب ياكلو سلمون و يقولو قد ايش هوا طعم و صحي 
و الله من زمان و انا احاول اجربو في كدا مكان ، لكن للاسف الطعم ماعجبيني 
و خلاص استسلمت و اقتنعت انو السلمون مو طعم و مو من ذوقي 

المهم و الله ياجماعة طلبنا الطلب و اساسا ما جاء على بالي مرة انو اذوقو 
قلت اكل البروكلي (مرة احبه) و اجرب الجمبري 

المهم اقنعوني انو اجرب السلمون ، و الله افتكر اخدت لقمة صغيرة بس مجاملة 😄 
لانو عارفة ما يعجبني ! 
وه يابنات ما تخيلت الطعم ، اطعم سلمون ذقته في حياتي 
من جد من جدا طعم و الله شي عجيب لازم تجربو هناك 



و انا طلبي كان سمك القد مع البطاطس 
معلومة عني يا جماعة ، انا مرة ما احب الاسماك ، مرة ما اكلها الا اذا كانت ايدام 
او نقت او برغر او جمبري و لازم يكون مقلي و كمان التونة 

غير كدا ما اكل للاسف 
و الله يا جماعة من غير ما ابالغ اذا كل يوم اكلت من دا الطبق فطور و غداء و عشاء 
عادي  ولا كمان اشتهيه بزيادة ، من كثر ماهو طعم 
يستاهل كل الشهرة و كل العنوة و كل قرش اتدفع فيه 
من اطعم الاطباق اللي اكلتها في حياتي ، و ان شاء الله راح ارجع له 

الغريب في الموضوع 
شوفتو ايدام الفاصوليا دا !؟  
انا كنت دايما اشوف في البرامج البريطانية انو طبق مشهور و يتاكل في كل الاوقات 
ويعتبر من الاطباق الجانبية الرئسية و المهمة عندهم 
و كنت دايما استغرب !

الغريب في الموضوع انو باميتهم لما ذقتها مرة ماهي زي حقتنا 
باميتهم حالية او حلوة الطعم ، 





رائي النهائي عن المطعم 
المكان حلو راقي نظيف و الخدمة حلوة و الويترز مرة لطيفين 

افتكر احنا رحنا وقت او فترة الغداء و كنا لوحدنا و اتوقع كان في شباب فوق 
لكن في قسم العوائل كنا لوحدنا او احنا و عائلة تانية 

كان الويترز طول الوقت يروح و يجي علينا و يتكلم معانا مرة فرندلي كان 
كان طبعة زي طبع الشعب الامريكي اللي ما يعرفك و يفتح معاكي سوالف كانو يعرفك من زمان 

طبعا بطريقة غير مزعجة 

و بنسبة للاطباق و الاكل ، الصراحة من اطعم ماذقت و يستاهل العنوة 
و انصحكم كلكم فيه 

كدا انهينا البوست ان شاء الله يكون عجبكم 
واعتذر عن عدم توفر الاسعار و الله الفاتورة ضاعت للاسف ، و عشان كدا كنت مأخرة البوست 

اشوفكم علي خير 
و خليكم قريب لبوست قريب ان شااء الله 

SHARE:

ليست هناك تعليقات

إرسال تعليق

Blogger Template Created by pipdig